Jasua 8 - DAWAN BÎLA AISKA

Israel luhpia nani mita Ai tawanka ba dakbi brin

¹ Dawan ba Jasua ra aisi, win: “Nanara, man si bripara, lukankam sin swapni takbiara. Suldiarkam nani ba bris, bara mahka taki was, Ai tawanka ba mapara aiklabaia waia. Kingka ba, tawanka uplika nani ba sut pura luaia karnika ba yang maikuna bamna. Witin nani, Ai tawanka ba, ai tasbaya nani ba sut man nani brima,

² bara man bui Ai tawanka kingka ba ra, Jeriko tawanka kingka ra sin daukan ba baku man dauks, sakuna naha taim lika Ai ra pura luma ba ra, diara nani ba, daiwan nani ba sut man nani dukiam kabia. Bamna ridi taks tawanka nina tani bâk dimi kutbi alkaia.”

³ Bamna Jasua buan bara ai suldiar nani aikuki ridi takan Ai mapara aiklabaia dukiara. Suldiarka aiklaklabra kau pain nani ba 30,000 wahbi sakan, bara baha nani ba tihmia ra blikan wan,

⁴ sakuna witin nani ra win naku daukaia: “Man nani pain wals: Tawan nina tani bâk was, bara bahara yukuwi aiklabaia baman ridi aihwaki kaiki bas.

⁵ Upla wala nani ba yang wal tawanka ba lamara wabia, bara tawan bîla ba wina upla nani yang nani wal aiklabaia bal takbia ba ra, witin nani sîa yang nani plapamna, bisi pat plapan ba baku.

⁶ Yang nani tawan ba wina plapamna bara witin nani nini blîkbia, bara lukbia yang nani ra witin nani sirang ai ikan plapisna.

⁷ Bara baha taim man nani yukuwaikam ba wina bal taki, tawan ba bilara dimi alki bris, kan Dawan man nani Gâdkam bui tâm baikbia bara uplika nani ba mihtam ra mangkuya.

⁸ Dawan Gâd wina adar maikan ba baku, tawanka bilara dimma ba ra mahka angks. Baha lika adar kum sa.”

⁹ Jasua adar yaban ba baku witin nani mahka taki wan, Betel bara Ai wal lilara bara Ai muna tani ra yukuwi banhwan. Jasua lika ai kiampka ra tihmia lalawan.

¹⁰ Yu wala titan pali Jasua buan, ai uplika nani ba sut kulki kaikan. Bara witin bal tâura tâ aimaki, Israel almukka nani ba sin ai ninara brih taki wan Ai mapara aiklabaia.

¹¹ Waitna nani sut witin wal wan, tawan ra dimaia lamara yahbra tani ra. Bara bahara takaski ai kiamka bapan, il bîla tnaya kum ra. Witin nani bâra kan, tnaya wala ba ra, Ai tawan ba bâra kan.

¹² Jasua sin waitna nani 5,000 baha muna Betel wihki Ai wal bilka ra wih bâra yukuwi kabia win.

¹³ Baku bamna war aiklaklabra nani ba dakni wâl dauki bri kan, daknika kum ba tawan muna tani ra kiamp dauki bâra kan, bara wala ba Jordan yahbra tani ra ai kiampka dauki takaskan, sakuna tihmia iwan ba ra, Jasua ai uplika nani ba aikuki il bîla ba kat kau lamara dimi wan.

¹⁴ Israel luhpia nani il bîla ra dîa dauki kan ba Ai kingka ba kaikan. Bara witin sin mahka buan, war aiklaklabra nani ba aikuki ridi takan Israel luhpia nani ba mapara aiklabaia waia Jordan ilka bîla ba kat. Sakuna witin nani ai dara walras kan, Israel luhpia nani dakni wala kum pat tawan ba nina tani ra yukuki bâra kan.

¹⁵ Jasua ai uplika nani ba aikuki, Ai uplika nani ra kunin munan, upla iwras tasbaya yabalka ra plapan.

¹⁶ Bara Ai suldiarka nani ba sut adar yaban, baha nani plapuya ba nina blikaia. Witin nani baha nani nina bliki wan tâka, Ai tawanka lama wina laihura taki wan.

¹⁷ Ai wina, Betel wina, upla sut pali ba Israel luhpia nani plapan ba nina bliki wan, bara tawan ba main kaiki kaia upla kumi sin âpu kan.

¹⁸ Bara Dawan Jasua ra win: “Nanara tawan ba mihtam ra mangkuna, bamna sain ba yas, witin nani mahka wih dimi sauhkbia.” Bara Jasua sain ba yaban, witin nani mahka Ai tawanka ba dimi sauhkaia.

¹⁹ Bara baha nani yukuwi kata ba isti pali bal taki, tawan ba ra plapi diman bara mahka tawan ba angkan.

²⁰ Ai uplika nani ai ninara tawi kaikan ba ra Ai tawanka kiasmika ba kasbrika pura kat uli kan. Baha mita kutbi bri kan, plapi swakwaia yabalka kumi sin âpu kan. Jasua daknika witin nani sîa plapata ba baha nani sin kli ai ninara tawi balan, witin nani Ai mapara aiklabaia.

²¹ Baha nani kaikan Ai daknika wala yukuwi kata ba tawan ba pat dimi brin, pauta ni angki kan, bara witin nani sin mahka Ai uplika nani ba ikan.

²² Bara baha nani dimi tawan dakbi brin nani ba, tawan wina taki balan, bara Ai uplika nani ba ai waihla daknika wâl ba lila kat aimakan, bara Israel luhpia nani ba mita witin nani ra iki âpu daukan.

²³ Ai kingka ba baman lika ikras kan, ban raya alki Jasua ra brih wan.

²⁴ Witin nani twi ra Ai uplika nani sut sord ni ikan ba ningkara, kli tawan ra wan bara upla wala nani kau raya kan ba sin sut ikan.

²⁵ Baha yua Ai uplika nani, waitna mairin sut ba ra 12,000 pruan.

²⁶ Jasua baha yua aiklabaia adarka yabi kan ba, takaskras ban yabi kan baha yua aiska ba, upla nani ba sut iki âpu daukan ba kat.

²⁷ Bara Dawan adarka win ba kat daukan, daiwan nani, diara wala nani tawan bilara kau bâra kan ba, baha sut lika Israel luhpia nani brin,

²⁸ bara Jasua bui Ai tawanka ba aiska angki sauhkan, naiwa kat sauhkan ba ban sa.

²⁹ Witin sin adar yaban Ai kingka ba dus purara pami langki swiaia tutni kat. Yu diman ra witin kli adar yaban bara witin nani wan bara wîna tara ba saki tawan getka lamara bri balan, bara witin nani walpa tara nani bri sal wîna tara ba purara paski biki swin. Baha walpaya pura paskanka ba naiwa kat ban bâra sa.

Ebal ilka ra Jasua lâ ba aisi kaikisa

³⁰ Ebal ilka ra, Jasua bui Dawan altarka kum paskan, Israel Gâdka altarka,

³¹ Moses, Dawan napakanka, Israel luhpia nani ra baha altarka nahki paskaia win ba kat, bara witin sin baha lâka ba ai wauhkataya ra ulbi swin kan ba lâka kat daukan: “Altar paskaia walpaya ba witin nani tâ warhika nani ba klaki dakbras, ban baku altar ba paskan.” Bara Israel luhpia nani baha purara daiwan nani angki bara Dawan wal kli wan uplika takaia sakripaiska nani sin dauki ai pura sunan.

³² Altarka walpaya ba tnaya ra sin, Jasua Israel luhpia nani mawanra, Moses win ba lâka nani ulban.

³³ Moses sin pat win kata, upla nani ba Dawan lamara bal bubia ai yamnika ba briaia, bamna upla nani ba sut pali Israel luhpia nani kan ba, tringsar nani Israel luhpia apia kan ba, upla almuk nani, wihta tara nani, wihta nani sut, prîs nani, Libait nani Dawan lâka auhbaia watla twilki kan ba mawanra bal buan. Israel luhpia nani ba Dawan yamnika briaia dakni ra buan, daknika kum ba Guerizim ilka tani ra buan, daknika wala ba Ebal ilka tani ra buan, baku daukaia Moses mita pat win kan, bamna witin nani baku daukan.

³⁴ Baha ningkara Jasua lâ wauhkataya ba bîla kumi bani ba aisi kaiki kan upla nani ba walaia, yamni munanka bîla nani bara lahtubanka bîla nani ba sut.

³⁵ Moses lâka bîla nani win ba sut pali aisi kaikan, kumi sin aisi kaikras swiras kan, Israel luhpia nani sut, mairin nani, tuktan nani, tringsar nani witin nani ai tilara iwi kan ba, sut pali wali kan witin aisi kaiki kan ba.