Job 39 - DAWAN BÎLA AISKA

¹ ¿Man tânka brisma ki guts wail nani ahkia ai luhpia baiki ba? ¿Sula mairin nani ai luhpia baiki kan pat kaikram sa ki?

² ¿Man tânka brisma ki kati an kat ai luhpia baikaia ba?

³ Ai luhpia baiki sakaia piua ra, ai tnaya bulkisa bara ai luhpia baiki sakisa.

⁴ Ningkara naha nani karna takisa, twi nani ra pâwisa, bara baha nani ba auya, kli sin tawi balras sa.

⁵ ¿Ya mita biriku wail ba pri ban swin sa ki? ¿Ya mita lanhkan taukisa ki?

⁶ Yang bui marikri plis kumi anira takaskaia ba, upla iwras tasbaya ra, bara twi tara, mahsis ba.

⁷ Tawan bîla baikra ba walan daukras sa, daiwan kakahbra nani winanka ba sin bîla walras sa.

⁸ Il nani ra plapi taukisa twi pliki, twi kura kum pan pliki taukisa piaia.

⁹ ¿Lukisma ki bîp wail ba man dukiam daukaia wilin sa, bîp pata watla ra tihmia ba lalawaia?

¹⁰ ¿Sip sma ki witin ba alki bîp lal ra wilkaika dusa ba ra wilki, tasba baikaia brih waia, apia kaka ninamra waia insla ba klin dauki?

¹¹ ¿Man sip sma ki witin ra kupiam mangki lukaia, kan witin ba karna ba mita, bara swirka warkkam sin dauki kabia ki?

¹² ¿Patam mâ nani wahbaia dukiara man ra hilp kabia ki, bara patam mâ nani auhbaika pliska ra asla brima?

¹³ Daiwan tnawira yahpa tara ba bâra brisma: ai tnawa nani ba ilingkisa liliakira, suk sirpi tnawa bri baku kan si,

¹⁴ auhya ra ai mahbra nani ba ban swisa tasba yamhpuska ba tilara, wan yu laptika alkbia dukiara.

¹⁵ Luki sin kaikras sa upla ai mina ni taibia sapa, apia kaka daiwan wala kum mita taibia sapa sin lukras sa.

¹⁶ Ai luhpia nani mapara saura sa, witin ai luhpia apia kan baku sa, ai kupia sin lukras sa ai warkka nani sut ba bahki tawbia kaka.

¹⁷ Kan yang mita sins lâka ba yaras kapri, sins lâka pain ba witin ra yaia apia wîri.

¹⁸ Sakuna witin bui plapi ba ra, aras nani ba bara aras âiulra nani ba lawaska kikisa.

¹⁹ ¿Dîa man mita aras nani ba karnika yabatma ki, bara ai nana ba diara maman ni prana skahkata ba?

²⁰ ¿Dîa man mita yaram pâlisa ki tristrisia baku, baha wingka puhbra bui sibrin tara wan dingki ba wal?

²¹ Ai kupia baiki kira twi ra tasba salhkisa, sibrin sin âpu kira aiklabaia dimi wisa.

²² Sibrinka lâka dukiara kikisa, sibrin sin daukras pali sord mapara si briras sa.

²³ Aras âiulra trisbaika watla binka walbia sin, ai langsika nani ba pauta taki ba ra sin dimisa.

²⁴ Witin ai kupia baiwanka saura pali wal tasba ba salhkisa, trumpit ba puhbi kan bara sip apia kan sâp kaia.

²⁵ Trumpit puhbanka ba ni winanka ba pana aisisa; kau laih wina pat war aiklabi kîa ba kiawalisa bara tâ uplika nani bîla baikra winanka ba sin walisa.

²⁶ ¿Man ba dîa ban sinskira kapram ki, tritri ra smalkisma nahki pâlaia ba, bara ai pâlanka ba waupasa tani ra lakaia?

²⁷ ¿Man mita dîa yakal ra lâ mangki yaram sa, il purara ai watla ba paskbia?

²⁸ Yakal mairin nani ba, kakna bara tihmia walpa unta ra takaskisa, ai kan kahbaika pliska ba bukisa laih il bahna ra.

²⁹ Laih baha pura wina aihwaki kaikisa ai daiwra ba alkaia.

³⁰ Ai luhpia nani ba tala baman dîsa, anira wîna tara pruan bâra sa kaka, bahara asla takisa.