Job 38 - DAWAN BÎLA AISKA

Dawan bui Job yaban aisisa ai raitka ba

¹ Bamna Dawan mita Job ra aisin, pâsa karna kum krawi ba bâk, bara naku win:

Dawan ba

² ¿Man ba ya sma ki, yang sinski lâka brisna ba tânka makabi walaia, man aisinkam sinskas tânkas ba ni baha tânka saki aisaia?

³ Bara nanara kupiam karnika tânka ba ai mariks, bara naha makabanki na ansika aik.

⁴ ¿Man anira kapram, naha tasba yang paski kapri piua ra? ¡Bamna ai wis, man sins tânka aitani brisma ba!

⁵ ¿Man tânka brisma ki ya mita kulki kaikan ba, bara yamna papaskra kan paskan ba?

⁶ ¿Playa ba dîa purara bapan sa ki? ¿Ya mita walpa ba playa ra bri si mangkan,

⁷ yu baiwaia slilmika nani, lawana aiwani kan piua ra, yang warkki dadaukra insalka nani lilia bri kan piua ra?

⁸ Kabu ba tasba klukia munhta wina takan piua ra, ¿ya mita dur nani mangkan ki alki takaskaia dukiara?

⁹ Yang mita klaut kumi yâri ai prâka baku, bara mukus ba lika tuktan srukaia kwalka baku.

¹⁰ Kabu ra yang mita mark kumi mangki yâri sa, bara ai durka nani bâk mangkri sa.

¹¹ Bara wîri: “Naha kat balma, bara naha wina lika kau kainamra wama apia, naha kat ripkam prautkira nani ba âpu taki kabia.”

¹² ¿Piua nani kum kum ra man rayakam ra lâ mangki yaram sa ki, yu baiwanka ba taki balbia bara mahka yu baiwbia?

¹³ ¿Bara ingni ba tasba purara ingbia, bara saurakira nani ba wih yukuwbia?

¹⁴ Bamna tasba wina twi bîla nani ba takisa, prâk maman maplira ba baku.

¹⁵ Watawikira nani ingnika ba witin nani wina sakan kabia, bara baha klahkla purara bukan ba mâyara batakan kabia.

¹⁶ ¿Man tihu tara ba pat wih dimi kaikatma ki, kabu biara ra ai kârma nani bri ba?

¹⁷ ¿Man kaikisma ki ani tani ai durka nani bri ba, baha sibrinka pali prura kingka ba?

¹⁸ ¿Naha tasba yahpika na tânka brisma ki? ¡Ai wis kasak pali man tânka sut brisma kaka!

¹⁹ ¿Anira auhbi brisa ki ingni bara tihmia ba wal?

²⁰ ¿Sip sa tnata pali kat yarka waia, bara ningkara kli yarka ai watla ra waia?

²¹ ¡Man tânka bri kaia sma, kan mani ailal brisma bara baha dukiara sika man lika pat aisubi takram kan!

²² ¿Auhbaia pliska ba pat wih kaikatma ki, sno bara lî klaswan mâ nani auhbi swin ba,

²³ pât piua ra aiklabanka nani bara war nani piua ra blikaia?

²⁴ ¿Ani yabalka wala bâra sa ingni ba baiki sâkbia ba ra? ¿Lalma payaska ba nahki ban tasba aiska purara krawisa ki?

²⁵ ¿Lî uya auhi ba ra, ya yabal kumi sakisa ki, bara pâsa saura ra yabal mariki ba,

²⁶ upla iwras tasbaya ra lî auhbia ba dukiara, baha pliska ra upla kumi sin iwras ba,

²⁷ kau plun sakras tasbaya ba lî laikaia, bara yaka twi nani ba pâwaia?

²⁸ ¿Lî nani bara diwas laya nani aisika ba ya sa ki?

²⁹ ¿Lî kauhla bara lî klaswan yaptika ba ya sa ki?

³⁰ ¿Ya mita lî ba walpa baku karna daukisa ki, kabu tihuka ba lî klaswan baku daukisa ki?

³¹ ¿Man sma ki Slilma Matlalkahbi nani asla dauki bri ba, Slilma nani aihka aihka sakan ba sin?

³² ¿Man sma ki titan slilmika awarka kat taki ba? ¿Man sma ki tâ bri ba baha slilma nani Pupu, Yar bara Kiswa impaki ba ai kainara?

³³ ¿Man tânka brisma ki kasbrika purara lâ nani bâra ba? ¿Man sma ki baha lâka nani tasba ra saki wi ba?

³⁴ ¿Klaut nani ra sip sma ki lâ nani mangki yaia, baku mika lî ni mai banhkan kabia?

³⁵ Imyula ba saki plis wala ra blikisma kaka, witin pana ban kra mai aisisa kaka: “¿Nâra sna dîa ai wima ba daukaia dukiara”?

³⁶ ¿Ya mita man kupiam ra sins lâka ba mangkan sa ki, tnawira nani kakma yari ba bara kalila wainhka tara sin?

³⁷ ¿Yamna kau sinskira ba bara tânka brisa klaut an bâra sa tânka ba? ¿Ya bui sip sa ki bîla baman sakaia, bara baku mika ai laya ba auhbia,

³⁸ bara tasba yuya ba slaubla ni takbia, bara tasba nani ba ai tahkia aikuki pana pana prakbia?

³⁹ ¿Man sma ki layan mairin pata pliki yabi ba, baku mika layan luhpia nani ba pibia aibanhwan kabia kat,

⁴⁰ ai untika ra yukuwisa piua ra, apia kaka twi saura lilara aihwaki ba ra?

⁴¹ ¿Ya usus nani ra plun dakakisa, ai luhpia nani plun dauki pliki ba ra, bara inanka tara wal ai makabi ba?