Isikiel 20 - DAWAN BÎLA AISKA

Dawan kasakka ba bara Israel mapara babura ba

¹ Yu matawalsip ra, kati matsip, mani matlalkahbi pura kum ra, Israel almukka kum kum Dawan ra makabi walaia dukiara yang ra balan kata.

² Dawan ba yang ra balan bara ai win:

³ “Man, upla luhpia, Israel almukka nani ra aisi bara wis: ‘Naku wisa Dawan ba: ¿Yang ra diara tânka plikaia aulma? Yang, Dawan Gâd, rayaki wal swer takisna; yabrika man nani ba yang wina diara tânka walma apia.’

⁴ Kau yamni man lâka dauks. Man, upla luhpia, lâka dauki yabrika tânka bribia, diara yamni kaikaia apia dukia nani, aisika daukan ba.

⁵ Witin nani ra wis: ‘Dawan naku aisisa: Israel bâk saki briri piua ra, wal lâ kum swer takri ai kiamka nani dukiara bara yang lika witin nani ra param takri Idsip ra. Naha baman yang bui witin nani ra swer takri: Yang sika man nani Dawan Gâdkam.

⁶ Baha yua yang pramis takri Idsip wina sakaia bara brih waia kuntri kum yang pali sakri kan ra, baha pliska ra nasma bara tiala laya lî baku plapi ra, ¡kuntri kau pranakira sut wal!

⁷ Bara kumi bani ra adar yabri ai gâdka nani yamni kaikras sna âpu daukbia bara Idsip aidulka nani brih wapaia apia, kan yang, Dawan, Gâdka sna bamna.

⁸ ‘Kuna witin nani lika yang maipara buan, bara yang ra walaia brinka apia kan; sakuna Idsip wina aidul nani brin ba âpu daukras, witin nani baha nani swiras. Yang lukri kupi baiwanka witin nani purara batakaia, bara klala yabaia Idsip ra, yang kupi baiwanka wina âuyapah takbia kat.

⁹ Sakuna nini kulkanka tara wal daukri, saura takaskaia apia dukiara, baha nisanka aikuki iwi ba tilara, kan baha nisanka nani mawanra param taki, pramis munri Idsip wina sakaia.

¹⁰ Yang bui Idsip wina sakri bara upla iwras tasbaya ra brih wari;

¹¹ bahara lâika nani bara dîa daukaia lâka ba yabri; ya baha daukuya ba, rayaka yabi ba.

¹² Sabatki yua nani ba sin marikri, baha ba tukin kum kaia witin nani, bara yang wal maipara, bara kupia kraukanka kum yang, Dawan, yang duki baman bâk sakri kan ba.

¹³ Sakuna upla iwras tasbaya ra maipara buan, bara lâika bîla walras; dîa daukaia lâka yabatna ba baha dauki raya kaia; riski yua nani briaia kata ba tâski daukan. Bara lukri kan kupi baiwanka witin nani purara batakaia bara upla iwras tasbaya ra âpu daukaia.

¹⁴ Kuna yang nini kulkanka mita daukras katna, saura takaskaia apia tâwan. Baha nisanka nani kaikata, mawanra nahki Idsip wina sakatna ba.

¹⁵ ‘Baku sin upla iwras tasbaya ra pramis takri, yang bui witin nani tasbaya wisi sakri ba ra brih waia apia, sut kau prana ba, bahara nasma bara tiala laya wal lî baku plapi ba;

¹⁶ kan yang lâika nani ba lulkan bamna, witin nani lâika bîla walras, riski yua nani ba bahki daukan, kan kupia nani ba ai aidulka nani ninara wan.

¹⁷ Ban sakuna, umpira kaikri bara sauhki tikaia ba aitani apia kaikri bara upla iwras tasbaya ra âpu daukras kapri.

¹⁸ Baku luhpia nani ra makabri, ai aisa nani makabi ba daukbiara, dîa daukaia wi ba daukbiara, aidul aikuki tâski takbiara.

¹⁹ Wîri: Yang sika man nani Dawan Gâdkam. Lâika bîla ba kat, ulbanka ba kat sin daukbia,

²⁰ bara kulki bribia kasak baku riski yua nani ba, baku tukin kum kaia, man nani bara yang wal. Baku damra walma yang sika Dawan Gâdkam sna ba.

²¹ ‘Sakuna witin nani luhpia nani sin maipara buan. Lâika bîla nani wali daukras kan, dîa daukaia wîni lâka ba sin alki daukras, baha ya daukbia ba raya kabia wîri ba, riski yua nani ba tâski daukan. Lukri yang kupi baiwanka witin nani purara blikaia, bara upla iwras tasbaya ra âpu daukaia, kupi baiwanka lamni daukaia.

²² Kuna alki takaskri nini kulkanka tâka, saura takaskaia apia tâwan, baha nisanka nani kaiki kan, Idsip wina brih sakatna ba.

²³ Upla iwras tasbaya ra yang swer takri, witin nani ba nisan nani tilara tasbaya aiska ra yakabi lakaia.

²⁴ Dîa muni lâika nani ba daukras kan, lâika nani ba bahki kulkan, yang riski yua nani ba tâski daukan bara ai nakra nani ba ai aisika nani aidulka ba baman kaiki kan.

²⁵ Bara lâ yamni apia kat sin, purara mangkaia kapri, bara lâ nani rayaka sip sakaia apia nani sin.

²⁶ Sans yabri tâski takaia, prisantka aidul nani ra yabi, bara pauta ra ai luhpia tawahkia sakripais dauki. Naha daukri sibrin daukbia wisi, bara baku ai tânka bribia yang sika Dawan sna ba.’

²⁷ “Bara man, upla luhpia, Israel luhpia nani ra wis: ‘Naku wisa Dawan ba: Man nani aisikam nani sin kupi sauhkan; yang wal kasak apia kan.

²⁸ Yang pramis takri tasbaya ra yabri diman ba ra, kiahwak kaiki kan kiuhsi kum ba, apia kaka dus tara kum ba, bahara ai sakripaiska nani dauki kan bara prisantka nani yabi kan. Kupi tara pali sauhki ba sika, kîa yamni nani laiki kan bara prisantka nani ba wain ni laiki kan.

²⁹ Yang bui witin nani ra makabi walri: ¿Baha idan tintka watla holikira ba ra man nani aidrubisma ba dîa? Bara baku nina ba naiwa yua kat ban takaskan Idan Tintka Watla Holikira.’

³⁰ “Israel tawanka ra wis: ‘Naku wisa Dawan ba: ¿Dîa muni man nani, almukkam nani baku tâski takaia brinkam sa? ¿Dîa muni yang wal kasak apia sma, aidul yamni kaikras ra mayuni banhwisma?

³¹ Baha prisantka, man luhpiam nani pauta ra angkisma ba, man nani kau ban tâski takisma aidulka nani ba wal. ¿Bara man nani baku brinkam sa ki, Israel luhpia nani, yang ra tânka plikaia aulma ba? Yang, Dawan, rayaki ni swer takisna mai swirika man nani ba yang ra bal diara tânka pliki walma apia.

³² Man nani lamla ra diman, nisan wala nani tasba ra ba baku kaia, dus ra bara walpa ra mayuni ba, kuna baku kabia apia.

³³ Yang, Dawan Gâd, rayaki wal pramis takisni karnika tara bliki ni, bara klala yabamna kupi baiwanka aiska wal; bara sin man nani puramra king aimakamna.

³⁴ Yang sut asla daukamna tawan bara nisan nani tilara yakaban ba wina; karniki tara ba mangki bara kupi baiwanka wal klala yabri ba.

^35-36 Witin nani ba upla iwras tasbaya ra upla nani bâra brih wamni, bara kumi bani mawan kat lâka daukaia winamni, aisika nani ra Idsip tasbaya ra upla iwras tasbaya ra winri ba baku. Yang, Dawan, kasak aisisna.

³⁷ Yang kumi bani ra laki mai kaikamna, sepad baku ai sîpka nani kulki kaiki ba; bara yabrika ai pramiska ra iwbia.

³⁸ Mapara babura bara turbanka dadaukra nani ba wina dakbi mai sakamni, bara nanara upla tasbaya ra iwisma ba wina mai sakamna; kuna witin nani Israel tasbaya ra dimbia apia. Bara baku man nani damra walma, yang sika Dawan sna ba.

³⁹ ‘Israel luhpia nani, Dawan naku aisisa: ¡Man nani aidulkam nani ra mayunaia was...! Sakuna baha ningkara man nani bîli wali daukma, bara yang nini holikira ba kli tâski daukma apia, baha prisantka nani ba yabi aidulkam nani ra puram suni.

⁴⁰ Israel luhpia nani sut ba maiyunbia ilki holikira ra, baha ilka Israel dukiara purara bukan ba, yang kuntriki ra bâra ba. Yang, Dawan, kasak aisisna. Bahara liliakira mai brimni; bahara makabamna prisant nani aikaia, bara brih balaia wimna dusam mâ tawahkia nani dakbi ba bara dîa dîa yang duki aikaia aihka sâkma ba.

⁴¹ Nanara man nani mai yakaban kuntri wala nani ra nisan nani tilara sma ba, baha wina asla mai daukamna ba ra, upla nani sut mawanra holiki lâka man nani tilamra brisna ba marikamna ba ra, baha lika yang bui man nani wina kîa yamni nani angki aikaia prisantka nani ba brimna.

⁴² ‘Bara maikrika man nani Israel ra dimma, baha kuntrika pramis munri kan ba almukkam nani ra; bara man nani damra walma yang sika Dawan sna ba.

⁴³ Bahara kupiam krawbia, nahki man nani diara saura nani daukram ba; bara klauna âmya warbia, saurka nani daukram ba dukiara.

⁴⁴ Israel luhpia nani, yang bui man nani ra dîa mai munri ba, saurkam dukiara lika apia, natkam saura nani dukiara sin apia, kuna yang nini kulkanka tâka, baha ningkara tânka bri banhma, yang sika Dawan sna ba. Yang, Dawan, kasak aisisna.’ ”

Waupasa tani ra klala yaban ba

⁴⁵ Dawan ba yang ra balan bara ai win:

⁴⁶ “Man, upla luhpia, waupasa tani ra taws, bara baha tani ra; yang nini ra waupasa tani tasbaya ra dus nani unta ra pâwan,

⁴⁷ bara wis: ‘Dawan naku aisisa: Yang pauta mukuna dus tara nani ba sut ambia, pâwi ba lâwan nani ba sut. Naha pautika klauhan nani dasras ban ami kabia, bara man nani tilamra upla nani ba sut mawan ambia, yahbra wina waupasa kat.

⁴⁸ Bara tasba aiska kaikbia yang, Dawan sna ba, yang pautika angkri, baha pata klauhan daskbia apia.’ ”

⁴⁹ Yang bui witin ra pana wîri: “¡Alai, Dawan, upla nani aisi taukisa yang lika upla tânka briras sturka baman aisi taukisna!”