Impakan Sturka 37 - DAWAN BÎLA AISKA

Lâ bakska ba

¹ Lâ auhbaia watla ba Besalel, akasia dusa ni paskan, yarika ba 45 ins, bîla yahpika ba 27 ins, paknika ba sin 27 ins.

² Bara baha ba gul ni lalauban bîla bara lata tani ba sut, bara maisa wila ba gul ribanka ni mâkan.

³ Tnaya walhwal ba ra sin gul ni dus dingkaia untika walhwal paskan, unta wâl tnaya kum ra, tnaya wala ra unta wala wâl.

⁴ Baha purkara dingki alki twilkaia dusa nani sin paskan akasia dusa ni, bara taya ba gul ni lalauban.

⁵ Bara dusa nani ba lâ auhbaia watla paskan ba tnaya ra untika bâk dingkan, buki twilkaia dukiara.

⁶ Witin sin baha pura prakaika kum gul ni daukan, yarika ba 45 ins, bîla yahpika ba 27 ins kan,

⁷ bara gul amar ni pruki, insal wâl lilka dauki pura prakaika tâ wâl ba ra prakan.

⁸ Tâ kum ra insal kumi, insal wala ba tâ wala ra kata. Aiska angkaia watla, tâ wâl ba wina, insal wâl ba saki paski daukan kata.

⁹ Baku insal nani ba, ai mawan kat, ai nakra ba mâyara kaiki kan, ai tnawa ni pura praki bri kan. Insal nani mawan ba, kumi wala tani ra kata, bara witin nani aiska angkaia watla ra kaiki kata.

Brit nani kahbaia tibilka ba

¹⁰ Besalel kli akasia dusa ni tibil kum paskan; yarika ba 36 ins, bîla yahpika ba 18 ins, mina yarika ba 27 ins.

¹¹ Bara gul aihwa ni aiska ba lalauban kata, tibil un kir ba gul ribanka ni mangkan;

¹² bara tibilka un pura bâk 3 ins mangkan, baha sin gul ni lalauban.

¹³ Bara gul ni dus dingkaia unta walhwal daukan, baha nani ba tâ walhwal ra mangkan kata mina kumi bani ra.

¹⁴ Tibilka un ba 3 ins mangkan ba, munhtara unta nani ba mangkan ba ra, twilkaia dusa nani ba baha untika ra dingkan.

¹⁵ Tibilka twilki brih waia dusa ba akasia dusa kata, bara taya ba gul ni lalauban.

¹⁶ Bara wark daukaia dukia yus muni nani sut, tibil purara suni swin kata: plit, ispan, lî watla bara kâp nani, wain laiki prisantka yaia watlika nani ba sut, gul ni paskan.

Kiandil angkaia watla gul ni daukan ba

¹⁷ Witin sin, kiandil bapi angkaika ba gul ni paskan. Amar ni pruki daukan: mina ba, dusa plamaya, kapka nani, tangnika, pîska nani sut slilki praki kumi daukan.

¹⁸ Tnaya ba wina, klahkla nani matlalkahbi sakan kan, tnaya kum ra klahkla yumhpa, tnaya wala ra yumhpa.

¹⁹ Klahkla matlalkahbi kumi bani, alhnika dingkan ba wina, kâp baku yumhpa bâra kan, kum ba amans tangnika baku, tangnika baiwisa, slaunhka ba sin,

²⁰ kiandil angkaika ba ra sin, kâp sâtka walhwal kata, amans tangnika baku, tangnika baiwisa, slaunhka sin.

²¹ Klahkla nani matlalkahbi ba kumi bani kakauka munhtara, kâp talia kum bri kata.

²² Kâp nani ba, klahkla lila dusa ba wal, slilki prakan kata, baha nani sut gul amar ni pruki daukan.

²³ Lamp nani kahbaika 7 ba, pauta turbaika nani ba, yamhpus auhbaika ba sut, gul ni daukan.

²⁴ Kiandil angkaika ba bara wark wala daukaia dukiara, gul aihwa 75 paun brih, baha ni paskan.

Kîa pain angkaia altarka

²⁵ Kîa pain angkaia altarka watla ba sin, Besalel paskan, akasia dusa ni, yarika ba 18 ins, bîla yahpika ba sin 18 ins, paknika ba 36 ins. Aringka nani ba sin slilki praki pîska kumi daukan.

²⁶ Baha pura aiska ba gul ni lalauban kata. Pura bika ba, tnaya walhwal ba, aringka nani ba sin, gul ni lalaubi ribanka daukan kata.

²⁷ Witin sin gul ni skahkanka unta walhwal daukan, tibilka un ba munhta kat mânka, tnaya kumi ra wâl, tnaya walhwal, baha untika nani bâk dus nani ba dingki twilkaia dukiara.

²⁸ Baha dusa nani ba akasia dusa ni daukan, baha sin gul ni lalauban.

Yukaia batanka sunukira ba

²⁹ Bamna Besalel mita yukan batana sunukira ba bara kîa yamni angki yamni daukaia batanka ba sin, kîa yamni dadaukra nani dauki ba tânka kat.