Impakan Sturka 36 - DAWAN BÎLA AISKA

¹ Baku bamna, Besalel bara Oholiab, bara waitna wala nani ba sin diara nani paskaia sinska bri ba, Dawan wina sins lâka brin bara diara tânka kaikaia daukan ba, Dawan watla ra dîa warkka daukaia tânka bri ba, baha nani warkka sut daukbia, Dawan adar win ba kat.”

Upla nani ba prisant ailal pali bri balan

² Bamna Moses, Besalel, Oholiab wal ra paiwan, bara waitna wala nani diara papaskra nani ba sin Dawan mita sins lâka lukanka ra mangkan nani kata ba, upla nani sut sin kupia bukan baha warkka daukaia aidrubi balaia.

³ Bara witin nani lika Moses mihta wina prisantka nani ba brin, Israel luhpia nani bri balan ba, bara utla mâkaia warkka ba mahka bukan. Bamna upla nani lika takaskras, ban yu bani kau ai kupia param ni diara brih balan. Bara upla nani ba titan bani kau ai kupia aiska ni diara brih bali kan mana luha.

⁴ Âuya mâira nani Dawan wal aisaia watla mâki kan ba, ai warkka nani dauki kan ba swi si, aidrubi wan,

⁵ bara Moses ra win: “Dawan mita wark daukaia wan win ba daukaia dukiara, upla nani ba diara ban pura lui brih aula.”

⁶ Bamna Moses upla nani saki blikan, kiamp aiska ra maisa pakaia, waitna bara mairin nani Dawan sut wal aisaia watla ba mâkaia dukiara, kau diara brih waia apia win.

⁷ Bamna diara ailal bri balan ba purara, kau pura lui bri balan kata.

Dawan wal aisaia watla ba paskan

⁸ Wark dauki nani ba tilara, kau âuya mâira nani kan ba witin nani mita Dawan watla ba paskan. Pamaia kwalka matawalsip daukan, linin maman, kwala blu, kwala paura, bras kwala pauni pali sâtka ni, kwalka nani maman ba tilara insal nani lilka sin wâl daukan.

⁹ Pamaia kwalka kumi bani yarika ba 14 yar bri kan, bîla yahpika ba 2 yar bri kan, bamna pamaia kwalka nani sut ba lika, ai yarika bara ai yahpika ba wal kumi kata.

¹⁰ Pamaia kwalka matsip ba praki kumi daukan, bara matsip wala ba sin asla praki kumi daukan.

¹¹ Pamaia kwalka ra unta ba munhta tani ra, kakawa blu ni mangkan. Baku sin pamaia kwalka wala ba sin, baku daukan mahta ra.

¹² Pas pamaia kwalka ra kakawa unta 50 daukan, bara kli 50 kakawa wala nani dauki pamaia kwalka un ra mangkan. Kakawa untika nani ba, kakawa wala untika nani ba wal praki wilkan.

¹³ Bamna pîn nani 50 gul ni daukan, baha ba pamaia kwalka nani kum dukiara, baha ba pamaia kwalka wala nani ba wal asla wilki prakaia dukiara. Bara baku sika Dawan watla ba mâkan kan ba.

¹⁴ Bara Besalel guts tâwa nani ba brih, pamaia kwalka nani 11 paskan, baha ni Dawan pura prakaia dukiara.

¹⁵ Pamaia kwalka kumi ba bîla yahpika ba 15 yar bri kan, yarika ba 2 yar bri kan, baha pamaia kwalka 11 ba sut lika, yarika yahpika sut ba kumi kata.

¹⁶ Kwalka nani matsip ba, praki tara kumi sipan, wala matlalkahbi ba sin, praki tara kumi sipan.

¹⁷ Bara pamaia kwalka ba un ra, kakawa unta 50 mangkan, kakawa wala 50 nani ba lika, pamaia kwalka tara wala ba un ra mangkan.

¹⁸ Baku sin bras ni pîn nani 50 daukan, baha ba utla papakni pîska nani ba asla prakaia ba dukiara.

¹⁹ Bara watla bahna ba pura prakaia dukiara, sîp wainhka taya mapla pauni ni Besalel ba daukan, bara taya wala kau pain ba sin daukan pura tani ba prakaia dukiara.

²⁰ Baha purkara, Dawan watla ba dukiara akasia dusa ni tat nani daukan bara wapni pali daukan.

²¹ Tatka nani yarika ba kumi bani 15 pît bri kan, bîla yahpika ba 27 ins bri kan,

²² tat bani un wâl ba kusban kan, baha un nani ba wala wal bri si prakaia dukiara. Dawan watla tatka sut un nani ba baku baman daukan.

²³ Bamna waupasa tnaya ba tatka nani yawanaiska kum kau daukan,

²⁴ bara baha tat mununhta karnika alkaia ba, silbar ni playa yawanaiska wâl dauki mangkan. Tat kumi bani ba playa wâl purara bapan, un wâl ba praki alkaia dukiara.

²⁵ Watla tnaya wala yahbra tani ba dukiara, tat wala yawanaiska kum kusban,

²⁶ munhta karnika playka ba silbar ni daukan, tat bani munhtara karnika alkaia ba dukiara.

²⁷ Watla muna tani ba dukiara, tat matlalkahbi ridi daukan,

²⁸ watla kraunka wâl ba dukiara tat wâl brin.

²⁹ Baha tatka nani tâ ba mâya wina pura kat, tâ nani ba praki kan, tâ nani dingkaika untika ba kat. Baha kraunka tat wâl ba, wâlsut tâ nani ba baku dingkan,

³⁰ bahamna tat nani 8, mununhta karnika playka 16 silbar ni daukan ba, tat nani kumi bani ba playa wâl purara bapan.

³¹ Besalel sin akasia dusa ni dus nani matsip paskan, utla tnaya kum tatka nani ba alkaika,

³² dus wala matsip daukan, watla tnaya wala tatka nani alkaia dukiara kli dus matsip wala ba daukan watla muna tani tatka nani ba alkaika.

³³ Bara lilapas ra dusa ba tat nani bâk dingkan lui wan, tnaya kumi wina tnaya wala ba kat.

³⁴ Tat nani ba gul ni lalaubi prakan, dus dingkaika untika nani ba gul ni daukan, baha nani bâk sika dus nani ba dingkan luan ba, baha sut ba gul ni lalauban kata.

³⁵ Baha purkara pamaia kwalka mapla blu, paura, pauni pali, linin pitban sâtka, baha sut ba ai mihta ni paski dauki paman kata, insal nani lilka wâl ba sin.

³⁶ Baha ningkara, gul ni pamaia kiwka nani paskan ba brin, bara kwala nani ba paman, baha playa walhwal silbar playka pura bapi gul ni lalauban.

³⁷ Tint watla ra dimaia durka ra dimaia kwalka ba sin daukan mapla blu, paura, pauni pali bara linin pitban ba ni.

³⁸ Baku sin playa matsip daukan, pamaia pînka nani sin, bara munhta karnika playka bras ni daukan ba matsip kata; bara playka nani ba gul ni lalauban, playka ra unta nani ba sin taya ba sut baku lalauban.