Isikiel 24 - DAWAN BÎLA AISKA

Dikwa lilkika ba wina smalki ba

¹ Mani 9, kati matawalsip aimakan ba yua matawalsip ra, Dawan ba yang ra balan, bara ai win:

² “Naiwa yua ba ulbi bris, kan naiwa yua ba Babilon kingka ba Jerusalem pura luan.

³ Naha uplika nani maipara babura na ra dahra prakan sturka kum wis, baha ra kaiki kaia. Yang bîli wis: ‘Dikwa kum pauta ra mangks bara lî laiks.

⁴ Dakawa ra wîna pîs mangks kuhma wîna pain nani dusa âpu ba, bara dusa wînka kau pain nani ba sin.

⁵ Pauta ba pura paks, bara sîp kau yamni ba wina kum pain pali lukwaia, dusa nani ba sut piawbia ba kat.

⁶ ‘Kan Dawan ba wisa: ¡Saura pali kabia upla âikra tawanka ba! Dikwa kum bîla puputka alkan ba baku sa, bilara puputka ba sakras sa. Man, kumi kumi sâks wîna lupia nani ba dakawa ba bîla baman sâkma ba kat.

⁷ Tawan ba tala laiwan ni banhwan sa; bara laiwisa, tasba purara lika apia, pukpuka ba mita pura bikbia, sakuna walpa lipni ba purara.

⁸ Yang baha purara swimna tala ba, walpa lipni ba purara, baku natka ra sip pura prakras kabia, kupi sauhkanka ba lapta takbia bara kasakka lâka daukbia.

⁹ ‘Kan Dawan ba wisa: ¡Alai, baha tawanka upla âikra ba! Yang pali mita pauta mukuna.

¹⁰ Bara man pauta ailal bri bal mukma bara wîna ba pain piawbia, piawi pilalka mita dusa nani ba angkbia;

¹¹ dikwa bîla man ba bri si pauta pura ba ra mangks, bras ba pauni pali takbia kat sâks bara tâski ba wina klin takbia, ¡ahkia piua alahmika ba siahwi takbia ba kat!

¹² Ban sakuna, tâskika lalahni ba takras sa, pauta klauhan pali mita sin klin daukras sa.

¹³ ‘Jerusalem, yang brinki kan tâski ba wina pri lâka brima, kuna man klin takras kapram. Man klin takma, yang kupi sauhkanka puramra blikamna ba kat lika.

¹⁴ Yang, Dawan, wîri bara naku kabia. Yang pali mita daukamna, bara daukras kira swimna apia; umpira kaikamna apia, kupi sin lakamna apia; klala maikamna daukankam saura ba tâwan. Yang, Dawan, kasak aisisna.’ ”

Isikiel maya pruan ba

¹⁵ Dawan ba yang ra balan bara ai win:

¹⁶ “Man kau want sma uplika ba man wina mahka sakaisna. Sakuna man sari bri inpara, namkra laya sin sâkpara.

¹⁷ Yukuwan ra sari taks, kwala siksa dimpara. Upla pruan nani pura mata dauki ba baku daukpara. Lamla srukras bara sûs sin âpu taukpara; mamwan sin bikpara sari sma wisi, plun sin pipara baha piua ra pi pata ba.”

¹⁸ Titan ra upla aikuki aisi katna, bara tutni ra mayi ba pat pruan; titan wala ra, Dawan dîa ai win ba kat daukri.

¹⁹ Baha ningkara tawan uplika nani ai win: “Tânka wan wis, daukisma ba dîa tânka sapa.”

²⁰ Yang mita wîri: “Dawan ba yang ra balan bara ai win:

²¹ ‘Israel luhpia nani ra wis: Dawan ba naku wisa: Tempelki ba tâski daukamni man nani kaikaia lihkisma bara latwan sma ba; man nani kulkanka tara brisma bara karnikam ba; luhpa mairin bara waitna nani, Jerusalem ra swiram ba iki yakabia.

²² Bara wis: Man nani sin, yang daukri ba baku daukma: lamla srungkpara sari wisi, bara baha piua ra pi ba pata sin pima apia.

²³ Witin nani ai lal pura bikaika ba, sûs âpu sip tauki kabia apia. Iwras sari briras kabia apia. Witin nani ai karnika âpu takbia watawika lâka pâtka ba mita, bara ai walka nani aikuki ini banhbia.

²⁴ Isikiel ba man nani mampara smalkanka kum kabia, bara dîa dîa witin daukan ba sut, man nani daukma. Naha takbia ba ra, tânka bri banhma yang sika Dawan sna ba.

²⁵ ‘Bara Israel uplika nani ra karnika ba dakbi sakamna, baha sika tempelka ba, prana tara ba dukiara upla ailal ai liliaka brisa kaikaia lihki ba, bara latwan kaiki ba. Baku sin luhpia waitna bara mairin ba mihta dakbamna.

²⁶ Bara baha yua ra, ya plapi swak takaia sip kabia ba, plapbia bara dîa takan ba tânka sin aisabia.

²⁷ Baha yua ra bîlas kaia lâka swima, bara ya plapi swakwan ba wal aisama. Baku sampla kum kama tawan ba mapara, bara witin nani ai tânka bribia yang sika Dawan sna ba.’ ”