Jirimaya 10 - DAWAN BÎLA AISKA

Gâd bahki nani ba wihki Gâd pali ba wal

¹ Israel luhpia nani, Dawan bui man nani ra mai smalki na wals.

² Dawan ba aisisa: “Nisan wala nani daukanka natka ba nina blîkpara, kasbrika ra sain nani taki ba kaiki sirang iwpara, baha nisanka nani ba kaiki sirang iwi ba baku.

³ Baha uplika nani mayuni gâdka ba bahki pali sa. Dus nani pâwi ba tila wina dus kum klakisa; bara dus wina diara papaskra ba bal lilka kum karbi paskisa,

⁴ baha ningkara silbar bara gul ni lalaubisa, bara wal praki silak brih amar ni sabi yan alkisa kahbia apia dukiara.

⁵ Aidulka nani ba rayapisa nasla ra daiwan tnawira nani kangbaika paski ba baku paskisa; sip aisaras, witin nani mita twilki bri taukisa, sip wapras. Baha nani sîa bripara, baha nani upla kumi ra sin saura munras, yamnika sin yaras.”

⁶ Dawan, man wal baku upla wala âpu sa: man sika karnika tara pali brisma, ninam ba tara pali kulkisa, karnika tara pali brisma.

⁷ Nisan nani sut kingka man, ¿ya man ra sibrin lukras kabia? Man ra sibrin lukaia kulkanka ba sika man briaia sma ba. Tasba ra sinskira nani king nani ba sut tilara, man baku wala kum âpu sa.

⁸ Witin nani sut ba sinskas baman sa, sins bri uplika nani apia sa. ¡Dus pîs kum ba wina witin nani ra smalkaia diara âpu sa!

⁹ Aidulka nani silbarka ba Tarsis wina bri balan, gulka nani ba sin Ufaz wina bri balan; diara lilka karbi slilki dauki paski uplika nani paskan ba bara kwala balianta pauni ni prâka sipisa, baha sut ba âuya mâira diara paski uplika nani ba paskan.

¹⁰ Dawan sika Gâd pali ba, Gâd ai rayaka bri ba, king ban ba. Witin ai kupia baiki ba ra tasba nikwisa; ai kupia baiwi ba mapara nisan nani sip bapi buras.

¹¹ (Man nani, Israel luhpia nani, idan nani ra wis: “Kasbrika pura ba bara naha tasba na sin paskras gâdka nani ba lap tiwbia; baha nani kumi sin kasbrika munhtara nâra kabia apia.”)

Gâd ra mayunaia lawana

¹² Dawan, ai karnika ni tasba paskan; ai sinska lâka ni tasba aiska karnika bapan; sins bri ba lâka ni kasbrika pura aiska ba paskan.

¹³ Alwani bîla baikra ni lî auhaia binka ba kasbrika purara daukisa, tasba paskanka ba wina kasbrika nani ba sunisa, lî auhi ba tilara yan imyula lipisa, pâsa watla wina sakan pâsa ba krawisa.

¹⁴ Upla sut ba sinskas baha tânka nani ba briaia brin daukras sa. Aidul nani ba mita baha papaskra nani ba ra kunin munisa: baha nani rayaka âpu kunin wan muni ba lilka nani sika;

¹⁵ baha dukia nani ba diara bahki, lawaska kikaia dukia, Dawan lâ dauki kabia bara sauhki tikbia.

¹⁶ ¡Jekob Gâdka diara sut bâra ba Papaskra sa, witin sât aihka ba! Witin mita Israel ba ai uplika nani kaia bâk sakan. Ai nina ba mâkan sa: Karnika sut bri Dawanka ba.

Prapit ba nisan nani wal aisin ba

¹⁷ —Nisan, man mai kutban bamna, dukiam nani ba kuki bris.

¹⁸ Kan Dawan naku aisisa: ‘Naha kuntrika uplika nani na naha wina laihura yakabaisna. Witin nani ra karna takaisna, bara kaikamna baku witin nani ai pliki ai sâkbia sa sapa.’

¹⁹ —¡Saura pali sna, pat ai slingban nâra sna! ¡Insauhkan nani brisna ba sip rawras! ¡Yang lukri naha latwanka wahwaia sip sna!

²⁰ Yang tintki ba slingban sa, kiwa nani ba sut dakban sa. Luhpi nani ai lulki ai swin, ¡witin nani bâra âpu sa! Ya mita kli tintki ba bukaia âpu sa, kwala twakni ba sin ya mita kli pamaia ba kaikras.

²¹ —Naha tawanka ra sepad nani ba sinskas atia sa; witin nani Dawan ra plikras. Baha tâka mita sika witin nani kauhan ba bara daknika ba yakawi tanis man tauki banhwisa.

²² ¡Damra wals! ¡Maisa pakanka kum blikan aula! Laih yahbra tani wina bin tara kum aula Juda tawanka tara nani ba upla iwras tasbaya, yul talia nani watla daukaia.

²³ Dawan, yang kasak daira walisna upla rayaka ba witin mita Dawanka apia sa, ai kanra ai rayaka ra dîa takaia ba alki takaskaia karnika âpu sa.

²⁴ Dawan, man kasakkam tânka ba kat yang nani wapniki ai dauks, sakuna man lawankam tara ba ni lika apia, baku lika yang nani sut âpu ai tiki lukma.

²⁵ Man lawankam ba nisan wala nani purara laiks, witin nani mai kakaira apia ba, man ra mamyunras uplika nani ba purara, witin nani sika Jekob kiamka nani kata ba sut langki pin, sut pali sauhki tikan, bara kuntri ba sut sauhki swin.