Isikiel 48 - DAWAN BÎLA AISKA

Kuntri ba kiamka nani ra baiki sakan ba

^1-7 “Naha uplika nani nina ulban na wina sika kiamka nani ba takan. “Yahbra tani ra piarkika wina, baha Mediterráneo wina auya ba, Hetlón bâk lui, Hamat bara Hasar-enán dimaika bâk, Damaskus bara Hamat tasbaya waupasa tani bâk, kiamka bani tasba pîs kum bribia, lalma piarkika wina muna kat, naku natka ra: Dan Aser Neftalí Manasés Efraín Ruben Juda.

⁸ “Baha ningkara mahka pali balbia tasba briaia ba kulki kaikbia, lalma wina muna kat. Tasbaya bîla yahpika ba 12 kilumita pura hap bri kabia, bara yarika ba lika tasba wala nani lalma wina muna kat yarika kulkan baku kulkbia. Baha lilapas ra tempel ba bâra kabia.

Tasba piarkika kum bâk sakan ba Dawan dukia

⁹ “Dawan dukiara bâk sakan ba, baha tasbaya bilara yahpika bri kabia 10 kilumita pura hap yarika ba, bara bîla yahpika ba lika 10 kilumita.

¹⁰ Naha tasbaya bâk sakan ba bâra kabia prîs nani tasbaya baman; yahbra bara waupasa tani ra yahpika kabia ba 12 kilumita pura hap, bara lalma bara muna tani ra 5 kilumita. Lila pali ra Dawan tempelka ba bâra kabia.

¹¹ Baha Sadoc kiamka nani prîs nani Dawan lamara takaskan nani ba tasbaya. Dawan warkka ba witin nani baman dauki kan, Israel luhpia nani Libait nani Dawan yabalka swin ba nani blikras.

¹² Baha mita, Dawan dukiara pîs kum bâk sakan ba wina, Libait nani tasbaya lamara, prîs nani ba tasba kum bribia, baha pîska ba kau holikira kabia.

¹³ Prîs tasbaya lamara, Libait nani ai dukia bribia, baha yarika ba 12 kilumita pura hap, bara bîla yahpika ba lika 5 kilumita. Dawan dukiara bâk sakan ba yahpika kabia asla sut ba 12 kilumita pura hap yarika ba, bara bîla yahpika ba lika 10 kilumita.

¹⁴ Naha tasbaya ba kau yamni sa kuntri na bilara. Baha tasbaya kum sin sip atkras, apia kaka diara mana yabaia, apia kaka upla wala mihta ra yabaia sin apia, kan Dawan dukiara bâk sakan bamna.

¹⁵ “Tasbaya wala kau ba, 12 kilumita pura hap yarika, bara 2 kilumita pura hap bîla yahpika ba, Dawan lahma apia sa. Bahara upla sip kabia iwaia bara bahara bîp piaia twiya bâra kabia. Baha lilara tawan ba bâra kabia,

¹⁶ baha ba lika skwir kabia 2,250 yar.

¹⁷ Tawan kir twi nani bâra kabia, baha ba 140 yar tani walhwal ra.

¹⁸ Tawanka tnaya ra kau tasba kum kum takaskan ba Dawan tasbaya ba tnaya ra, baha yahpika ba 5 kilumita yarika lalma tani ba, bara muna tani ra ba sim yahpika ba baku sa. Baha insla tasbaya ra daukbia, bara mâ nani takbia ba tawan ra wark taki uplika nani ra baha wina pata yabia.

¹⁹ Tawan ra wark taki nani ba, ani ani kiamka Israel ra ba wina kabia sin, bahara baha tasbaya ra insla daukbia.

²⁰ Baku tasba aihka sakan ba, Dawan dukiara bara tawan dukia, baha ba tnaya bani 12 kilumita pura hap skwir kabia.

Gabamint tâ brabrira tasbaika ba

^21-22 “Gabamint tâ brabrira ba dukia kabia baha tasbaya takaskan ba, Juda bara Benjamín wal lilara; wibia kaka, tasba kum bâk sakan ba Dawan dukiara bara tawan tasbaya wal. Bîla yahpika ba 12 kilumita pura hap bri kabia, bîla yahpika bara yarika wan kabia lalma tani ra lalma piarkika kat, bara muna tani ra lika kabu kat. Lila tani ba Dawan dukiara sakan ba bâra kabia, tempel wal, purkara Libait nani dukia bara tawan tasbaya.

Kiamka wala nani tasbaya

^23-27 “Kiamka wala nani tasbaya ba kau waupasa tani ra auya. Kiamka bani tasba pîs kum bribia lalma piarkika ba wina muna tani ba kat. Naku natka ra kabia: Benjamín Simian Isacar Zabulón Gad.

²⁸ “Gad tasbaya waupasa tani ra, piarkika ba Tamar wina kabia, lui wabia Meribá-cadés bara Idsip laya kârma bâk, Mediterráneo kabuka kat.

²⁹ “Naha sika Israel luhpia nani ai prapatika baku ai tasbaya bribia ba, baha natka ra man nani yuaia kama. Yang, Dawan, baku adar yabisni.

Jerusalem durka nani ba

^30-34 “Tawan ba kutbanka tara kum kir kabia, yahpika ba 2,520 yar. Kutbanka baila bani ra dur yumhpa kabia, kumi bani Israel kiamka bani nina ra, naku natka ra: Yahbra durka nani ba: Ruben ra, Juda bara Libai; lalma tani ra nani ba: Josep ra, Benjamín bara Dan; waupasa tani ra nani ba: Simian ra, Isacar bara Zabulón; muna tani ra ba: Gad ra, Aser bara Neftalí.

³⁵ Kutbanka yahpika aiska ba 10,080 yar bara tawanka nina ba mawan tani ra nina ba mâkan: ‘Dawan ba nâra sa.’ ”