Job 33 - DAWAN BÎLA AISKA

¹ Baku bamna, Job, aisanki nani na wals, dîa mai wiaisna ba aman pali wali bas.

² Pat twisi tâura brisna dîa mai wiaia sna ba:

³ kunin âpu wal mai aisaisna, dîa lukisna ba param pali mai wiaisna.

⁴ Gâd, karnika sut bri ba mita ai daukan, ai wingka yang ra ai puhban.

⁵ Sip sma kaka, pana ai aisas, ridi taks maipara pana aisaia.

⁶ Gâd mawanra, yang bara man wal ba kumi sa, yang na sin slaubla ni ai paskan sa.

⁷ Baha mita yang dukira dîa mata sibrin lukaia ba âpu sa, bamna yang mita man puramra lâ mangkamna apia.

⁸ Yang mai walatna talia sa, man aisaram (nahmuna bîla nani walri ba):

⁹ “Yang na sunu bara pâtkas sni, saurka swakwanka sin âpu sna.

¹⁰ Sakuna Gâd mita plikisa diara kum dukiara daihra kwahkaia, bara sin ai waihla baku ai kulkaia.

¹¹ Mini nani ra sin kiwa nani mangkan sa bara mini lulkanka bani ba aihwaki kaikisa.”

¹² Sakuna baha sut ba lika bahki sa, Gâd sika upla nani wal kau tara ba.

¹³ ¿Dîa muni mawan kat param aisisma, dîa aisinkam nani ba mapara bîla kumi sin aisabia apia wisi?

¹⁴ Gâd lika natka ailal ra aisisa, sakuna yawan mita baha tânka briras sa.

¹⁵ Piua kum kum ra tihmia ra daukisa, yapan kumi ra, apia kaka, diara aihka kaikan ra upla nani sut yapi ba piua ra, yapan mita wan pura lui ba piua ra.

¹⁶ Gâd lika upla nani kiama nani kat aisisa, lawi dauki bara sibrin sin dingkisa,

¹⁷ wark saura nani ba swibia dukiara, praut lâka ba mapara kaina manis aihwaki kaia.

¹⁸ Baku lika raiti wina swaki sakisa, prura wina sin swaki sakisa.

¹⁹ Aima wala nani ra lika, Gâd siknis uplika nani ra yabisa wapni mangkaia dukiara, wîna aiska ra latwan saura nani yabi ba wal.

²⁰ Plun kau auhni pali nani ba sut, witin kaikan sin daukras.

²¹ Wîna tara ba tawa tawa mâyara iwi auya sa, ban sin sip sa dusa nani ba kaikaia.

²² Ai rayaka ba raiti un kat sa, prura durka nani pali kat sa.

²³ Ban kra witin ba lamara insal kum sa tausin nani bâra ba wina, witin ai tâwan aisaia kumi bâra sa, wapnika lâka bri ba dahra ba wibia.

²⁴ Witin ra umpira kaiki, Gâd ra wibia: “Prura wina swaki sâks, witin pura mana aibapaia ba sakri sa bamna.”

²⁵ Bara ai sikniska ba wina rawbia bara kli witin wahma kan ba baku wahma takbia.

²⁶ Gâd ra makabia, bara walan kabia; liliakira Gâd wal pana pana ai mawan kaikbia, bara upla nani ra Gâd latwanka lâka ba aiwanbia.

²⁷ Bara wibia: “Saura yâri, tanis lâka nani ba daukri, sakuna Gâd klala aikaia brin daukras kan.

²⁸ Ban sakuna, prura wina swaki ai sakan, bara nanara kat sin ai ingnika ba kaikaia sip sni.”

²⁹ Baku sika Gâd upla ra daukisa, aima kumi bara aima wala ra sin.

³⁰ Prura wina swaki sakisa, ban swin ingni ba kaikisa.

³¹ Bamna Job, yang ra aman ai wals, sâp bas yang aisisna piua ra.

³² Diara aisaia brisma kaka, nanara ai wis, man raitkam brisma kaka, liliakira raitkam maikaisna.

³³ Sakuna baku apia sa kaka, sâp ai wali bas. Bara yang mai smalkamna sinskira kaia.