Job 24 - DAWAN BÎLA AISKA

¹ ¿Dîa muni karnika sut bri ba, witin diara daukaia yua ba wan marikras sa, baku mika ai uplika nani mita tânka bribia?

² Upla watawikira nani ba ai nasla piarkika ba kitbi lakisa, sîp nani implikisa, ai sîpka nani ba kau ailal daukaia dukiara.

³ Rau nani bara piarka nani ba, ai daiwra nani lama wina kangbi sakisa.

⁴ Umpira nani ba yabal wina tnaya ra kangbi lakisa, bara upla bawikira nani ba yukuwaia sa.

⁵ Umpira nani ba, upla iwras tasbaya ra biriku wail baku, wark pali muni taki auya ai pata pliki, bara upla iwras tasbaya ba wina ai luhpia nani pata sakisa.

⁶ Upla wala nasla ra plawar wahbaia auya, apia kaka kli upla watawikira nani wainka nasla ra pliki auya.

⁷ Tihmia ba ai pura prakaia diara sin âpu, kauhla ba dukiara ai pura prakaia diara sin âpu.

⁸ Il nani wina lî auhi ba buskisa, yukuwaia brin dauki kan ba mita walpa nani maisa ra ni wih kiaubi alkisa.

⁹ Piarka nani bisiura ai luhpia aisubi sakan ba mihta dakbisa, umpira nani ra taibi munisa ai wîna sakahkaia dukia nani bri ba yabia wisi.

¹⁰ Umpira nani ba kwala âpu pali taukisa, plawar mâ bîk nani prahkisa, plun bla prubia ba kat.

¹¹ Akbaia walpaya ba kitbi sakisa batana sakaia wisi; wain mâ nani ba taibisa wain daukaia, baha tilara ban pruisa lî din bla.

¹² Baha nani pât wahwisa tawan wina laihura, ini kira ai tikluka ba sakisa, sakuna Gâd lika ai pura sunra ba walras sa.

¹³ Upla kum kum bâra sa ingni ba misbara kaikisa, ai yabalka nani sut ra baha wina tnaya ra tawisa.

¹⁴ Upla âikra ba, tihmia kau buisa umpira ba ikaia, bara tihmia iwuya taim, âimplikra takisa.

¹⁵ Marit lâka sasauhkra ba, mahka tihmia iwbia bîla kaikisa, ai mawan ba pain prakisa, bara lukisa: ‘‘Naku lika upla ai kaikras.’’

¹⁶ Âimplikra ba tihmia ra utla nani ra dimisa, kakna lika utla ra dimi ai durka prakisa; ingni ba witin nani waihla sa.

¹⁷ Yu ingnika ba witin nani mapa ra tihmia tara pali sa, kau yamni lukisa tihmia ra sibrinka ra.

Sofar

¹⁸ Upla watawikira ba lî mita raski brih wan sa, ai tasbaya ba lahtuban mununhtara sa, upla kumi sin ai wainka nasla ra wark takbia apia.

¹⁹ Mani piua laptika ba wal, lî klaswan ba slilwisa, bara saurakira ba raiti ra lap tiwisa.

²⁰ Ai yaptika pali sin ai âuya tikbia, liwa nani mita pin kabia, bara upla kumi sin witin dukiara ai kupia kraukbia apia, upla saura ba, dus kum klakan kauhi ba baku kabia.

²¹ Mairin luhpias nani ba bara piarka mairin nani mapara, piua bani saura pali kan; aima kumi sin tâ baikras kan.

²² Sakuna Gâd mita ai karnika ba ni upla karnakira nani ra batakisa, witin ai warkka dauki ba ra upla kumi sin swak takaia tânka âpu sa.

²³ Gâd mita ban swika raya iwi kabia pât sin âpu, sakuna ai mina lulkanka bani ba aihwaki kaiki kabia.

²⁴ Upla saurakira ba piua prahni lupia baman dukiara purara bukan sa, baha ningkara pat pali âpu takisa, srawi luisa twi daikan srawi ba baku, rais kiama lap tiwi ba baku.

²⁵ Naha na baku apia sa kaka, ¿ya sip sa kuninkira apia sna ai wiaia, bara tâinka pliki kaikaia, swakwanki ba sin?