Isikiel 37 - DAWAN BÎLA AISKA

Upla pruan dusa lâwan nani ba

¹ Dawan ba ai mihta laila ra kahban, bara ai karnika tara ba aikan, bara ai mangkan il bîla kum ra upla pruan dusa nani man kan tilara.

² Dawan ba aikan taukri pliska sât sât ra; pruan nani dusa ni banhwan kan, il bîla nani ba ailal pali kata bara dusa nani ba lâwan pali kata.

³ Bara ai win: “¿Man lukisma naha dusa nani kli rayaka bribia?” Yang wîri: “Dawan, man yakan baha ba kaikisma.”

⁴ Bamna Dawan bui ai win: “Yang nini brih, naha dusa nani ra aisas. Bara wis: ‘Dusa lâwan nani, man wals Dawan smalkanka bîla na.

⁵ Dawan ba wisa: Man nani ra rayaka wingka puhbra mangkaisna, baku ba ra kli raya buma.

⁶ Wakia nani mai mangkamna ba ra, wîna ni mai banhkamna, taya ni mai bikamna bara rayaka wingka mai puhbamna rawi buma dukiara. Baku mika man nani damra walma, yang sika Dawan sna ba.’ ”

⁷ Bara yang aisari, witin ai win ba baku. Bara aisi katna piua ra, bin tara kum walri: tasba nikban kata, bara dusa nani ba asla taki kan kum wihki wala nani wal.

⁸ Bara kaikri baha nani purara wakia nani taki kan bara wîna bara taya ni biki kan ba. Sakuna raya kaia wingka puhbanka âpu kan.

⁹ Bamna Dawan bui ai win: “Yang nini ra pâsa ra aisas raya kaia wingka puhbi ba ra wis: ‘Dawan naku aisisa: Tasba mapa walhwal wina bal bara upla pruan nani na ra rayaka yas.’ ”

¹⁰ Yang Dawan nina bri smalkri, witin ai win kan ba baku, bara raya kaia wingka puhbra ba balan witin nani ra bal diman, bara witin nani rawan bara buan. Upla ailal pali luan, suldiar kwâra tara pali takan.

¹¹ Bamna Dawan bui ai win: “Israel luhpia nani ba baha dusa pruan ailal ba baku sa. Aisi taukisa: ‘Wisa yawan wan dusa nani ba lâwan sa; bîla kaikanka kum sin âpu, yawan na tiwan sa.’

¹² Bamna aitani, yang nini bri smalks bara wis: ‘Dawan ba naku wisa: Yang upliki, man nani raitikam kwâkamna; baha wina mai sakamna Israel tasbaya ra kli tawi waia.

¹³ Bara yang raitikam nani ba kwâki mai sakamna bara damra walma man nani ba, yang upliki, yang sika Dawan sna ba.

¹⁴ Yang bui man nani ra wingka puhbra ba mangkamna, bara man nani kli rawi buma; bara kli man nani tasbayam ra mai swimna. Baku lika man nani kaikma, yang, Dawan aisari ba bara daukri ba. Yang, Dawan, kasak aisisna.’ ”

Juda bara Israel wal kli asla daukan ba

¹⁵ Dawan ba ai aisan bara ai win:

¹⁶ “Dus kum bris, bara bahara uls: ‘Juda bara ai aslika Israel wina ba’. Bara dus wala bris, bara uls: ‘Efraín, Josep watlika ra, bara Israel taika wala nani aslika sut ba’.

¹⁷ Baha ningkara, mihtam ra kumi bara wala ba wal asla dauks, wal kumi daukram ba baku.

¹⁸ Tasbayam uplika mai wibia ba ra: ‘Dîa tânka sapa wan wis.’

¹⁹ Wis: ‘Dawan ba naku wisa: Josep dusa ba briaisna, Efraín mihta ra ba bara kiamka wala nani Israel wal asla takan nani ba wina, bara asla daukamna Juda dusa ba wal, dus kumi ra wal asla daukamna mihti ra ba.’

²⁰ Witin nani mai kaiki kaka dus wâl ra ulbanka dusa ba mihtam ra alki bus.

²¹ Ningkara wis: ‘Dawan naku wisa: Israel ba nisan wala tilara wih takaskan ba wina sakamna; asla daukamna plis sât sât wina bara yabrika ai tasbaya ra kli tawbia.

²² Witin nani ba nisan kumi daukamna naha kuntrika ra, Israel ilka ra, bara king kumi baman bribia. Kli tar baiwan kabia apia nisan wâl ra, king lâka wâl ra sin apia.

²³ Kli tâski takbia apia, aidul saura kulkan nani ra mayuni, saurka sât sât dauki. Yang kasak lâka luha daukan ba wina sut pri sakamna, bara klin daukamna ai saurka wina. Witin nani upliki nani kabia bara yang ai Dawanka.

²⁴ Duki dadaukra Debit ba, king kabia bara sepad unhsak kabia witin nani sut dukiara; bara witin nani bîli walbia bara lâika bîla daukaia lâka ba daukbia.

²⁵ Duki dadaukra Jekob ra yabatna kuntrika ra iwbia, bahara ai almukka nani iwata ba. Bahara witin nani iwbia ban kaia ra bara ai luhpia bara ai kiamka nani sut; bara duki dadaukra Debit ba ai tâ brabrira kabia.

²⁶ Witin nani aikuki lâ kum daukamna, ai rayaka lamni lâka ra iwi kaia dukiara. Ban kaia ra wilkanka kabia. Yabrika ailal pali takbia, bara ban kaia ra tempelka holikira ba witin nani tilara mangkan kabia.

²⁷ Witin nani tilara iwamna, bara yang ai Dawanka kamna bara witin nani upliki nani kabia.

²⁸ Tempelki holikira ba ban kaia ra witin nani tilara kabia ba ra, nisan wala nani ba ai dara walbia, yang bui Israel ba wahbi sakri ba, sim diara kasak sunukira baku.’ ”