Jirimaya 34 - DAWAN BÎLA AISKA

King Sedequías ra bîla blikan ba

¹ Nabucodonosor, Babilon kingka kan ba piua ra, aiklaklabra nani witin bri kan ba, bara nisan wala nani ai kingka lâka ra kan ba aiklaklabrika nani ba sin sut asla brin, bara Jerusalem mapara aiklabi kan, tawan nani baha lamara ba mapara sin, baha piua Dawan Jirimaya ra aisin, bara win:

² “Yang, Dawan, Israel Gâdka, adar maikisni man Sedequías Juda kingka ra waia bara wiaia: ‘Dawan naku aisisa: Yang daukaisna Babilon kingka bal tawankam ba brih pauta ni angkbia.

³ Bara man sip swak takma apia, ai mihta ra kauhma; witin nani mai alkbia Nabucodonosor ra mai brih waia, witin ai mawanra mai brih wabia ba ningkara, witin nani Babilon ra mai brih wabia.

⁴ Sakuna baha sut tilara, Sedequías, Juda kingka, naha wals, yang, Dawan, yang mai wisna: Sord malika ni mai ikbia apia.

⁵ Man pri lâka ra âmyapah pruma, kîa pain nani sin man puramra angkbia, damikam nani nanara king aimaki kan pruan purara angki kan ba baku, bara witin nani sin man puram mata ini aisabia: ¡Alai, dawan! Yang, Dawan, kasak aisisna, bara yang bîli maikisni.’ ”

⁶ Prapit Jirimaya naha bîla nani na sut Sedequías, Jerusalem kingka ra win.

⁷ Baha aisi kan ba taim Babilon kingka ba pat bal Jerusalem, Laquis, Azecá, baha nani baman Juda tawanka nani tilara karna kata ba mapara aiklabi kan.

Alba nani ba pri sakaia wisi kunin munan

⁸ Dawan Jirimaya ra aisin, Sedequías Jerusalem uplika nani sut aikuki, alba nani ba pri sakaia wisi aisin ba ningkara.

⁹ Lâ ba bapan kan Ju nani ai tilara alba waitna nani bara alba mairin nani bri ba pri lâka ba yaia, upla kumi sin Ju ai tahkia ba ai albika bri kaia apia.

¹⁰ Wihta nani upla nani sut baha lâka daukan ba aitani kulkan, bara ai albika nani ba sut pri swin, kli ai albika nani ra ai warkka takbia wiras kan.

¹¹ Sakuna ningkara witin nani kli ai kupia lakan baha nani pri swin ba, bara baha nani ra kli priski munan witin nani ai albika takaia.

¹² Baha ningkara Dawan Jirimaya ra aisin, bara win:

¹³ “Yang, Dawan, Israel Gâdka, man nani damikam nani Idsip wina sakri taim witin nani wal lâ kum daukri, bahara witin nani alba warkka dauki kan. Witin nani ra wîri

¹⁴ Ju atkan kum ai dawanka albika 6 mani takuya bara 7 mani alkaia manka ba pri swiaia sa. Sakuna damikam nani lâika ba kulkras bîli wali daukras kan.

¹⁵ Nanara man nani lukankam ba wala lukram, yang yamni kaikisna ba man lukram, tahkia alba nani ba pri swiaia. Bara yang tempelki ra dimi man nani aisi walkam aikuki pramis takram baku daukaia.

¹⁶ Sakuna baha ningkara man nani kli kupiam lakram, bara nini ra aisaram ba tuski dauki alba nani pri swiram ba kli priski munram man nani warkkam takaia.

¹⁷ Baku bamna, yang Dawan sna ba, naku wisni: Man nani ba yang bîli wali daukras, Ju tahkia alba nani ba pri swiras sma; baha ba mita, yang sin war ba pri swiaia sna, siknis nani ba, plun wahwaia ba sin man nani ra balbia king lâka tasbaya aiska ra sibrin tara kabia man nani ra. Yang, Dawan, kasak aisisna.

^18-19 Wihta nani Juda ra, Jerusalem ra, witin watla ra nani ra dukia dadaukra nani, prîs nani ba tawan uplika nani sin yang ra bal aisi lâ kum daukan: bîp wainhka kum iki lilak baiki yabal tnaya bani ra wîna ba swin, bara baha lilak wapi lui witin nani lâ daukan. Sakuna witin nani lâ daukan ba pramis takan ba naika sut krikan.

²⁰ Baha mita yang daukamna prura kat ai waihla kaia ba mihta ra kauhbia, bara wîna ba daiwan tnawira daiwan wail nani wîna papira nani ba pata takbia.

²¹ Yang sin daukamna, Babilon kingka aiklaklabra nani sin nanara sâp takan ba, baha nani prura kat ai waihla kaia ba mihta ra kauhaia Sedequías Juda kingka ba wihta tara nani ba sin.

²² Witin nani ba blikaisna naha tawanka na mapara bal aiklabaia, tawanka na bribia bara pauta ni angkbia. Juda tawanka wala nani ba sin upla iwras tasbaya daukamna. Yang, Dawan, baha kasak aisisna.”