Isikiel 31 - DAWAN BÎLA AISKA

King fero ba yalam kum wal prakan sa

¹ Yua pas, kati yumhpa, mani 11 alkan ra, Dawan ba yang ra balan bara ai win:

² “Wis king fero ra, Idsip kingka, bara ai uplika sut ra sin: ‘¿Dîa wal sip sa prakaia, man tara pali sma ba?

³ Man ba saiprus dusa, apia kaka, Líbano yalamka dusa baku sma, tnamwa painkira ba wal dista yabisma dus wala nani bâra ba. Yari pali sa, ban kasbrika kat wisa tnamwa bahna ba.

⁴ Lî auhi ba bara tasba laya nani ba pâwaia hilp munbia; lama kir ba awala nani takan anira mangkan kan ba ra; laya ba ni buskata lamara dus nani bâra kan ba sut ra.

⁵ Lî ailal pali bri kan bamna, dus wala nani wal kau pain pâwan; ai tnawa nani ba tara takan, bara ai tnawa nani pâwi takan.

⁶ Tnawira sât sât baha tnawa ra ai watla dauki kan; daiwan wail nani sât sât ba baha munhtara ai luhpia baiki kan. Nisan ailal baha distika ra iwaia sip kan.

⁷ Dus prana, bara tara pali kata, tnawa ba yari pali kan, ai wakia nani ba lî ailal lamara kan.

⁸ Yalam dusa kum sin âpu kan Gâd ra giadinka ra witin wal praki kaikaia; awas dusa kumi sin witin tnawa bri ba baku âpu kan, castaño dusa kumi sin wahia ailal briras kan, dus kumi sin Gâd giadinka ra âpu kan witin ai prana ba wal prakaia.

⁹ Yang prana daukri, bara tnawa ailalkira; Eden ra dus wala nani ba, Dawan kaupinka ba, tumanka bri kan.

¹⁰ ‘Bamna aitani, Dawan ba naku wisa: Dusa ba yari pali takan bara tâ ba kasbrika kat uli wan; tara pali takan bamna, ai mayunanka ni banhwan.

¹¹ Baha mita, yang lulki swiri; yaisna tringsar nani tâ brabrira mununhtara kauhbia, witin ra daukbia ai saurka daukan ba mana ba kat.

¹² Tringsar kau saura nani ba, klakbia bara lulki swibia; ai tnawa nani kriwi kauhbia unta aiska ra, il plahpia ra bara swamp nani tilara bara nisan nani ai distika ra kata sut ba plapbia bara lulki swibia.

¹³ Piawira sât sât bal iwbia dusa kauhan ba ra; daiwan wail sât sât ai tnawa ra bal ulbia.

¹⁴ Bara dus kum, lî lamara kabia sin, kli ban pâwbia apia; lî pain laikan kabia sin kasbrika kat tâ ba alkbia apia, bara ban pali pâwi uli wabia apia. Sut ba ban swin sa pruaia; naha tasbaya munhtara iwaia bara asla takaia pat raiti ra nani ba wal.

¹⁵ ‘Yang Dawan sna ba, wisni: Dusa na prura kingka tasbaya ra iwbia ba ra, yabrika sari mita kabu tihu ba lâwbia; awala nani ba alki takaskamna bara lî plapi nani ba; witin bâk yabamna Líbano ilka ba sari ni aibanhbia bara dus nani bâra ba sut srawbia.

¹⁶ Yang yabrika prura kingka tasbaya ra iwbia pruan nani bâra ba wal asla prawaia; witin kauhan binka ba wali tasba ra nisan nani ba tatatbia bara baha tasbaika ra tasba munhtara Eden dusa nani ba maisa nihkra brin kabia; kau painkira bara kau pain lî ni laiki lâkan nani ba sin Líbano ilka ra.

¹⁷ Witin nani sin mâya kat iwbia, witin baku, prura kingka tasbaya ra asla takbia war ra pruan nani wal. Ai distika ra iwi kan nani ba, nisan sât sât tilara yakabrira takbia.

¹⁸ Eden ra dus nani bâra ba kumi sin witin wal sip prakras kata kulkanka ba bara pâwanka yarika ba wal sin; bara ban sakuna, Eden dusa wala nani wal baku mâyara iwbia, tasbaya tasba munhtara bâra ba kat iwi wabia, idan nani tilara iwaia, upla nani war ra pruan nani ba tilara. ‘Baha dusa tara ba king fero sa ai uplika sut kira. Yang, Dawan, kasak aisisna.’ ”