Job 27 - DAWAN BÎLA AISKA

Job

¹ Bamna Job aisi kli naku win:

² ¡Gâd nina ra swer takisna, Gâd karnika sut bri ba mita, witin lâika kasak daukaia apia wisa, bara kupi wirha ni ai banhkan sa,

³ witin ba mita wingki puhbaia karnika ba aikbia,

⁴ kunin kumi sin aisamna apia, bara bîla bahki sin bîli wina sakamna apia!

⁵ Yang raya kamna yua sut ra, pâtkas sna ba ban kamna; ¡aitani kulkamna apia man nani daihra kwahki banhwisma ba!

⁶ Upla yamni sna bamna, yarka tilira dimbia apia, bamna maipara saura ai wiaia ba âpu sa.

⁷ Bamna ya ya sut waihli wisi aisi param ra takbia kaka, watawikira bara kasak apia uplika dîa ai mana briaia ba bribia.

⁸ ¿Upla saurakira ba dîa briaia bîla kaikisa ki, Gâd bui rayaka ba sâkbia piua ra?

⁹ Pât wal prawan piua ra, Gâd ai pura sunra ba walbia apia.

¹⁰ Bamna witin ai lilia sakras sa Gâd karnira ba mawanra, piua kumi sin witin nina mâki winbia apia.

¹¹ Gâd karnika ba mamrikaisna, Gâd bui dîa daukaia luki ba sin mamrikamna.

¹² Ban kra man nani baha pat kaikram sa kaka, ¿dîa muni diara bahki aisisma ki?

Sofar

¹³ Naha klalka sika Gâd karnika sut bri ba mita yabaia ba, baha lika upla kupias nani ra bara watawikira nani ra sin.

¹⁴ Ai luhpia nani ban ailal pali kabia sin, war ra prui banhwan kabia, apia kaka plun bla prubia.

¹⁵ Baha nani pruras kabia ba, siknis saura mita ikan kabia, bara ai piarkika nani sin ai pura mata inan kabia apia.

¹⁶ Upla watawikira ba silbar ba tasba baku paskbia sin, bara kwala ban ailal pali paski bri kabia sin,

¹⁷ upla yamni kumi baha kwalka nani ba bribia ai dukia baku, bara upla yamni mita baha silbarka ba brih ai lilia bribia.

¹⁸ Upla watawikira watla ba lika babaiwra baku sa, daiwan tnawira watla ba baku, upla umpira watla insla ra aihwaki kaikaia paskan baku kabia.

¹⁹ Yuyakira ba kau aima kumi aitnikbia, ningkara kli bubia ba ra diara kumi sin âpu kabia.

²⁰ Kakna ra sibrin tara ba balbia, bara tihmia ra pâsa saura mita brih wan kabia.

²¹ Lalma tani wina prari payaska krawan ba ra, ai watla ba wina daiki brih wan kabia.

²² Pâsa ba krawan kabia umpira kaikan luha ba wal, ban trai kaikbia nahki kat swakwaia.

²³ Bara pâsa ba mita ai nina blîkbia, bin tara bara warbanka wal.