Jasua 19 - DAWAN BÎLA AISKA

Simian kiamka ra tasba yan ba

¹ Tasbaya pîska wala ba lat lulkan, bara Simian masraka kiamka nani ra yan. Naha tasbaya piarkika ba Juda kiamka nani tasbaya bilara kata,

² bara tawanka nani ba Beerseba, Sebá, Moladá,

³ Hasar-sual, Balá, Ésem,

⁴ Eltolad, Betul, Hormá,

⁵ Siclag, Bet-marcabot, Hasar-susá,

⁶ Bet-lebaot bara Saruhén, tawanka tara bara sirpi sut ba ra 13 kan.

⁷ Ba purkara En-rimón, Éter bara Asán tawanka nani sin brin, ai tawanka sirpi nani kira,

⁸ ba wina kau purkara tawan sirpi nani Baalat-beer kat ba, baha sika Ramat tawanka tara, Négueb ra. Naha tasbaya nani sika Simian masraka kiamka nani ai tasbaya brin, upla kulki kaikanka ba kat.

⁹ Simian kiamka nani tasbaya ba lika Juda tasbaya bilara kata, kan naha kiamka nani ba tasba kau ailal brin, bara Juda tasbaya kan ba wina pîs kum Simian uplika nani ra yan.

Zabulón kiamka nani tasbaya

¹⁰ Tasbaya yumhpika ba lat lulkan ningkara, Zabulón masraka kiamka ra yan. Piarkika ba Sarid kat drawi kan,

¹¹ ba wina muna tani ra tawi ban Maralá kat alki muni, ningkara Dabéset kat tawi, Jocneam mawanra tingni bâra ba kat wih takaskisa.

¹² Sarid wina, lalma tani piarkika, Quislot-tabor kat wata, bâk lui Daberat kat wan, bara Jafía ra uli wata.

¹³ Ba wina lalma tani piarkika Gat-héfer bâk wata, Itá-casín bâk lui wata, Rimón bara Neá bâk kir tawan.

¹⁴ Yahbra tani piarkika ba, Hanatón bâk kir tawisa, bara Jefté-el langnika ra wisa.

¹⁵ Naha tasbaya piarkika ra tawan tara nani 14 bâra kan, tawan sirpi nani sin lamara bâra kan, baha nani tilara: Catat, Nahalal, Simrón, Idalá, bara Betlehem.

¹⁶ Naha tasbaya nani sika Zabulón kiamka nani ai tawanka brin, bara tawanka sirpi nani kan ba sin.

Isacar kiamka tasbaya piarkika ba

¹⁷ Tasbaya piarkika walhwal ba lat lulkan bara Isacar masraka nani ra bal takan, ai kiamka nani kulki kaikanka ba kat.

¹⁸ Ai tasbaya ba tilara naha tawanka nani dingki kata: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Ebes,

²¹ Rémet, En-ganim, En-hadá bara Bet-pasés.

²² Tasbaya baila wala ba Tabor, Sahasimá bara Bet-semes kat wi kata, bara Jordan awala ra tnata alki kan; tasba bani, tawan tara bara sirpi nani sut asla prakan ba ra 16 tawan kan.

²³ Naha tasbaya sika lat lulkan, Isacar kiamka nani ra tawan, tawan tara bara sirpi nani sut ba.

Aser kiamka tasbaya piarkika ba

²⁴ Lat lulkanka matsipka ba Aser masraka kiamka ra bal takan, upla kulki kaikanka ba kat.

²⁵ Tawanka tara nani asla prakan ba naha nani kan: Helcat, Halí, Beten, Acsaf,

²⁶ Alamélec, Amad bara Misael, baku bamna muna tani bâk Carmelo ilka kat sa, ba wina Sihor-libnat kat.

²⁷ Lalma piarkika baila wala ba wan sa, Bet-dagón yahbrika kat. Ba wina Zabulón tasbaya bâk kangbi, Jefté-el langnika kat wisa, Bet-émec, Neiel ba, kau ban Cabul kat wisa,

²⁸ baku ba ra Abdón wal prakan, Rehob, Hamón bara Caná kat, ban Sidón tawanka tara pali ba kat.

²⁹ Ba wina Ramá bâk kir tawisa, bara tawan tara nani karnakira daukan ba, Tiro ra, ban Hosá tani wata, Mediterráneo kabuka bâk. Mahaleb, Aczib,

³⁰ Umá, Afec bara Rehob kat asla prakan ba wal tawan tara bara sirpi lamara iwi nani ba sut 22 kan.

³¹ Naha tawanka nani sika Aser kiamka nani ra yaban, upla bâra ba kulkanka kat.

Neftalí kiamka tasbaya ba

³² Lat lulki saki tasbaya matlalkahbi pura kumika ba, Neftalí masraka kiamka ra bal takan. Bara witin nani ra yan, upla kulki kaikanka ba kat.

³³ Ai tasbaya ba Hélef, Elón-saananim, Adamí-néqueb bara Jabneel wina, Lacum kat, ba wina Jordan kat wisa.

³⁴ Muna bâk tasbaya piarkika Aznot-tabor bâk lui wata, bara ningkara Hucoc bâk, bara baku bamna waupasa tani ba Zabulón tasbaya wal ai lama kan, bara muna tani bâk lika Aser tasbaya wal. Lalma tani ra lika, Neftalí kiamka tasbaya ba, Jordan awala kat wan sa.

³⁵ Tawan nani karnakira paskan ai dukia brin ba naha nani sa: Sidim, Ser, Hamat, Racat, Quinéret,

³⁶ Adamá, Ramá, Hasor,

³⁷ Quedes, Edrei, En-hasor,

³⁸ Irón, Migdal-el, Horem, Bet-anat bara Bet-semes. Sut asla ba ra tawan tara 19 kan, tawan sirpi nani lamara iwi kan nani sut sin.

³⁹ Naha sika tasba nani, tawan tara bara sirpi nani Neftalí kiamka nani ra kulki kaiki yan ba.

Dan kiamka tasbaya ba

⁴⁰ Tasbaya 7 ba Dan kiamka ra lat ba kauhan.

⁴¹ Naha tasbaya ra kan ba Sora, Estaol, Ir-semes,

⁴² Saalbim, Aialón, Jetlá,

⁴³ Elón, Timnat, Ecrón,

⁴⁴ Eltequé, Guibetón, Baalat,

⁴⁵ Jehúd, Béne-berac, Gat-rimón,

⁴⁶ Mejarcón bara Racón, Jope mawanra tasba bâra ba wal.

⁴⁷ Naha tasbaya nani sip alkras kan bamna, Dan kiamka nani ba Lésem tawanka ra wan aiklabi pura luaia, bara dakbi brih ki upla nani bâra kan ba sut ikan. Bara witin nani baha tawanka ra iwan, bara tawanka nina ba Dan mâkan, ai damika ra kulkanka yaia dukiara.

⁴⁸ Naha tasbaya sika, tawan tara bara sirpi nani ba sut kira Dan kiamka brin ba.

Jasua tasbaya ba

⁴⁹ Israel kiamka nani bui kiamka kumi bani briaia kan tasbaya ba yui tnata alkan ningkara, Jasua ra sin ai tasbaya pîska yan, wala nani ra yan kan ba baku.

⁵⁰ Dawan dîa witin nani ra win kan ba baku, Timnat-sérah tawanka tara ba yan, baha lika Efraín tasbaya ilkira, baha sika Jasua mita makaban. Bara Jasua tawan tara paski bahara iwan.

⁵¹ Naha tasbaya sut na sika prîs Eleazar, Jasua bara tawan wihtka tara nani bui Israel kiamka aikuki, lat lulkan Dawan mawanra, Dawan wal prawaia tintka dimaika ra, Siló ra. Bara baku tasba yuanka ba aitani kat takan.