Jirimaya 40 - DAWAN BÎLA AISKAJirimaya ba Guedalías wal takaskan 1 Dawan Jirimaya ra aisin, aihwawakra nani kamandantika Nebuzaradán Ramá ra witin ba pri sakan ba ningkara. Jerusalem, Juda wina uplika nani Ramá ra bâra kan ba, Babilon ra brih waia, bara Jirimaya sin baha nani tilara priskan bâra kan Nebuzaradán witin wal prawan. 2 Bara kamandanti ba Jirimaya ba brih wan witin wal man taki aisaia, bara witin win: “Dawan Gâdkam naha tasbaya purara pât saura blikaia aisin, 3 bara nanara witin aisin ba baku takan. Naha naku man nani ra takan na, man nani bui Dawan mapara saura daukram witin ai bîla wali daukras kapram ba tâka mita. 4 Bamna kaiks, mihtam silak ni priskan na nanara mahka lanhkuna. Yang wal Babilon ra waia want sma kaka, kaisa; yang main mai kaikamna. Sakuna yang wal waia want apia sma kaka, nâra bas. Tasba aiska man briaia nâra sa: man anira kau yamni kaikisma ba bâra was. 5 Kli tawi waia brin mai daukisa kaka, Guedalías ra tawi was, Ahicam luhpia waitna Safán mulika ba watla ra, Babilon kingka ba mita witin ba Juda tawanka nani wihtka tara mangkan sa, witin watla ra takaski bas, uplikam nani tilara sin. Was anira kanra man ra yamni kabia lukisma ba ra.” Bara kamandanti ba Jirimaya ra prisantka kum yan, plun nani sin, bara lakula dauki swih wan. 6 Jirimaya Guedalías wal Mispá ra wan, witin ai watla ra iwan upla nani Juda ra kau takaskan nani ba tilara. Guedalías mapara buan ba (2 Ki 25.23-24) 7 Judia kamandantika nani suldiarka nani daknika ba aiklabaia watla ra bâra kan, witin nani sturi walan Babilon kingka ba mita Guedalías, Ahicam luhpia waitna ba wihta tara mangkan Babilon ra brih waras nani kan ba: waitna, mairin nani, tuktan nani ba sut Judia tasbaya ra pura kaikaia; 8 bara witin nani ai uplika nani aikuki Mispá ra wan Guedalías kaikaia. Witin nani ai tilara bâra kan: Ismael Netanías luhpia waitna ba; Johanán, Janatan Caréah luhpia waitna nani; Seraías Tanhúmet luhpia waitna ba; Efai Netofá wina luhpia waitna nani ba; Jezanías Maacat wina waitnika luhpia ba bara waitna wala nani sin witin nani aikuki kan ba. 9 Guedalías swer taki witin nani ra sturi kasak ba aisin: “Man nani Caldea uplika nani ra bawaia si briaia apia sma. Man nani kuntrika ra bas, bara Babilon kingka lâka ra iwi bas, bara diara sut man nani ra yamni kabia. 10 Yang Mispá ra nâra kamna, Caldea uplika nani balbia bara man nani kainam kaiki kamna. Man nani lika wark taks wain, dus mâ, batana laya nani apahkaia, bara baku man nani naha tawanka nani briram na ra iwi kama.” 11 Bara Ju wala nani Moab, Amón, Edom tawan wala nani ra bâra kan ba sin sturi ba walan, Babilon kingka ba aitani win, witin nani sin ai tasbaya ra takaskaia, bara Guedalías ba wihta tara mangkan, witin nani pura kaiki kaia. 12 Bara Juda wina plapi plis wala ra wan uplika nani ba kli tawi balan Mispá ra, bara Guedalías ra wan aisaia. Bara witin nani sin wain, dus mâ nani ailal pali pakan. Ismael ba Guedalías mapara buan 13 Caréah luhpia waitna Johanán, kamandanti wala nani ba sin baha aiklaklabra nani watla nani ra bâra kan daknika ba, witin nani sin Mispá ra wan, Guedalías wal aisaia, 14 bara baha nani ra wi banhwan: —¿Man tânka briras sma ki king Baalís Amón wina ba Ismael Netanías luhpia waitna ba blikan, man mai ikaia? Sakuna witin nani aisin ba Guedalías kasak lukras kan. 15 Bara Johanán Guedalías wal tnaya ra tawi yukuwi witin ra aisin: —Aik yang wih Ismael ikamna. Bara upla kumi sin tânka bribia apia ya daukan sapa. ¿Dîa muni yang nani na sâp kaia bara witin bal man mai ikaia? Baku takbia kaka Ju nani sut bal man wal asla takan ba kli plapi kum kum takbia, baha ba Juda wina upla nani kau bâra ba mapara slingwanka takbia. 16 Sakuna Guedalías pana witin ra win: —¡Baku daukpara! Ismael baku daukaia sa wisma ba baha kunin. |
© 2010 Bible Society in Nicaragua
Bible Society in Nicaragua