Job 35 - DAWAN BÎLA AISKA

Elihú aima yumhpa ra aisisa

¹ Elihú witin dîa aisaia kan ba, kau ban aisi, win:

² Job, ¿man mampara aitani sa ki, Gâd mita aitani mai kulkaia?

³ Bamna man bui Gâd ra wiram: “¿Baha ba man ra dîa sa, yang saura yamna kaka? ¿Yang saurki ba dîa mapara mai sauhkisa ki?”

⁴ Bamna yang mita pana mai wimna, man ra bara pâmnika nani ra sin.

⁵ Kasbrika tani ra tawi kaiks, bara kaiks nahki kasbrika nani ba man wina laih puramra pali sa.

⁶ Saura yama kaka, baha lika Gâd ra saura munras sma, saura ban ailal pali daukma kra sin, baha wal diara munras sma.

⁷ Bara yamni daukma ba sin, man baha wal diara daukras sma, man baha wal yamni kumi sin daukras sma.

⁸ Man saurkam ba lika upla ra saura munisma, bara dîa yamnikam nani ba sin upla ra lika yamni nani daukisma.

⁹ Taiban lâka wirhika ba wal upla nani ba winisa, bara plikisa baha karnika ba wina swaki sâkbia.

¹⁰ Sakuna Gâd Papaskra ba ra lika pliki banhras sa, witinka karnika nani yabi ba tihmu nani piua ra,

¹¹ witinka bui wan smalki wan mariki ba, daiwan nani bara piawira nani bâk.

¹² Wini banhwisa, sakuna Gâd pana aisaras sa, kan baha nani lika upla saura bara kupia prautkira nani sa bamna.

¹³ Gâd karnika sut bri ba, kunin lâka nani ra tawi walras sa.

¹⁴ Kau pali ba lika Gâd kaikras wi piua ra, bamna wirâ bîla kaiks, man lâmka ba man lamamra sa.

¹⁵ Man bila wisma: “Witin ai kupia sauhkras bara klala sin wankras, witin saurka ra aman tawi kaikras sa.”

¹⁶ ¡Sakuna, Job, man lika diara tânkas baman aisisma, uya pali aisisma, sins tânka âpu pali sa!