Job 15 - DAWAN BÎLA AISKA

Ai uplika nani kli aisin ba Elifaz

^1-2 Bamna Elifaz Temán wina ba pana witin ra win: Upla sinskira ba sturi taya baman aisaras, baku sin ai raitka brisa wisi puski pâsa baman takras.

³ Aisi ba aisaia baman mita aisaras, bara aisaia apia dukia ba sin aisaras sa.

⁴ Sakuna man lika Gâd ra mayunaia lâka ba âpu daukisma, diara kasak daukaia kan sin sauhki tikisma.

⁵ Lukankam saura brisma ba mita mai munan baku aisisma, bara mai munan kunin bîla nani aisisma.

⁶ Yang mita dahra kwahkamna kaka aitani apia sa, man bîlam aisaram pali ba mita pât ra mai lakisa.

⁷ ¿Man kainamra upla wala âpu kan lukisma ki, bara il nani ba sin âpu kan lukisma ki?

⁸ ¿Dîa man lukisma ki, man ba Gâd ra lâ tânka smasmalkrika sma? Apia kaka, ¿tasba ra man baman sinskira sma ki?

⁹ ¿Dîa man tânka brisma ki, yang nani ba sip tânka briras kaia? ¿Dîa dukia sika man mita kakaira sma bara yang nani lika sip kaikras sna ba?

¹⁰ Yang nani lika upla almuk nani, man aisikam ba wal kau diara tânka bri banhwisna.

¹¹ ¿Aitani apia sa ki, Gâd mita maisa nihki ba bara yang nani baha maisa nihkra bîla ni mai aisi banhwamna ba?

¹² ¿Dîa muni man kupiam lukra brinkam nani ba mita, mai bri auya bara namkra nani wina yaram pauta klauhisa?

¹³ ¿Dîa muni Gâd mapara buisma, bara twisam alki takaskras sturi aisisma?

¹⁴ Upla sunukira ba âpu sa, ai pâtka wina pri ba sin âpu sa.

¹⁵ Insal nani ra sin kasakkira kulkras sa, kasbrika pura bahara ba ra sin sunu kulkras sa.

¹⁶ ¡Kau pali upla saurakira ba ra bahki kulkan ba, lî di ba baku saurka lâka dauki ba!

¹⁷ Bamna ai wals, yang diara tânka brisna ba wina diara kum mai wiaisna,

¹⁸ upla sinskira nani mita sins lâka smalkan ba. Witin nani ai damika nani wina baha tânka ba brin,

¹⁹ witin nani ra sika tasba yan kan ba, bara baha nani tilara nisan sât wala nani âpu kan.

²⁰ Upla saura lâ sasauhkra nani rayaka ba lika kunhku sa, bara pât saura nani ni aibanhwan sa.

²¹ Ai kiama ra bin nani wali bara sirang iwisa kasak yukuwan sa luki, bara âimplikra nani mita bal dukia nani implikisa.

²² Tihmu wina yukuwi swak takaia bîla kaikanka tânka lika âpu sa, ¡skiru kum ai bîla kaikisa ikaia!

²³ Ai wîna tara ba usus nani pata kabia, witin kasak ai tânka brisa witin ra sauhki tikanka lâka ba tnata âpu ba.

²⁴ Tihmia tara mita sibrin lâka ni banhkan kabia, kupia sari lâka, trabil saura mita kutbi prak alkbia, king kum war aiklabaia ra bal aiklabi ba baku.

²⁵ Gâd mapara ai mihta buki uplika nani mapara baku takisa, ya ai kupia lukras kira Gâd karnakira ba mapara buisa kaka.

²⁶ Ani uplika ai kaina kahbaika ni ai kaina kahbi, Gâd mapara ai kupia baiki dimi auya sa.

²⁷ Ai mawan bara ai tnaya mina nani ba sut lika batana ni yukan sa.

²⁸ Ani tawanka nani ra wih iwbia ba, sut sauhki tikan kabia; utla nani ba bîla baman swin kabia, bara slingbi tikan dukia nani ba, ailal pali bahara paski swin kabia.

²⁹ Ban piua yari yuyakira kabia apia, ai yuyaka nani ba ban tasba aiska ra taki wabia apia.

³⁰ Tihmia ba wina sip swak takbia apia, inta wahia kumi urhwi takaia kan pauta mita angki ba baku, ai tangnika nani ba pâsa mita dakbi ba baku sin.

³¹ Taniskira baku ai kuninka ra kasak lukisa kaka, kunin munan mana ba witin ai dukia kabia.

³² Ai piua kainara ai tnawa nani ba srawan kabia, bara kli sin rawan kabia apia.

³³ Wain kiwka kumi baku ai mâ pawras ba, batana dusa kumi ai tangnika nani kauhi ba baku sa.

³⁴ Upla watawikira nani ai kiamka nani bribia apia, bara ai watla nani ba upla dukia dakbi brin nani dukia ni auhbi banhkan ba, pauta ra sin angkan kabia.

³⁵ Witin nani saurka lâka ni kwihra tiwan, bara pât saura ni aisubi sakan ai mâ saki ba lika, kunin lâka baman sa.