Job 37 - DAWAN BÎLA AISKA

¹ Pâsa saura ba kaikisna ba ra kupi tatatwisa, laima dusa wina ban taki kauhaisa baku daira walatna.

² Gâd bîla baikra binka tara ba wali banhs, ai bîla wina alwani bal taki ba sin.

³ Witin imyula lulkisa kasbrika aiska ra, tasba tâ kumi wina tâ wala ba kat.

⁴ Baha ningkara bin kum walan, bîla baikra kum yan bal takuya king bîla baikra baku, bara ban baha wali piua ra alwani ba imyula lipi ba lika takaskras kata.

⁵ Gâd ai bîla baikra ba alwani binka baku dauki piua ra, diara aihka pali yan takisa, diara tara nani daukisa bara upla nani ba tânka briras sa.

⁶ Sno nani ra win tasba purara kauhbia, bara lî ba yan karna pali auhisa.

⁷ Upla nani ra munisa ai watla nani ra takaski banhwi kabia, bara sut mita tânka bribia, witin sika baha warkka sut ba daukisa.

⁸ Daiwan nani ba ai untika ra dimi banhwisa, bara bahara yukuwi banhwi kabia.

⁹ Waupasa tani wina prari aula, bara yahbra wina kauhla aula.

¹⁰ Gâd pâsa puhbi ba mita, lî klaswan daukisa, bara lî ailalka laya ba karna takisa.

¹¹ Kasbrika ba lî kiasmika nani buskisa, bara baha wina imyula takaia daukisa.

¹² Imyula ba lipi auya, kasbrika pura bâk kriwi bara bulwi baku dauki auya, Gâd bui dîa daukbia win ba kat tasba aiska purara.

¹³ Baha nani sut ba wal sip sa Gâd mita tasba ra klala yabaia, apia kaka ai latwanka lâka tânka ba marikaia.

¹⁴ Job, kupiam alki bri, wirâ ai wals, Gâd wark aihka nani dauki ba dukiara wirâ luki kaiks.

¹⁵ ¿Man nu sma ki, nahki Gâd naha diara nani sut ba baku kabia dauki ba, bara nahki kasbrika ra imyula lipisa?

¹⁶ ¿Nu sma ki, nahki pâsa purara kasbrika awi ba, baha ba lika ai sinska tara ba tânka wan marikisa?

¹⁷ Man lika kwalkam nani dimisma ba mita, bitni pruisma, waupasa payaska mita tasba ba yan yapi ba ra.

¹⁸ ¿Sip sma ki Gâd ra hilp munaia, kasbrika pura ba kau tara daukaia, bara baha ba aibapi ban swima, bras ni dus wahia daukan aibapi baku?

¹⁹ Wan smalks yang nani Gâd ra dîa aisaia, kan yang nani maipara tihmu sa, diara wiaia ba âpu banhwisna.

²⁰ Yang lika wimna sin apia dîa aisaia brin ai dauki ba, baha wiaia tânka ba âpu ai daukbia wisna baku sa.

²¹ Wan yu ingnika ba kaikaia karna sa, klaut nani mita yukuki bri ba ra, sakuna pâsa krawisa ba ra kasbrika ba param takisa.

²² Gul lipanka ba lika yahbra tani wina takisa, Gâd mita king tara sibrinka ni kutban piua ra.

²³ Sip tânka briras wan munisa, Gâd karnika sut bri ba dukiara, kan witin ba karnikira, kasakkira tara pali sa, witin ba wapni sa, upla kumi ra sin taibras sa.

²⁴ Baha mita upla nani mita witin ra sibrin brisa, sinskira nani ba witin ai mapa ra diara apia sa.