Job 31 - DAWAN BÎLA AISKA

¹ Yang kupi wal lâ daukri, tiara nani ba kaiki brin ai daukras kaia, mairin tiara yakan nani ba ra brinka gridi lâka ra briaia.

² ¿Anira sa baha mana, Gâd karnika sut bri ba mita yabi ba, waitna bani ra laih kasbrika purara ba wina?

³ ¿Ban apia, watawikira bara saurakira nani wal ba dukia sa pât tara briaia ba?

⁴ Apia kaka, ¿dîa daukisna ba Gâd kaikras, bara mini lulkanka bani ba sin kaikras?

⁵ Swer takisna aima kum sin saura lukanka wal daukras, bara upla kum ra sin kunin baku munaia sin lukras kapri.

⁶ Gâd mita paun kasak ba ra ai mangki ai kaikbia, bara kaikbia yang pâtkas sna tânka ba.

⁷ Yabal wapni ba wina tnaya ra tawri sa kaka, brinka karna ba mita ban ai alki ai brih wan kaka, upla wala dukia ba, yang duki baku brisna kaka.

⁸ Dîa yang mangkri ba wina upla wala pibia, bara dîa mangkri ba wakia wal daikan kabia.

⁹ Mairin kum ra lihkisna kaka, apia kaka waitla lamara iwi ba mairka ra biki kaikri kaka,

¹⁰ yang mayi ba upla wala nani albika takbia, bara yarka upla sât wala nani witin wal yapbia.

¹¹ Baku kaka lika, yang daukanki ba uba saura sa, ba mita yamni kabia klala briaia.

¹² Sauhki tatikra pâta klauhanka kum baku kabia, dîa brisna ba sut sauhki tikan kabia.

¹³ Duki dadaukra nani dîa ai makabi kan ba, yang piua bani ai makabanka ba kat dauki katna.

¹⁴ ¿Nahki natka wala ra, yang sip kamna ki Gâd mawanra buaia? ¿Dîa aisamna ki witin diara ai makabi walbia ba ra?

¹⁵ Gâd kumi ba mita sika wan yapti biara ra paski wan mangkan, witin nani wal baku rayaka wankan sa.

¹⁶ Umpira diara luha uplika ra hilp munaia piua bani takaskras katna, aitani lukras katna piarka nani ba plun wahwi ai yua nani ba lui kabia.

¹⁷ Yu kumi sin yang yakan pati ba piras katni, sakuna rau nani aikuki yui piri.

¹⁸ Piua sut ra yang lika rau nani aisika baku aimaki katni, piua bani sin piarka nani hilpka aimaki katni.

¹⁹ Ani piua upla kumi kwala luha kan kaka, apia kaka umpira bla mita ai taya prakaia sin âpu kan kaka,

²⁰ yang sîpki pali taya ni yâri lapta bri kan, bara witin mita tingki ai luki kata.

²¹ Rau kumi ra sin tâ iki baku munras katna, wihta nani mita kulkanka lâka aiki ba ra wisi.

²² Naha na kasak apia sa kaka, paihpaya ba wina klaihkla nani ba daiwi kauhbia.

²³ Gâd klalka ba yang sîa yabi katni, witin king tara aimaki ba mawanra buaia ba sip apia pali sna.

²⁴ Aima kumi sin gul ba yang kasak lukanki pali baku briras katni, bara swakwaiki baku sin apia.

²⁵ Aima kumi sin yang aisinki ba yuyaka manis kuki briaia baku kulkras katna, apia kaka lalah manis saki briaia sin lukras kapri.

²⁶ Wan yu ba ingwi kan kaikri, bara kaikri kati ba sin impaki kan ai ingnika ba wal.

²⁷ Ban sakuna, aima kumi sin yukuwan ra mayunras katni, kiawalanka sin mihti ni alki blikras katni.

²⁸ Naha na yamni kabia klala briaia; baha kasbrika purara Gâdka ba bahki sakisa.

²⁹ Waihli mapara diara saura taki ba dukiara lilia takras sni, pât tara alkbia kra sin.

³⁰ Aima kumi sin witin mapara lahtuban bîla aisaras katni, prubia dukiara sin apia.

³¹ Yang wal takaski kan nani ba mita, upla sât wala ra kakaira apia ra, saura munaia lukan piua ra,

³² yang ban swiri tihmia yabal ra lalawras kata, piua bani ra waitla durka ba impapakra nani mapa ra param swiri sa.

³³ Upla wala nani dauki ba baku daukras katni, swakwanki nani ba yukukras katni, bara sin yukuki sin ban bri kan ai daukras kan.

³⁴ Upla nani sîa yu kumi sin yang durki praki sâp takras, waitla bîla uplika sîa sin apia.

³⁵ Aitani lukaina upla kumi ai wali kata, nini ulbanka ba ni karnika yabisna dîa aisari ba, bara nanara karnika uya bri ba pana ai wiaia ba, dusi kuhbanka nani ba wauhkataya ra ulbi daukbia.

³⁶ Mayunra lâka kira yang wal brih wamni, kraunki baku sin laila ra mangkamni.

³⁷ Gâd ra daihra kwahkanka nani sut ba wimni, sunu lâka ra witin ai mawanra wih buamna.

³⁸ Yang maipara tasbayi mita sin kasbrika purara winras sa, tasba baikanka bîla nani ba sin sari taki inras sa.

³⁹ Sakuna ban kra upla kum dukia kukanka wina implikri sa kaka, insla warkka uplika dukia taibi muni dakbri kaka,

⁴⁰ yang tasbayi ba plawar mâ pâwaia watlika ra, kiaya nani ni yarka pâwbia, twi saura ni sin pâwbia, barli mâ pâwaia watlika ra. Naha bîla nani wal Job ai aisinka ba prakisa.