Isikiel 6 - DAWAN BÎLA AISKA

Isikiel aidul nani mapara aisisa

¹ Dawan bîla yang ra balan bara naku ai win:

² “Israel ilka nani ra tawi kaiks, bara baha nani ra yang nini ra aisas,

³ naku natka ra: ‘Pain wals, Israel ilka nani, dîa Dawan aisi ba, il purara nani ra, awala nani ra, il plahpia nani ra sin; yang daukaisna man nani puramra war tara balaia, bara sauhki tikbia plis purara nani idan priaska watla nani ba.

⁴ Altarkam nani ba pîs ra baman daukamni man nani sakripais daukisma pliska ba, bahara kîa yamni angkisma ba. Daukamni uplikam nani ba prui banhbia aidulkam nani mawanra.

⁵ Bara Israel luhpia pruan nani ba, ai aidulka nani mawan kat lulkamni, bara dusa nani ba altarka nani kir yakabi lakamna.

⁶ Man nani iwram pliska nani sut ra tawan nani ba sauhkan kabia, idan nani ai pura suni altarka nani ba slingban kabia, altarka nani ba sut pali aiska slingban kabia, aidulka nani ba sin yuya sirpi man daukbia; baha altarka nani ra kîa pain nani angki ba batakan kabia; man nani diara nani paskram ba sut tiwan kabia.

⁷ Bara pruan nani ba man nani tilamra ailal pali kauhan kabia; bara damra wals yang sika Dawan sna ba.

⁸ Sakuna yang daukamna man nani kum kum lika baha nani tila wina raya kaia, sakuna mai yakaban kaia nisan nani tilara.

⁹ Baha nisanka nani tilara pruras swak takbia nani ba, yang ra ai kupia kraukbia; yang nahki witin nani ba yabri pât wahwaia ba ai kupia kraukbia, witin nani ba yang wal wapni apia bara tnaya ra tawan, aidul nani ra mayunan bamna. Watawika lâka nani daukan ba lukbia bara aikaban daukbia, diara saura nani kaikan wan daukras kan daukan bamna.

¹⁰ Bara witin nani ai dara walbia yang sika Dawan sna; saura nani ba man nani ra blikaia pramis mai munri ba, baha yang bahki aisaras.’ ”

¹¹ Dawan bui ai win: “Man mihtam pruki minam tingbi ins; wini ins Israel watawika lâka saura daukan latwanka ba mita, war, plun wahwan bara siknis nani tâka witin prubia.

¹² Ya laihura nani ba siknis wal prubia, ya pruras lamara ba sord malka ra prubia, ya takaskbia ba, plun wahwan wal prubia. Baku bal aimakbia kupi baiwanka ba.

¹³ Aidul nani ba tilara altarka nani kaina kir bara kiuhsi nani purara, il nani purara, dus sangni pâwi nani munhtara, usupum dusa dista bri nani ba munhtara, witin nani diara kîa pain nani angki ai aidulka nani ra yabi ba pliska nani ba ra, upla pruan nani bâra kabia ba kaikbia, bara man nani wima yang sika Dawan.

¹⁴ Bara yang mihti sakbamni witin nani mapara klala yabaia, upla iwi tasbaya nani ba waupasa tani wina Riblá yahbra tani kat, kuntrika ba upla iwras tasbaya sibrin wan daukaia tasbaya daukamni. Bâra mika tânka bri banhbia yang sika Dawan sna ba.”