Jasua 13 - DAWAN BÎLA AISKA

Kau aiklabi pura luaia kan tasbaya ba

¹ Jasua ba pat almuk takan, bara Dawan bui witin ra win: “Man mankam ba pat almuk takisa, bara man kau tasba manis pura luaia brisma.

² Kau pura luras sma ba filisteo nani bara Guesur uplika nani ra,

³ baha sika Sihor awala wina auya ba, Idsip lalma ra, Ecrón piarkika kat baha yahbra tani ra, baha lika Kena uplika nani tasbaya kulkisa, bahara wihta nani matsip bâra sa, baha nani sika Gaza, Asdod, Ascalón, Gat bara Ecrón wihtka nani. Aveo nani tasbaya pîska nani sin takaskan

⁴ waupasa tani ra, bara Kenan uplika nani tasbaya sut, Sidón uplika nani kuntrika tawanka tara nani ba wina Afec kat, baha ba amorreo nani tasbaya pîska sa.

⁵ Purkara guiblita nani tasbaya takaskan ba, Líbano lalma tani sin, Baal-gad, Hermón ilka playa kat, ban Hamat dimaika kat.

⁶ Sidón uplika nani ba Israel luhpia nani mihta ra mangkaisna, il biara ra iwi nani ba, Líbano wina Misrefot-maim kat. Man lika tasbaya ba sir munma, Israel luhpia nani anira iwaia ba, dîa yang mai wisna ba kat daukma.

⁷ Bamna nanara, man lika tasbaya ban yui kiamka 9 ra yas, Manasés kiamka bakriki ra sin yas.”

Manasés, Ruben bara Gad tasbaya nani ba

⁸ Ruben bara Gad kiamka nani ba bara Manasés kiamka bakriki Moses mita yan Jordan lalma tani tasbaya ba.

⁹ Witin nani ra yan, Aroer wina Arnón awalka un kat, bara tawan tara il bîla langnika ba, Medebá twiya sut ban Dibón kat,

¹⁰ Sihón tawanka tara nani ba sin, baha wal praki amorreo nani kingka Hesbón ra ba, bara Amán uplika nani tasbaya piarkika ba kat.

¹¹ Bamna Galaad bara Guesur uplika nani bara Maacat uplika nani tasbaya ba sin, Hermón ilka ba bara Basán tasbaya aiska Salcá kat,

¹² baha tilara Og tasbaya nani, witin lika Basán kingka, witin ba Astarot bara Edrei ra king aimaki kan ba, bara refaíta nani tila wina lâs kata ba, baha nani ra Moses mita pura lui bara tawanka wina kangbi sakan kata ba.

¹³ Guesur bara Maacá uplika nani lika tawanka wina kangbi sakras Israel luhpia nani mita, sakuna Israel luhpia nani ai tilara ban yan iwisa naiwa kat.

¹⁴ Moses mita Libai kiamka ra tasba yaras, kan naha dukiara Dawan ra ai prisantka angkaia kulki ba lâka kat, Israel Gâdka witin mita wisata ba baku.

¹⁵ Moses tasba yuan Ruben kiamka ra upla bâra kan ba praiska kat,

¹⁶ bamna baku tasbaya tara takan Aroer wina Arnón awala un kat, bara tawan tara twi langnika lilapas kat ba, bara Medebá twiya aiska bâk,

¹⁷ Hesbón tawanka tara nani baha langnika bâra ba kat: Dibón, Bamot-baal, Bet-baal-meón,

¹⁸ Jahas, Cademot, Mefáat,

¹⁹ Quiriataim, Sibmá, Séret-sáhar, baha lika ilka langnika ra ba,

²⁰ Bet-peor, Bet-jesimot bara Pisgá ilka bîla langnika nani ba,

²¹ wibia kaka, tawan tara twiya langnika ba, Sihón ra ai kingka lâka bri kata, witinka lika amorreo nani kingka Hesbón wina. Moses bui sauhki tikan Sihón ra bara Madián ra wihtka tara nani dukia dauki kata ba: Eví, Réquem, Sur, Hur bara Reba.

²² Baha purkara, Israel luhpia nani Balaam ra Beor luhpia, upla mangki kaiki diara brih bawi kata ba sin ikan, upla wala ailal sin.

²³ Ruben kiamka iwi kata wina yan upla nahki iwi kan ba praiska kat, tawanka tara sirpi nani sut ra, ban Jordan awala un kat.

²⁴ Baku sin Gad kiamka nani ra Moses bui tasba ba yuan, upla nahki iwi kan ba praiska kat.

²⁵ Jazer ba yan bara tawan tara nani Galaad tawanka nani sut, Amón uplika nani tasbaya bakriki Aroer tawanka tara ba, baha lika Rabá mawanra ba,

²⁶ bara Hesbón wina Ramat-mispé bara Betonim kat, bara Mahanaim wina Debir piarkika kat.

²⁷ Langnika ra brin ba, Bet-aram, Bet-nimrá, Sucot bara Safón, naha nani baman Sihón kingka lâka wina takaskan, witin lika Hesbón kingka ba. Baku bamna, ai tasbaya ba Jordan lalma wina Quinéret lakun muna baila wala kat kan.

²⁸ Naha tasbaya tawanka sirpi nani ba sika Gad kiamka nani ra yan, nahki upla bri kan ba praiska kat.

²⁹ Baku sin Manasés kiamka nani bakriki ra Moses tasba yan, ai uplika kulkanka bri ba prais kat.

³⁰ Kanra Basán kingka Og dukia nani kan ba witin nani brin, wibia kaka Basán aiska Mahanaim wina, 60 tawan nani Jaír dukia kan ba aikuki,

³¹ Galaad bakriki, bara Astarot wihki Edrei tawanka nani. Naha nani sut Maquir kiamka bakriki ra yaban kata, witinka Manasés luhpia ba, ai uplika nani kulkan bri ba praiska kat.

³² Naha tasbaya nani sika Moses mita yan ai tasbaya kaia Moab langnika ba, Jordan awala lalma ra, Jeriko mawanra.

³³ Sakuna Libai kiamka nani ra lika tasba yaras kan ai dukia kaia, sakuna witin nani ra win: “Israel Dawan Gâd ba prapatikam sa.”