Isikiel 22 - DAWAN BÎLA AISKA

Jerusalem uplika nani ra ikan ba

¹ Dawan ba yang ra balan bara ai win:

² “Man, upla luhpia âikra ba mapara lâka daukaia sma tâwan, upla ai diara saura daukan nani sut ba dahra sâkma.

³ Bara man wima: ‘Naku wisa Dawan ba: Tawan, man nani uplikam ra ikisma ba, aidul nani paskisma tâski takaia dukiara, ¡awarkam ba pat balbia!

⁴ Iki yakabram nani ba tâka pâtkira sma, bara aidul nani paskram ba wal tâski takram; yabram awarkam ba kau lamara balan, bara yabram yuam tnata balan. Baku bamna, yang yabrika tawan nani ba mai lahtubia, bara nisan nani sut lamwaska kikbia.

⁵ Lamara bara laihura nani ba sut, lamwaska kikbia. Tawan tara nani ba sin, aidulkam lâka bara yakabrira lâka brisma ba sin.

⁶ Bahara sa Israel tâ brabrira nani ba, man tilamra iwi ba, bara nahki ikaia lâka sip ba kat dauki ba.

⁷ Uplikam nani ba, ai aisa bâra ba ai yapti nani ra kulkras sa, tringsar nani ra saura munisa, rau bara piarka nani ra taiban lâka ra diara bri ba dakbi brisa.

⁸ Kulkanka yabras yang pliski holi ba, bara riski yua nani bâk sakri ba ra sin.

⁹ Ai kuninka tâka, uplikam nani ba pâtkira kulkan sa, upla wala prawi ba ra; aidul ra kulkanka tara wal, plun pi ba tilara wisa; diara saura kaikaia lâka ba daukisa.

¹⁰ Kum kum nani ba, ai aisa maya ba ai maya baku wal brisa; apia kaka baha mairka ai katka bri piua ra saura munisa.

¹¹ Upla kum kum bâra sa, ai uplika maya wal marit lâka sauhkisa, apia kaka, ai luhpia waitna maya wal swira lâka briaia dukia daukisa wisa, apia kaka saura taiban lâka munisa ai lakra, ai aisa apia ai yapti luhpia ra.

¹² Uplikam nani kum kum ai wîna atkisa ai walka ra ikaia dukiara. Upla ra lalah yabisa implikbia dukiara, taiban lâka bara saura munaia lâka daukisa ai uplika ra, bara ai âuya ai tikisa. Yang, Dawan, kasak aisisna.

¹³ ‘Yang uya kupi aisawan sa, taiban lâka ra upla dukia dakbi brisma ba dukiara, bara upla ra ikisma ba tâwan sin.

¹⁴ Lukpara man sip kama yang maipara buaia, mampara wapnikam daukaia buamna ba ra; yang Dawan, baku wisni bamna daukamna:

¹⁵ nisan nani tilara mai yakabamna, tasba wala nani ra ilihbi mai swimna, bahara tâskikam ba aiska klin mai daukamni.

¹⁶ Aikrika saura ra takaskamna nisan nani wala mawanra, kuna man damra walma yang sika Dawan sna ba.’ ”

¹⁷ Dawan ba yang ra ai aisan bara ai win:

¹⁸ “Yang maipara Israel ba, yuyaka bahki takan sa, bras, ayan, lit, lalah, kubus ra mangkuya baku sa.

¹⁹ Baha mita, yang Dawan sna ba, aisisna: Man nani sut na, yuyaka bahki nani takram bamna, Jerusalem lilara asla mai kukamna.

²⁰ Sim, lalah, bras, ayan bara lit, asla dauki kubus ra mangki ba baku, bara ningkara pauta alkisa slilkaia dukiara. Baku yang kupi baiwanka saura ba wal, asla mai daukamna bara mai slilkamna.

²¹ Âu, kupi baiwanka pata kakma ba alki, bara man nani asla mai kukamni, tawan lilapas ra mai slilkamna.

²² Lalah slilkaika ra slilki baku, man nani mai slilkan kabia tawan lilapas ra; baku damra walma yang, Dawan, kupi baiwanka man nani puramra laikri ba.”

²³ Dawan ba yang ra balan bara ai win:

²⁴ “Man, upla luhpia, Israel ra wis: ‘Man nani ba klala maikan sa tawan kum ra, lî auhras bara lî âpu kaia ba.

²⁵ Kuntri kum tâ wihta nani ba layan baku, diara alkan ba bisbi tikisa; ai tasbaya ra upla nani ba pîsa, ai kukanka ba bara diara apahkan ba implikisa, bara mairin ailal pali piarka swisa.

²⁶ Naha tawanka ra prîs nani ba, yang smalkanki ba warbi lakisa, bara yang diara holikira kulkisna nani ba tâski daukisa; sip aihka sakras sa diara holikira ba bara diara tâski ba wal, upla wala ra sin smalkras tânka briaia dîa sunu ba, bara diara sunu apia ba. Riski yua nani sakri ba kulkras, kulkanka sin aikras.

²⁷ Naha tawanka tâ brabrira nani ba yul wail baku sa; diara alkan ba bisbi tikisa, ridi pali sa upla ikaia, ai dukia kukan ba ailal dauki kaia baman lukisa.

²⁸ Prapit nani ba diara kasak ba yukukisa, kutbanka pihni dauki baku; diara nani kaikisa wisa, bara dahra aisisa kuna ningkara sut ba kunin man takisa. Yang nini ra aisisa wisa, kasakka ba yang bui witin nani ra wiras.

²⁹ Tawan uplika nani ba saura munaia lâka bara implikan lâka ni banhwan; umpira nani ra, bara nitka bri nani ra taiban lâka ra brisa, bara saura munaia lâka, kasak lâka luha tringsar nani ra munisa.

³⁰ Yang baha uplika nani tilara plikri, upla kum bâra kabia sapa tawan dukiara luki ba, bara yang ra tawan ba aisabia diara sauhki tikamna apia dukiara; ban kuna yang sakras.

³¹ Baku bamna, yang klalki witin nani purara bri balri, bara yang sauhki tikri kupi baiwanka ba wal, yabrika ai daukanka dukiara aisabia. Yang, Dawan, kasak aisisna.’ ”