Inanka Nani 3 - DAWAN BÎLA AISKA

Inanka yumhpika ba

¹ Yang sika pât saura wahwan waitnika ba, Dawan kupia baiwanka klalka mununhtara.

² Yang ra ai brih wan tihmu tara tasbaya ra, ai munan ingni âpu yabalka ra watauki kapri;

³ kasak pali witin ba yang maipara tawan sa, bara kli kli sin ai mihta ba, yang maipara lakisa yu aiska ra.

⁴ Witin bui yang wîni taya srikan, wîni tara sin almuk sakan, bara dusi nani sin kriki pîs ra daukan sa;

⁵ witin mita laima kir ba pât tara tahpla pali wal ai kutbi lakan sa;

⁶ witin mita dista tilara aikan buri, patitara pali pruan nani ba baku.

⁷ Kaini kir prakan kutbanka kum dauki bilara ai mangkan, takaia apia dukiara; bara silak kiwka wirha tara ni sin ai wilkan sa;

⁸ yang wini hilp makabri, sakuna ini makabanki nani ba walras,

⁹ wapi luaiki ba walpa tara ni kutbi prakan, ¡yabalki nani ba tnaya walak waia lakan!

¹⁰ Witin ba yang maipara layan kum yukuwi ba baku sa, wingku tara ai alkaia tauki ba baku sa.

¹¹ Witin mita yabal wina tnaya ra ai saki, kurbi ai kalki ai munan, ¡sibrin tara ni banhki ai swin!

¹² ¡Witin ai pantamangkika ba aubi bulkan, bara ai trisbaika kakma ba yang kat kahban sa!

¹³ Dawan trisba lulkan ba, yang kupi munhta kat diman sa.

¹⁴ Yang upliki nani sut mita laiwaska kikaika takri sa; yu aiska ra sin, yang daihra baman aisi swiri daukisa.

¹⁵ Dawan mita tahpla lâka ni ai banhkan sa; baha laya aikan ba sin tahpla pali kan.

¹⁶ Yang naipa nani ba tasba wal prukri; yang ra aikan tasba yamhpuska nani ba samri.

¹⁷ Yang sulki ba kupia kumi lâka wina laihura sakan sa, bara lilia lâka ba dîa sapa sut âiya tiwan sa.

¹⁸ Ban sin yang lukri, Dawan wina karniki briaia, bîla kaikanka bri kapri ba, sut pruan sa.

¹⁹ Kupi krawisa latwanki nani wauhri ba, bara sairka tara ba sin, misbara lâka, tahpla pali ba sin;

²⁰ piu bani baha dukia nani ra kupi krawisa ba ra, yang spiritki ba mâya kat kauhisa.

²¹ Ban sakuna, diara kum baman kupi ra bri kaisna, bara witin ra bîli kaikanka ba mangkamna:

²² Dawan latwanka ba ban kaia ra bâra sa, ai kupia yamnika nani ba sip danh takras.

²³ Titan bani kli raya takisa; ¡nahki tara sa ai kasakka lukanka ba!

²⁴ Bara yang wisni: ¡Dawan ba sika, yang ra diara sut ba; baha mita yang bui witin ra kasak lukisna!

²⁵ Dawan ba yamni sa, ya witin ra kasak luki nani ra, bara ya witin ra pliki nani ra sin.

²⁶ Kanra yamni sa, sâp taki Dawan hilp wan munaia ba bîla kaiki kaia.

²⁷ Kanra yamni sa, upla kau almuk takras ba wina bawaia lâka briaia.

²⁸ Upla ba sâp taki, yakan iwi kaia sa, Dawan mita wirhika witin ai purara mangkisa ba ra.

²⁹ Witin sin ai bîla ba tasba puknika kat mangki bûi kaia sa, ban kra baku bîla kaikanka lâka bâra kabia;

³⁰ ai mawan taya ba yabaia sa witin ra prukbia uplika ra, bara swira daukanka lâka manis sin briaia sa.

³¹ Kan Dawan mita ban kaia ra lulki swin kabia apia.

³² Âu, witin mita upla ra pât saura blikisa, sakuna umpira sin kaikisa, kan witin latwanka lâka ba tara pali bamna.

³³ Kasakka pali ba sika, witin brin daukras sa pât saura ra blikaia, baku sin brin daukras sa upla ra latwan yaia.

³⁴ Kuntri ra silak uplika nani ba umpira kaikras ai mina ni taibi lui kaia,

³⁵ Dawan Laih Purara ba mawan ra, waitna kum ai raitka bri ba wina tnaya ra lakaia ba,

³⁶ lâ kum kasak wapni ba warbi laki saura daukaia ba, baha sut ba Dawan yamni kaikras sa.

³⁷ Ahkia piua ra diara kum aisisa ba ra, diara kum takisa ba ra, baha lika Dawan adarka sa.

³⁸ Baku sin diara yamni bara diara saura nani ba, Laih Purara ba wina aula, witin baku takbia win bamna.

³⁹ Upla ba saura dadaukra kum sa, ¿bamna dîa dukiara brukwi aisisa?

⁴⁰ Kaisa wan daukanka nani ba kli laki kaikaia, bara Dawan ra kli tawi waia.

⁴¹ Kaisa yawan bui kasbrika purara ba Gâdka ra wan lukanka nani bara wan pura sunra nani daukaia.

⁴² Yang nani saura yâri, mampara sin buri, bara man bui wan saurka nani swih tikras kapram.

⁴³ Man kupiam baiwanka wal wan blakram, bara yang nani nini blikram, ¡umpira sin wan kaikras wan ikram!

⁴⁴ Man kasbrika tilara aiblakram, yang nani puri sunra ba walaia apia dukiara.

⁴⁵ Bara yang nani ra dipasta saura baku wan munram, upla nani sut mawanra.

⁴⁶ Waihli nani sut, ai bîla kwâkisa yang nani maipara;

⁴⁷ sibrin lâka, mini pruki kauhaia dukia nani, sauhki tikanka bara aisawi luanka, ¡baha sika yang nani maipara balan!

⁴⁸ Naikra laya awala baku plapisa, tawanki latwankira sauhki tikanka ba dukiara.

⁴⁹ Naikra laya takaskras kira plapisa, baku sin takaskbia apia,

⁵⁰ Dawan mita pura wina tawi wan kaikbia ba kat.

⁵¹ Naikra nani latwanka ba kupi kat dimisa, tawanki luhpia tiara nani ra taki ba dukiara.

⁵² Pât kum sin âpu kira waihli nani ai alkan, sim piawira lupia baku;

⁵³ raya kapri liwanhta kum ra ai bikan bara walpa tara kum purira yakabi ai bikan.

⁵⁴ Lî mita puri aiska ai bikan ba ra, yang kupi ra ban lukri: “Nanara yang lika danh tiwri sa.”

⁵⁵ Yang, Dawan, man ninam mâki winisna, liwanhta kau paknika ba wina:

⁵⁶ man lika yang bîli baikra ba walisma, makabanki nani ba sut man daukisma.

⁵⁷ Yang bui man ra winisna yua ra, man laimara aulma bara ai wisma: “¡Si bripara!”

⁵⁸ Dawan, man mita trabilki nani tilara tâ baikanka aikisma, bara rayaki swaki sakisma.

⁵⁹ Dawan, man kaikram, yang ra nahki saura ai munan kan ba; ¡bamna man mita yang trabilki nani ba lâka dauks!

⁶⁰ Man kaikisma witin bui pana ai munaia ai brinka ba, bara ai kupia wina kunin paski, maipara ai munaia bri ba.

⁶¹ Wals, Dawan, swiri dauki bara witin nani ai kupia wina kunin paski, maipara ai munaia luki ba.

⁶² Waihli nani aisanka ba sin yu aiska, ban yang maipara baman aisisa.

⁶³ ¡Kaiks nahki witin nani diara dauki ba sut ra, yang na lawaska kikaia dukia kum sna!

⁶⁴ Witin nani ra dîa aibapaia ba kat yas, Dawan, witin nani ai mihta ni dîa daukan ba praiska kat yas.

⁶⁵ Ai kupia nani ba karna sâks diara tânka briaia ba wina, bara yas man lahtubankam ba witin nani purara kabia.

⁶⁶ Dawan, man lawankam ba wal witin nani nina blîks, bara yas witin nani naha tasba mawan wina âpu takbia.