Jirimaya 37 - DAWAN BÎLA AISKA

Sedequías bui Jirimaya ra sturi rait ba makabi walan

¹ Nabucodonosor, Babilon kingka ba mita, Sedequías, Josías luhpia waitna ba Juda kingka baku mangkan, Jeconías, Joaquim luhpia waitna ba watlika ra.

² Sakuna Sedequías, wihta nani ba, tawan uplika nani sin sut, Dawan ai bîla blikan Jirimaya aisin ba kulkras kan.

³ King Sedequías mita Jucal, Selemías luhpia waitna ba blikan, wala prîs Sofonías Maaseías luhpia waitna ba sin Jirimaya ra wiaia: “Yang nani tâiwan Dawan wan Gâdka ra puram suns.”

⁴ Jirimaya ba kau silak ra mangkras kan ba mita upla tila tauki kaia sip kan.

⁵ King fero aiklaklabra daknika ba Idsip wina takan ba ra, Caldea uplika nani Jerusalem mapara aiklabi kan ba baku walan, bara witin baha wina taki mahka wan.

⁶ Bara Dawan ai prapitka Jirimaya ra aisin, Sedequías ra wiaia,

⁷ witin mita upla nani blikan ba: “Juda kingka ra wis, witin baha nani ra win yang ra makabi walbia, king fero uplika aiklaklabra nani Idsip wina takan ba bal witin ra hilp munaia sapa, sakuna baha nani kli Idsip ra tawi wan.

⁸ Sakuna Caldea wina nani ba kli tawi balbia Jerusalem tawanka mapara aiklabaia, tawan ba bribia bara angkbia.

⁹ Yang, Dawan, man nani ra mai wisna: Man nani lukpara Caldea uplika nani ba mahka wan; baha baku apia sa.

¹⁰ Man nani Caldea uplika nani ba mapara aiklabi aiklaklabra nani ba sut ikma sin, sakuna insauhkan aiklaklabra nani watla ra bâra ba, baha nani ba bal tawanka na angkbia.”

Jirimaya ba silak watla ra mangkan sa

¹¹ Caldea uplika aiklaklabra nani ba Jerusalem wina takan witin nani walan, Idsip uplika nani aiklabaia aula win ba ra,

¹² Jirimaya sin Jerusalem wina Benjamín tasbaya ra wan, bahara tasba yabi kan ba tilara witin ai tasbaya sin bâra kan ba briaia.

¹³ Sakuna witin Benjamín Getka ba kat wan ba ra, waitna kum nina Irías, Selemías luhpia waitna Hananías mulika, aihwawakra nani wihtka ba bal, witin ra takaskan, bara win: —¡Caldea uplika nani plapan watlika ra man waia sma!

¹⁴ Jirimaya pana win: —¡Man aisisma ba baku apia, yang Caldea uplika nani wal waras! Sakuna witin aisi ba Irías walras kan, ban wihta tara nani ra brih wan.

¹⁵ Bara baha nani Jirimaya ra kasak lawan, blikan bri si wipaia bara silak watla ra mangkaia Janatan sturi âiulbra ba watla ra, baha watla ba silak watla kan.

¹⁶ Piua wihka Jirimaya tasba unta sialaka watla ra kan.

¹⁷ Bara king Sedequías ai bîla blikan Jirimaya ba saki king watla ra brih wabia, bara witin nani Jirimaya ba king mawanra brih wan; bara yukuwan ra king ba witin ra makabi walan: —¿Dawan wina bîla blikan kum bâra sa ki? Jirimaya pana win: —Âu, naku ai bîla blikan sa: King ba Babilon kingka mihta ra mangkan kabia wisa.

¹⁸ Bara baha sinskira, Jirimaya sin king Sedequías ra makabi walan: —¿Yang dîa lâ krikanka kum king mapara daukri ki, apia kra wihta tara nani mapara, tawan uplika nani mapara kra sin, bara baha tâwan yang ra silak watla ra ai mangkan na?

¹⁹ ¿Anira sa baha dahra aisasarika nani, witin nani bîla kasak aisisa Babilon kingka bal aiklabia apia, upla nani mapara naha kuntrika mapara sin apia wisi aisi kata ba?

²⁰ King, nanara yang bui man ra mamkabisna na dauki aik: Man adar yapara kli Janatan sturi âiulbra ba watla ra ai brih waia, kan yang bahara pruamna.

²¹ Bara king Sedequías win Jirimaya ba king dimi watla latka ra aihwawakra bâra ba ra swibia, bara yabal ra brit angki ba wina yu bani brit kum bri si yabi kabia. Witin nani win baku dauki kabia yabal ra brit nani angki ba piua ra. Bara baku Jirimaya king watla latka ra bâra kan.