Isikiel 4 - DAWAN BÎLA AISKA

Jerusalem kutbi alkbia ba maisa pakan

¹ “Man, upla luhpia, slaubla ni blok paskan ba kum bris, bara baha purara Jerusalem lilka dauks.

² Baha ningkara aiklaklabra daknika tara aiklabaia dukia bri ba dauks, bara baha nani kaina kir ba tawan kutbanka ba dauks, upla nani uli iwaika ba sin, bara baku witin nani kaikbia tawan kum ra kutbi bri ba.

³ Baha ningkara ayan ni kaupin kum Jerusalem lilka ba bahara man bâra sma ba wal lila kat paskma, tawan kutban tnaya baku, bara man tawan ba mawanra bus, man mita aiklabisma baku prais. Baha ba Israel luhpia nani ra smalkaia lilka kabia.

⁴ “Baha ningkara man smihkam tani ra aitnikma bara Israel saura daukan ba puramra brima. Man smihkam tani ra baman aitniki kaia sma, witin nani saurka ba man puramra kabia

⁵ yu 390, wibia kaka, Israel saura daukan ba, yu kum ba mani kum sa.

⁶ Naku yua nani alkma ba ra, aihkikam tani ra aitnikma, bara man puramra Juda saurka nani mangki twilkma yu nani 40 prais, mani bani saurka mana yu kum maikisni.

⁷ Ningkara waihla nani mita Jerusalem kutbi bri ba tani ra mamwan bapi brima, klamhkla ba sâkma bara witin nani ra diara takaia ba smalkma yang nini ra.

⁸ Kaiks, yang kiwa nani ni mai wilkaisna, bara man tnamya kum wina tnamya wala ra tawma apia, man baha pâtka wahwaia yua kulkan sut ba alkbia kat.

⁹ “Bara plawar, barli mâ, bins, diara wala sin man bris; bara kahmi kum ra auhs, bara brit kum dauks. Yu bani smihkam tani ra baman aitniki kama bara baha pi kama yu nani 390.

¹⁰ Awarkam kat patam ba pi kama, yu bani 8 auns piaia;

¹¹ bara lî sin awarka kat di kama, batil kumi yu bani.

¹² Barli mâ turtika kum ba man patam kabia, baha lika upla kânka ra angkan kabia, bara baha purara piaki kama upla nani mai kaiki ba ra.”

¹³ Ningkara Dawan naku aisin: “Naha nani pata sâtka, plun tâski nani ba sika Israel luhpia nani pin kabia ba, ani kuntrika ra brih wamna ba ra.”

¹⁴ Bara yang bui witin ra wîri: “Sakuna, Dawan, yang rayaki aiska ra plun tâski nani piras katna. Aima kumi sin daiwan yakan pruan nani wîna piras katna, apia kaka daiwan wail nani mita ikan sin piras katna. Aima kumi sin wîna tâski nani pih kaikras sna.”

¹⁵ Baku ba ra witin naku ai win: “Bîp wainhka tâskika wal kuk takma, upla tâskika wal piakaia watlika ra.”

¹⁶ Baha ningkara ai win: “Yang daukisna Jerusalem ra plun ailal âpu kaia. Plun ba wiria baman yabi kabia, bara upla nani ba sarikira baha pi kabia, bara lî ba sin watla sirpi ra di kabia, sibrinkira pali.

¹⁷ Baku ba mita plun bara lî nitka nani bâra kabia, ai walka ra pana pana tâ iwi kaiki kabia. Bara ai saurka tâwan kau raya ba kat sukwi tiwbia.”