Isikiel 40 - DAWAN BÎLA AISKA

Naika piua ra tempel nahki kabia ba lilka

^1-2 Baha katka yua matawalsip ra mani raya katka, Dawan ai mihta ba yang purira mangkan bara diara aihka kaikan kum ra Israel tasbaya ra ai brih wan. Pat 25 mani baku yang nani Babilon ra alba katna, Jerusalem batakan ba wina lika 14 mani bri kan. Israel tasbaya ra, il purara pali kum ra Dawan mita ai sunan, bara baha wina yang waupasa tani ra kaikri utla pali man mâkan baku tawan tara kum baku.

³ Dawan ba bahara ai brih wan bara yang waitna kum kaikri mawan ba bras baku kan. Tawan getka ra bûi kan, bara ai mihta ra linin awa kum bri kan bara kulkaia dusa sin kum.

⁴ Bara baha waitnika ai win: “Aman kaiks bara tânkira wals; aman pali kaiki bas diara sut mamrikaisna nani ba, Gâd mai brih balan sa yang diara na mamrikaia. Ningkara, dîa kaikma ba sut Israel luhpia nani ra wima.”

Lalma tani ra get ba

⁵ Tempel lata tani ba kutbanka tara kir bri kata. Kulki kaikaia dusa waitnika ai mihta ra bri kata dusa ba yarika ba 10 pît bri kan, bara baha ni kutbanka ba kulki kaikan, twaknika ba 10 pît bri kan, purara sin 10 pît.

⁶ Baha wina witin lalma tani getka ra wan. Bara tips bâk uli purara wan, getka tani wâl ba kulki, baha sin 10 pît bîla yahpika bri kan.

⁷ Dimaika ba tnaya bani ra aihwawakra watla bâra kan. Watla kumi bani bîla ba yarika ba 10 pît tani bani bri kan, bara tnaya kutbanka twaknika ba bilka ra 8 pît bri kan. Aihwawakra nani watla ba wina kau kainara wapi luaika wala bâra kan yarika ba 10 pît bri kan, baha sika tempel ra dimaia getka ba.

^8-9 Baha hal bîla ba sin kulki kaikan bara 14 pît bri kan. Baha getka ba wina tempel ra dimaia lama pali ba kat utla tnaya ra praki paskan playa tara tani bani bri, baha twaknika 4 pît bri kan.

¹⁰ (Baha getka bilara lata tani ra wapi luaika tnaya bani ra watla yumhpa bâra kan ba sut yahpika kumi kan, bara getka ra playa tara tani bani ra ba sât ba yahpika kumi kan.)

¹¹ Baha ningkara waitna ba wih getka kulki kaikan dimi lui waia bîla yahpika ba. Baha aiska kulkan bara 22 pît bri kan, get ra dimi luaia bîla ba 16 pît bri kan.

¹² Baha aihwawakra watla kumi bani ba mawanra kutbanka wal sirpi kau mâyara kutban kum bâra kan 20 ins bara twaknika ba sin 20 ins bri kan. Baha rumka lupia yahpika ba 10 pît bri kan tani bani ra.

¹³ Baha ningkara witin baha watla ra dimaia bîla aiska ba kulki kaikan, rum nani ba sut wapi luaika ba sin kulki kaikan bara 42 pît bri kan.

¹⁴ Baha wina kli baha watla bîla paramka ba tâ kum wina tâ wala ba kat kulki kaikan: baha 34 pît bri kan bîla yahpika ba, watla latka aiska bâk, baha halka bâk sika bilara dimi kan.

¹⁵ Bamna kutbanka lata tani ra getka ba wina, bilara kutbanka ba halka lâs ba kat 84 pît bri kan.

¹⁶ Baha bilara utla sirpi nani bâra kan, playa tara skwir nani ba sin, baku sin windarka nani sin bâra kan, watla tara ba kir lata tani ra. Dur kat hal ra dimaia ra windarka nani ba sin, baha watla kir ba. Baku sin bilara playa tara skwir nani bâra kan taya ba kûku wahia sâtka lilka ni lilka daukan kan.

Kutbanka wâl lilara latka ba

¹⁷ Baha wina waitnika ba bal get bâk dimi wapi luaika bâk ai brih wan. Latka walpa ni paskan kan bâk bara 30 rum nani baha kir bâra kan.

¹⁸ Naha latka walpa ni paskan ba kau mâyara kan bilara paskan wala bâra ba wal, bara bîla yahpika ba yarika ba wal baku kan.

¹⁹ Baha latka ba wina latka wala ra waia get ra dimi ba kau purara lui waia yabalka kum bâra kan bilara dimaia. Get ba wina get wala ba kat bîla wihkika ba sin waitnika ba kulki kaikan bara 168 pît bri kan.

Yahbra tani getka ba

²⁰ Yahbra tani ra sin bilara dimaia getka wala kum bâra kan. Baha bîla yahpika yarika ba sin waitnika ba wih kulki kaikan.

²¹ Getka ba bilara tnaya bani ra aihwawakra nani rumka yumhpa bâra kan, playa tara skwir nani ba sin bâra kan wapi luaia hal ba sin, baha rumka nani ra dimaia bîla yahpika yarika ba sut, yahpika ba lalma getka yahpika ba baku kan; dimaika kumi bani ba 84 pît yarika, bîla yahpika ba 42 pît bri kan.

²² Baha halka ba, windarka nani ba, kûku wahia sâtka lilka dauki paskan nani ba, yahpika ba sut lalma tani getka bilara dîa bâra ba wal baku sa. Bahara sin 7 tips uli auya pura ba kat, bara baha bîla paramka ba bîla tani bâra sa.

²³ Bamna lalma tani getka ra ba baku, yahbra tani getka ba ra sin bilara dimuya ba latka ra, baha wina sin kli get wala bilara dimaia bâra sa. Bara waitna ba baha getka kum wina getka wala ba kat bilka ba kulki kaikan bara 168 pît bri kan.

Waupasa getka ba

²⁴ Baha ningkara waitnika ba mita waupasa tani getka ba ra ai brih wan, bara baha bilara playa tara skwir nani ba bara bîla paramka ba sin kulki kaikan, get wala nani ra kulkanka nani ba nani ra dîa kulkan ba wal baku kan,

²⁵ windarka nani ba wapi luaika ra hal nani ba sin get wala nani ra dîa bâra ba wal baku kan. Baha yarika aiska ba 84 pît bri kan, bîla yahpika aiska ba 42 pît.

²⁶ Bahara sin purara waia 7 tips bâra kan, bara bilara dimaia halka ba sin ban tâ kumi wina tâ wala kat luan kan, baha latka ba kat waia. Bara wapi luaika ra playa skwir nani ba kûku wahia sâtka lilka ni dauki paskan kan tnaya wâlsut ba.

²⁷ Baha bilara dimaia ba ra sin dur kum bâra sa waupasa tani ra waia. Waitna ba baha durka ba wina dur wala ba kat bîla lilapas ba sin kulki kaikan, bara dur kum wina wala ba kat 168 pît bri kan.

Tempel latka ra: waupasa tani getka ba

²⁸ Tempel ra waia waupasa tani getka ba ra ai brih wan. Bara getka ba pas kulki kaikan bara kaikan get wala nani lata wina bal dimaia getka nani ba wal baku kan yahpika yarika nani ba.

^29-30 Aihwawakra rumka nani ba, halka ba, baha kutbanka ra playa tara skwir nani ba sut yahpika ba kumi kan. Baha watla ra dimaia ra, bîla paramka ba ra sin, baha rumka nani kir ba sin windar nani bri kan, baha watla kulkanka yarika aiska ba 84 pît bri kan, bîla yarika ba sin 42 pît.

³¹ Baha bilara hal ba ban lui wan latka wala ba kat. Bahara playka skwir nani bara kûku wahia baku sâtka lilka paski daukan kan. Baha wina purara 8 tips uli kan.

Tempel latka ra: lalma tani getka ba

³² Bara baha wina lalma tani bâk tawi, tempel latka ra dimaia getka ba ra ai brih wan. Bara witin getka bîla ba kulki kaikan, bara baha get ba sin wala nani yahpika ba wal baku kan.

³³ Rumka nani ba, playka skwir nani ba, bîla paramka nani sut ba, yahpika yarika nani ba kulkanka ba kumi baku kan. Baha watla bilara dimaia ba bîla paramka ba windar nani bâra kan tnaya bani ra. Tâ kum wina tâ wala kat 84 pît bri kan, bîla yahpika ba sin 42 pît.

³⁴ Baha ba wina bilara dimi waia ba yabalka ra hal bâra ba, yahpika kumi baku kan. Playka skwir nani ba kûku wahia lilka tnaya wâl ra bâra kan. Baha wina kau purara waia ba 8 tips bâra kan.

Tempel latka: yahbra tani getka ba

³⁵ Baha wina waitnika ba yahbra tani getka ra dimaika ba ra ai brih wan, bara dimaika bîla ba kulki kaikan, baha sin get wala nani ba kulkanka ba wal baku kan;

³⁶ bahara bîla paramka nani bâra kan, playa tara skwir nani ba, wapi luaika bîla paramka ba bara windarka nani sin tnaya bani ra watla ra dimaika ba. Tâ kum wina tâ wala kat yarika ba 84 pît bri kan, bîla yahpika ba sin 42 pît.

³⁷ Bîla paramka ba wina kutbanka ba bilara auya playa skwir nani ba, playka nani ba kûku wahia sâtka lilka nani daukan kan tnaya bani ra. Baha wina sin purara waia 8 tips bâra kan.

Tempel latka ra yahbra tani getka ra tnaya ra utla kum ba

³⁸ Kutbanka aiska ba bilara latka ba wina tempel latka ra dimaia yahbra tani ra getka playa tara ba lata tani ra tnaya ba kat sin utla kum bâra kan. Baha watla ba ra sika daiwan nani sakripais daukaia brih aula ba iki wîna ba sikbi kan.

³⁹ Baha watla bilara man dimaia bara playa tara ba lamara tibil walhwal bâra kan, wâl ba tnaya kum ra, wala wâl ba tnaya wala ra. Baha tibilka nani purara sakripais daukaia daiwra nani ba iki kan, saura daukan ba mana, pâtkira takan ba sin ban swih tikaia mana.

⁴⁰ Yahbra tani ra baha halka ra dimaia latka ra sin tnaya bani ra tibil wâl bâra kan,

⁴¹ bahamna tibil nani sut ba 8 bâra kan. Baha nani purara daiwan nani ba iki kan: walhwal ba watla bilara ikan, wala walhwal ba latara iki kan.

^42-43 Baha watla ra purara daiwan aiska angki kan tibilka nani ba walpa tara wina klaki paskan kan; yarika ba 30 ins, bîla yahpika ba 30 ins bara paknika ba 20 ins bri kan, wîna nani prisant yabaia brih aula ba baha purara kahban. Rumka bilara, tnaya kir bara utla tnaya ra diara kahbaika paskan kan bîla yahpika ba 3 ins, baha purara suni kan plawar prisantka, prisant wala nani sin brih auya ba, bara diara watla nani sakripais aiska angkaia daukaia yus muni kan dukia nani ba sin bahara kahbi kan, daiwan ikaika dukia nani ba sin.

⁴⁴ Tempel kutbanka ba bilara, sakuna get nani bilara ba bîla lika, lata tani ra, rum wâl bâra kan, kum ba yahbra tani getka ba lamara kan, wala ba waupasa tani getka lamara, baha durka wina yahbra tani ra kaiki kan.

⁴⁵ Bara ai bri tauki waitnika ba ai win: “Baha rumka waupasa tani ra kaikisma ba, prîs nani ba bâra dimaia, baha nani tempel ra wark dauki ba,

⁴⁶ baha rumka wala yahbra tani ra kaikisma bara sin prîs nani altar ra wark dauki nani ba dimaia. Sadoc kiamka nani ba baman prîs warkka dauki kabia sa, witin baman sip sa Dawan lamara waia.”

Tempel bara latka ba

⁴⁷ Bara waitna ba tempel bîla ba kulki kaikan baha yahpika ba 168 pît skwir kan. Tempel mawanra altar ba bâra sa.

⁴⁸ Baha ningkara witin tempel halka ra ai brih wan. Baha playka tara skwir nani ba kulki kaikan, playka kumi bani twaknika ba 9 pît bri kan, bara baha halka getka playka nani ba kumi bani yahpika 5 pît kan.

⁴⁹ Baha halka ra dimaia bîla yahpika ba sin kulki kaikan bara yarika ba 34 pît kan, baha wina tâ wala ba kat 20 pît kan, baha wina purara waia tips nani matawalsip bâra kan. Bahara nan dimaia ba ra playa tara wâl bâra sa: Tnaya kum ra playa kum, tnaya wala ra playa wala.