Job 21 - DAWAN BÎLA AISKA

Job

^1-2 Bamna Job mita pana aisi, naku win: Maisa nihkra kau yamni man nani mita aikaia sma ba lika, yang bîli nani ba aman walma kaka.

³ Kupiam alki takaski bri bas yang aisisna ba piua ra, baha ningkara kikaia brin mai dauki kaka, sip kama kikaia.

⁴ Yang aiklabanki ba upla kum wal apia sa, baha mita kupia kumi lâka âpu sna.

⁵ Aman pali ai wali banhma kaka, sibrin mita bîlas takamna.

⁶ Yang pali mita baha dukiara lukuna ba ra, tâ iwan takisna; wîni tara ba ban tatatwisa.

⁷ ¿Dîa muni upla saura nani ba kau ban raya sa ki, bara almuk takisa ai karnika uya pali ba wal?

⁸ Ai luhpia nani bara ai mula nani sin pain pâwi ba kaikisa; ai tnaya ra pât âpu, lilia sa.

⁹ Ai watla nani bilara kupia kumi lâka bâra sa, bamna diara âpu sa sirang ikaia; Gâd mita klala yaras sa.

¹⁰ Ai bîpka nani ba pat pat luhpa baikisa, luhpia sirpi nani ba prui tiwras sa.

¹¹ Ai luhpia nani ba sîp lupia nani baku kirhbi bara puli banhwi kabia.

¹² Arp kangban binka wali, drum nani prukan, plut nani puhban binka wali, luhpia nani ba lilia pali srutwi pulisa.

¹³ Ai impakanka yua nani ra ai rayaka tnata ba alkisa, witin nani sâp pali raiti ra iwuya.

¹⁴ Gâd ra wisa: “Ban âuyapah wan swis, yang nani na man lâmka nani tânka briaia sin brin wan daukras sa.

¹⁵ ¿Gâd, karnika sut bri ba yamna sa, bara yang nani witin dukia daukamna? ¿Witin mawanra puri suni banhwamna kaka, dîa brimna ki?”

¹⁶ (Sakuna upla watawikira nani ba ai rayaka bri ba witin nani apia sika dawanka ba. ¡Witin nani wal baku lukaia ba, yang wina laihura sa!)

¹⁷ ¿Ahkia upla watawikira nani ingnika ba daswata ki? ¿Ahkia pât ra dimata ki? ¿Ahkia Gâd bui witin nani wal ai kupia sauhkan bara munan pât wahwata?

¹⁸ ¿Ahkia twi baku yakabrira daukata, pâsa ai karnika raski brih tauki ba baku?

¹⁹ Baku wisa Gâd bui papika nani saurka ba, luhpia nani ra ni kulkan sa, sakuna baha lika witin ai saurka pali, lawan tara wal munka aibapaia sa.

²⁰ Witin klala briaia sa, baha Gâd, karnira sut bri ba lawanka tara ra.

²¹ ¿Dîa lukbia ki ai watla uplika mapara diara takbia sin, pat witin ba pruan sa kaka?

²² ¿Sakuna ya mita Gâd ra lâ smalkbia ki, witin ra kasbrika purara iwi nani lâka dauki ba?

²³ Upla tila bâra sa, prura alkan bara wîna tara ba yamni sa, lilia bara lamni sa.

²⁴ Ai yuyaka nani ba sut yamni pali pâwisa, ai wîna tara ba sin.

²⁵ Ban sakuna, upla wala nani lika tahpla lâka ra iwisa, bara ban sin pruisa, lilia lâka ba dabi sin kaikras pali.

²⁶ Ban sakuna, raiti ra lika sut ba kumi sa, kumi ra bara wala ra sin liwa nani mita pîsa.

²⁷ Tânka brisna man nani, yang dukira dîa luki banhwisma ba, bara lukanka saura bri banhwisma ba sin.

²⁸ Makabi wali banhwisa: “¿Anira sa baha wihta saurakira watla ba?”

²⁹ ¿Impapakra uplika nani wal aisi banhras katma ki? ¿Wali banhras katma ki baha nani dîa aisin ba?

³⁰ Ani piua Gâd ai kupia sauhkuya ba ra ai lawanka ba blikisa, bara watawikira lika diara munras sa.

³¹ Upla kumi bui sin ai daukanka mawanra mangkras, dîa ai mana briaia kan ba yaras.

^32-33 Bamna mahka bikaia brih auya ba ra, upla nani asla witin wal aikuki auya sa, dakni kumi ba tâura auya, dakni wala ba ninara wapi auya, bara raiti ra lika sut ba mita aihwaki kaikisa, bara tasba ba witin mapa ra swapni baku sa.

³⁴ ¡Baha lika tanis lâka sa, man nani mita maisi nihkaia ba! ¡Dîa aisi ba sut lika kunin baman sa!