Jasua 23 - DAWAN BÎLA AISKA

Jasua upla ra aisisa

¹ Dawan mita piua ailal luan ra Israel luhpia nani ra yan ai waihla nani wal kupia kumi kaia, Jasua sin pat almuk kan ba ra,

² Jasua ra bara Israel luhpia nani sut paiwan, ai almukka nani wal, wihta nani, lâ dadaukra nani bara wihta wala nani ba sin paiwan, bara witin nani ra win: “Yang pat almuk sni, piui nani sin lui wan.

³ Man nani kaikram, Dawan dîa naha uplika nani ai mapara daukan ba. Bamna witin sika, man nani tâmwan aiklaban ba.

⁴ Yang naha tasbaya nani sut lat lulki kaiki, kiamka nani tilara yuri. Baha tasbaya nani aiklabi pat pura luan nani ba baman, apia sakuna kau aiklabi pura luaia bri tasbaya nani ba sin, Jordan awala lalma wina Mediterráneo kabuka muna ba kat.

⁵ Dawan ba baha tasbaya ra iwi nani ba kangbi saki, bara man nani ra maikbia, dîa Dawan ai Gâdka pramis mai win ba kat.

⁶ “Aiska daukaia muns, Moses ai lâ wauhkataya ra aisi ba sut. Baha wina kitwi takpara aihkikam ra bara smihkam ra sin.

⁷ Aiblakpara upla wala nani man nani tilamra nâra iwi nani ba wal, baha nani gâdka ra mayunpara, baha nani bîla wali sin daukpara. Baha nani gâdka nina sin mâkpara, gâdka bahki ba nina mâki sin aisapara, swer sin takpara.

⁸ Yua bani Dawan Gâdkam nina bliki bas kainara baku, naiwa yua kat daukisma ba baku.

⁹ Dawan lika man nani mamwan wina tawan tara bara karnakira nani ba sut sakan, bara naiwa yua kat upla nani sip man nani mampara buras.

¹⁰ Man nani tilam wina upla kumi bui 1,000 nani sip kan yaka plapaia, kan Dawan Gad man nani tâmwan aiklaban, witin dîa pramis mai munan baku.

¹¹ Bamna man nani pali aman damra wals, bara Dawan Gâdkam ra latwan kaiks.

^12-13 Kan brin ai daukisa man nani naha na kaiki kama: Gâd lâka ba swima, bara naha uplika nani tilamra iwi na wal aiblakma kaka, ban sin wal marit takma kaka kum wala wal, Dawan Gâd naha uplika nani kangbi sakan kabia apia man nani mamwan wina. Sakuna man nani mampara daiwan alkaika tân ba baku kabia, man nani bahara kauhma bara pamhpaya ra klala wipanka baku kabia, kiaya baku sin namkra ra, Dawan Gâd naha tasbaya painkira maikan na kumi sin man nani bri kama apia.

¹⁴ “Yang lika mahka pruaisna, sakuna yang kau pruras sna ba ra brinki sa man nani kaikma, kupiam aiska bara sulkam aiska wal, Dawan pramis painkira man nani ra mai win ba, aiska aimakan, ai pramis kumi sin âpu sa daukras ba.

¹⁵ Baku sika Dawan pramiska painkira daukan ba sut aimakan, baku sin witin bui man nani puramra trabil sâtka bani ba bri balbia, naha tasbaya painkira maikan na kumi sin man nani brima apia.

¹⁶ Dawan man nani wal ai lâka daukan ba daukras sma kaka, gâd bahki wala nani ra mayunma kaka, bara baha nani sin bawma kaka, Dawan ba man nani wal ai kupia sauhkbia, bara pat pali naha tasbaya wina diki mai sâkbia, tasba pain pali maikan sa sakuna.”