Job 13 - DAWAN BÎLA AISKA

¹ Naha diara nani sut na yang naikra pali ni kaikri, bara kiaima pali ni sin walri.

² Man nani tânka brisma ba, yang mita sin tânka brisna; diara kumi ra sin, yang na man nani wal kau mâyara apia sna.

³ Sakuna kau yamni lukisna Gâd wal aisaia kau yamni sa, Gâd karnika sut bri ba wal blahwi aisaia.

⁴ Diara kasak ba, man nani kuninkam lâka ni pura prakisma; man nani ba upla rarakra nani, sakuna upla kumi sin kau rakras.

⁵ ¡Man nani wiria pan aisaras sâp takma kaka, man nani sins lâka brisma mai kulkbia!

⁶ Mamkabisna man nani naha na aman pali wals, yang dîa aisaia brisna ba aisamna piua ra.

⁷ ¿Man nani lukisma ki, kuninkam aisi banhwisma ba kuninka ba mita Gâd tâwan aisisma? ¿Man nani kunin aisisma ba kuninka ba ni Gâd dukia daukisma?

⁸ Man nani lukankam ba pura praki aisisma, ¿dîa briaia mai dauki ba tâwan aisisma?

⁹ Ban sakuna, Gâd mita tânkam pliki kaikbia kaka, ¿dîa man nani ra takbia ni? ¿Sip kama ki upla ra kunin muni baku man nani bui Gâd ra kunin munaia?

¹⁰ Ban kra witin yukuwi dauki natka ra ai tânka pura prakbia kaka, sakuna Gâd mita karna pali lawi daukbia.

¹¹ Gâd tara ai tânka ba mita witin nani ba sibrin dingkbia bara sibrin tara iwbia.

¹² Man nani blahwankam almuk nani ba, karnika âpu tasba lâwan puknika baku sa; slaubla ni tawan kutbanka paskan ba, kutbanka ra yukuwaia pliki ba baku sma.

¹³ Bamna nanara, ¡bîlam praki banhs, yang aisaisna, bara dîa maipara takaia kaka sin takbia si!

¹⁴ Yang rayaki na pât mihta ra mangkaisna; rayaki na mihti bilara alki briaisna.

¹⁵ Ban kra witin bui ai ikbia sin, ban sakuna wapni kaia sna, witin mawan kat bûi raitki brisna ba aisaia sna.

¹⁶ Ban kra bahara swaki ai sakan lâka ba bâra sa, kan saurakira kum ba sip ai mawanra dimi wabia apia sika.

¹⁷ Bamna man nani aman pali wali banhs, nanara dîa pali aisaisna ba.

¹⁸ Yang raitki ba dukiara param aisaisna, daira walisna raitki ba bâra sa.

¹⁹ Upla kum diara kum maipara brisa kaka daihra sakaia, yang ban sâp kamna bara pruamna.

²⁰ Ay Gâd, diara wâl baman aik, bara yang lika man mamwan wina yukuwi kamna apia.

²¹ Kli klala aikpara, bara sirang manis ai ikpara.

²² Ai wins bara yang pana mai aisamna; apia kaka, ai swis yang pas man ra aisamna, bara man mita pana yang ra ai aisama.

²³ Yang dîa saura daukri nani ba bara swakwanki nani ba sin mairiks.

²⁴ ¿Dîa muni yang wina yukuwisma? ¿Dîa muni waihlam kum baku ai kulkisma ki?

²⁵ Yang na dus wahia kum pâsa mita wauhi ba baku sna; ¿dîa muni âpu ai daukaisma? Yang na twi lâwan kum baku sna, ¿dîa muni nini bliki rau ai sauhkaisma ki?

²⁶ Daihra kwahkanka tahpla pali maipara brih aulma sa; wahma kapri piua ra swakwanki nani daukri kan ba tânka makabi walisma.

²⁷ Sîn ni mini nani ba wilkisma, mini lulkanka nani bani ba aihwaki kaikisma, mini taibanka nani ba sin kulki kaikisma.

²⁸ Diara sukwan baku yang na ban âpu taki auna sa, kwala yula mita pi âpu dauki ba baku.