Isikiel 42 - DAWAN BÎLA AISKA

Utla nani tempel lamara ba

¹ Baha ningkara, waitna ba ai brih wan lata tani ra yahbra tani ba ra, bahara rum nani bâra kan utla kum latka kutbi prakan tempel ninara yaba mawanra.

² Baha rumka nani watla aiska ba kulki kaikan yarika ba 168 pît bri kan yahbra tani ra ba, bîla yahpika ba 84 pît.

³ Watla latka tempel tani ra bîla yahpika ba 34 pît bri kan, latka tnaya wala ba lika walpa ni paskan ba tani ra ba plur yumhpa paskan kan, baha purkara dur nani bri kan mâya wina bal dimaia.

⁴ Baha watla rumka nani ba wina yahbra tani ra wapi luaia bîla yahpika ba 16 pît bri kan bara yarika ba lika 168 pît, baha wina watla ba bilara dimi kan. Rumka nani durka ba yahbra tani ra kan.

⁵ Baha rumka nani kau purara bâra ba bîla yahpika ba kau sirpi kan; bîla plurka ba, bara mâya plurka ba wal sin. Baha plurka nani ba lilara playa tara nani âpu kan ba mita,

⁶ baha rumka nani ba plur yumhpa purara paskan kan, sakuna karnika yaia playa tara nani ba mangkras kan, baha mita kau purara plurka ba bara plur wala nani yahpika ba wal kumi apia kan.

^7-8 Baha watla ra mâya plurka ra wapi luaika bîla tnaya ra rum nani ba, tâ kum wina tâ wala kat 84 pît bri kan, baha halka ba sin, tâ kum wina tâ wala ba kat 84 pît brisa. Baha kulkanka wâl ba sika utla aiska kulkanka ba 168 pît bri kan.

⁹ Mâya plurka ra rum nani ba ra dimaia yabalka ba, wibia kaka, lalma tani bâk dimi kan;

¹⁰ baha wina waupasa tani ra waia yabalka bâk taki waupasa tani latka ba ra wan sa. Tempel muna tani ra utla ba baha latka aiska kutbi prakan ba bahara diman, bara bahara sin rum nani bâra kan,

¹¹ baha rumka nani ba sin yahpika, kulkanka nani ba, yarika ba dimi, takaia bilka kulkanka nani sut ba, yahbra tani watla ra dîa kulkanka nani bri ba baha wal baku kan; bara wapi luaika ba sin bâra kan.

¹² Bamna waupasa tani rumka nani ba kat waia kaka, yabalka ra durka kum bâra kan, baha durka ba wina wapi luaika ba param kan ban baha kutbanka tara ba kat waia, bara lalma tani wina bal bahak dimi kan.

¹³ Bara waitnika ba yang ra ai win: “Tempel latka ra yahbra bara waupasa tani ra rum nani bâra ba, baha nani tempel latka kutbanka bilara bâra ba, baha watla nani ba aihka sakan sa prîs nani baman bahara dimi kaia. Baha prîska nani altar ra Dawan lamara wark taki si aula nani ba; plun prisantka nani altar ra ridi daukan ba, bahara bri si pin. Bara plun laya prisantka nani sin daukan ba, saura daukan pâtkira takan mana sakripais daukan nani ba, sunu baha watla nani ra brih wan, baha watla aihka saki sunu daukan bamna.

¹⁴ Ani taim prîs nani ba tempel ra dimi wark daukuya ba ra, witin ai prâka dimi wark daukan ba daikras ban tempel latka ra upla nani tilara taki wabia apia, kan ai prâka dimi ba sunu daukan bamna witin kwala wala dimi ba ra lika upla nani tilara waia sa.”

Tempel ba baman kulki kaikan

¹⁵ Waitna ba tempel bîla aiska kulki kaikan ba ningkara lalma tani durka bâk ai saki tempel latka ra ai brih wan, bara baha tasbaya sin kulki kaikan.

¹⁶ Kulki kaikaia dusa ba ni kulki kaikan baha latka lalma tani ba 840 pît bri kan.

¹⁷ Baha wina yahbra tani latka ba sin kulki kaikan ba ra, baha sin 840 pît bri kan;

¹⁸ baha wina waupasa tani latka ba sin kulki kaikan: baha sin 840 pît bri kan;

¹⁹ bara lâs muna tani latka ba sin kulki kaikan, baha sin 840 pît bri kan.

²⁰ Tnaya walhwal ba sut kulki kaikan. Bara kaikan tempel ba 840 pît skwir kutban kan. Baha kutbanka ba mita holi bara holi apia ba wal aihka dakbi saki kata.