Jasua 14 - DAWAN BÎLA AISKA

Jasua bui Kenan tasbaya ba yuisa

¹ Naha sika Kenan tasbaya nani Israel luhpia nani ai tasbaya baku brin ba, prîs Eleazar ra yan ba baku, Jasua ra bara Israel masraka nani lalka nani ba.

² Baku bamna tasbaya nani ba lat lulki kaiki yui yaban, kiamka nani 9 ba tilara. Bara kiamka wala nani tila Jordan baila wala muna tani ra iwi nani ba tilara sin, Dawan mita Moses ra adar yaban daukbia win ba baku daukan.

³ Pat kainara Moses mita tasba ba witin nani ra yan kan, Jordan baila wala ra Ruben bara Gad kiamka nani ra, bara Manasés kiamka bakriki ra, sakuna Libait nani ra lika tasba yaras.

⁴ Josep kiamka nani wina wâl asla takan, Manasés bara Efraín, sakuna Libait nani lika tasba pîska kumi sin briras, ban sakuna tawan tara iwaia pliska pain brin bîp bara sîp nani sahwaia dukiara.

⁵ Baku bamna, Dawan dîa Moses ra win baku, Israel luhpia nani ra tasba ba yuan.

Caleb tasbaya ba

⁶ Juda kiamka nani ba Guilgal ra Jasua wal aisaia wan, bara Caleb Jefuné luhpia, quenezita ba, Jasua ra win: “Kupiam krauki bas Dawan ai napakan Moses ra win ba Cadés-barnea ra, man bara yang wal wan dukiara.

⁷ Yang mani 40 bri katni, Moses Cadés-barnea wina tasba ba sâbi kaikaia ai blikan, bara kli tawi balri bara sturi kasak ba aisari.

⁸ Yang wal wan upla nani ba mita uplika nani yan sirang iwan, sakuna yang ban kasakki lukanka lâka ba wal Gâdki bara Dawanki ra briri.

⁹ Bara Moses swer ai munan: ‘Man tasba ba minam taima bani ba, man bara kiamkam dukia kabia, kan man kasak kapram yang Gâdki bara Dawanki ra.’

¹⁰ Pat mani nani 45 luan sa Dawan bui Moses ra win ba wina, baha piua ra sika Israel luhpia nani upla iwras tasbaya ra watauki kata ba, baku bamna ai pramis ba kat raya ai brisa. Nanara pat 85 mani brisni,

¹¹ sakuna kau karnika manis brisna baha yua Moses ai blikata ba baku tasba ba tânka pliki kaikaia, bara sip sni ban kau watauki bara aiklabaia.

¹² Baha mita mamkabisna, nanara aikma tasba il pîska tara nani ba, Dawan pramis ai munan ba kat. Man kaikisma Anac kiamka tara nani ba baha piua wina bahara iwisa, bara tawan tara nani ba brisa, karnika tara sin. Sakuna yang daira walisna Dawan bui yang ra tâi baiki hilp ai munbia baha wina kangbi sakaia, Dawan dîa ai win ba kat.”

¹³ Bara Jasua bui Caleb ra yamni munan, bara Hebrón yan ai tasbaya kaia, ai taya nani ra sin.

¹⁴ Baku sika Hebrón ba Caleb brin, ai taya nani sin, naiwa yua kat kau Caleb ban kasak sa, ai Dawanka ra bara Israel Gâdka ra kulkisa.

¹⁵ Patitara Hebrón nina almuk ba Quiriat-arbá mâki kata, kan Arbá ba waitna tara kulki kan, Anac kiamka ba wina. Bara baha daukan ba wina, baha tasbaya ra ai kupia kumi iwi banhwi kan.