Isikiel 15 - DAWAN BÎLA AISKA

Jerusalem ba wain dusa bahki kum baku sa

¹ Dawan bîla yang ra balan bara ai win:

² “¿Diaura kau pain sa, wain dusa plamaya tatka ra, apia kaka dus playa nani tatka ra?

³ Ai plamaya ba diara kum sin daukaia sip apia, ¡bara ban kra kwala pamaika sin paskaia sip apia sa!

⁴ Pauta ra baman lika angkaia sip sa, bara pauta klauhan ba tâ kum angkan bara lila tani ba lika pat masku takan sa, ¿diaura hilp takaia sip sa?

⁵ Âu, dusa aiska kan piua ra diara kumi sin daukaia sip apia kan; ¿nanara aman na ra lika, kau sip kabia ki diara kum ra pan hilp takaia?

⁶ “Baha mita, yang Dawan sna ba, naku aisisna: Wain kiwka plamaya angkaia pauta ra lulki ba baku, yang sin Jerusalem uplika nani ba pauta klauhan ra lulkamni.

⁷ Yang param takamni, witin nani ai waihla kaia. Pauta wina swakwi takbia sin, sakuna pauta wala mita angki âpu daukan kabia, bara baha piua ra, yang, man nani waihlam kaia param takamna; man nani damra walma, yang sika Dawan sna ba.

⁸ Bara kuntrikam ba bîla man, upla iwras tasbaya daukamna, kan yang wal kasak lâka luha kan bamna. Yang, Dawan, kasak aisisna.”