Jasua 18 - DAWAN BÎLA AISKA

Kiamka wala tasbaya nani ba

¹ Israel luhpia nani sut ba Siló ra asla takan, bamna bahara bapan Dawan wal aisaia tintka watla ba. Baha piua kat tasba lika ailal pura lui brin kan,

² ban sakuna Israel kiamka dakni 7 ba kau tasbaya yaras kan.

³ Bamna Jasua bui Israel luhpia nani ra win: “¿Dîa bîla kaikisma kau tasbayam briras, Dawan Gâdkam bui damikam nani ra yan ba?

⁴ Kiamka bani wina waitna yumhpa sâks, bara blikamni tasba ba kir wapi kaikaia bara yang ra bal ai wibia, nahki natka ra tasba ba sir muni briaia sip sa.

⁵ Naha waitnika nani bui tasba ba baikanka 7 ra baiki sâkbia yuaia dukiara, Juda ra lika waupasa tani ra ai tasbaya nani ba swibia, bara Josep kiamka ba lika yahbra tasbaya ba ban bri kabia.

⁶ Tasbaya ba baikanka 7 daukma ningkara, bal tânka nani ai wis, bara lat lulki yabamna Dawan wan Gâdka ba mawanra.

⁷ Libait nani ra tasba yaras kabia, kan witin nani lika prîs Dawan dukia daukaia lâka baman. Gad bara Ruben kiamka nani ra lika, bara Manasés kiamka bakriki ba, ai tasbaya nani pat brin Jordan lalma tani ra, baha sika Dawan napakanka Moses mita yan.”

⁸ Baha waitna nani tasbaya kir ba laki tânka kaikaia kan ba ridi takan mahka waia, bara Jasua mita adar yan: ‘‘Man nani was, tasbaya ba kir laki kaiks, bara tnata alkma ba ra kli tawi bal, bara yang nâra lat lulkamni Siló ra, Dawan mawanra.’’

⁹ Baha waitna nani wan bara tasbaya ba kir wapi tawan. Tawanka nani ba dakni 7 baikan, kumi bani ulbanka yan. Ningkara kli Siló kiampka ra tawi wan, Jasua bâra kan ba kat.

¹⁰ Bamna Jasua tasbaya ba baiki saki Israel luhpia nani ra yuan Siló ra, Dawan mawanra lat lulki.

Benjamín kiamka nani tasbaya

¹¹ Lat lulki kaikan ba ra, Benjamín masraka kiamka nani ra Juda bara Josep tasbaya nani tilara tasba yan.

¹² Naha tasbaya piarkika ba tâ kriki kan, lalma tani ra, Jordan awalka ra, bara Jeriko yahbra kat wi kata, bara ban il unta biara bâk muna tani ra drawi, Bet-avén upla iwras tasbaya ba kat wi kata.

¹³ Baha wina Luz tani ra wi kata (wibia kaka, Betel) waupasa tani ra, bara Atarot-adar kat iwi balata, Bet-horón waupasa tani ilka kata munhta kat;

¹⁴ ningkara piarkika ba tawi kan Mediterráneo kabuka waupasa bâk lui, Bet-horón ilka mawan ba kat, ban Quiriat-baal kat, nina wala ba Quiriat-jearim mâki kan ba, baha ba Juda kiamka dukia kan. Baha sika muna tani piarkika.

¹⁵ Waupasa piarkika ba tâ kriki kata Quiriat-jearim tasbaya tâ kum wina, muna tani ra ban wih, Neftóah laya kârma kat wisa.

¹⁶ Baha wina tâ wala auya ba, Ben-hinom untika mawanra, Refaim langnika yahbra tani kat. Ningkara Hinom langnika kat iwi kan, Jebús albangka waupasa bâk lui muni, bara ban En-roguel laya aubi ba kat wi kata.

¹⁷ Ba wina yahbra bâk lui wih En-semes ra takisa, baha wina Guelilot kat wan, baha lika Adumim albangkika mawanra, bara mâya bâk Bohan Ben-rubén Walpaya kat wisa;

¹⁸ ningkara albangkika yahbra bâk lui wata, Jordan ilka bîla mawanra, bara Jordan kat iwi

¹⁹ Bet-hoglá yahbra bâk lui wata, Kabu Pruan yahbra tani bâk wih takaskaia, Jordan awala plapi tnata alki ba kat. Naha sika waupasa piarkika ba.

²⁰ Jordan awala lika lalma piarkika kata. Naha nani sika tasba piarkika Benjamín masraka kiamka ra yuan, upla kulki kaikanka ba kat.

²¹ Benjamín kiamka ra tawanka nani yaban ba lika, tani kumi ra, naha nani sa: Jeriko, Bet-hoglá, Émec-quesís,

²² Bet-arabá, Semaraim, Betel,

²³ Avim, Pará, Ofrá,

²⁴ Quefar-haamoní, Ofní bara Gueba, wibia kaka tawan tara 12 ai tawanka sirpi nani ba wal.

²⁵ Ba purara Gabaón, Ramá, Beerot,

²⁶ Mispá, Quefirá, Mosá,

²⁷ Réquem, Irpeel, Taralá,

²⁸ Selá, Élef, Jebús (wiaia kaka, Jerusalem), Guibeá bara Quiriat, wibia kaka tawan tara 14 ai tawanka sirpi nani ba wal. Naha tasbaya sika Benjamín masraka kiamka ra yan, uplika kulki kaikan tânka ba kat.