Impakan Sturka 34 - DAWAN BÎLA AISKA

Walpa tanhta wala nani ra lâ ba kli ulbi yan

¹ Bara Dawan mita Moses ra win: —Man mita walpa wâl klaks, pas walpaya kata ba yahpika baku. Bara pas walpa tanhta nani ra ulbri kan man mita kriki tikram bîla nani kata ba, kli ulbamna.

² Bamna yauhka daukaia dukiara mahka bus, bara titan ra Sainai ilka ra uli was, il bahna ra uli yang maiwanra bus.

³ Upla wala man wal uli wabiara, il aiska ba ra upla kumi sin wabiara, sîp nani bara bîp nani sin bahara twi pi kabiara.

⁴ Bara Moses walpa tanhta wâl klaki lalalni daukan, pas kata ba yahpika wal baku. Bara titan pali bûi mahka Sainai ilka ra uli wan, Dawan win ba kat, bara ai mihta ra walpa tanhta wâl ba bri kata.

⁵ Bara kasbrika kum ra Dawan bal iwan, bahara Moses wal takaskan, bara Dawan ai nina ba mâkan.

⁶ Moses mawanku lui, ai bîla baikra tara buki win: —¡Dawan ba! ¡Dawan ba! ¡Gâd kupia swapni umpira kaiki ba, ai kupia alki takaski, latwan kaikaia lâka tara bara kasakka lâka sin bri ba!

⁷ Upla kiamka tausin nani ra ban ai latwanka lâka bri ba, bara saurka nani sin ban swih tiki ba, sakuna pâtkira uplika ba mapara babura taki saura dauki ba, klala yabras ban lika swiras sa, aisika, luhpia, mulika, snawika, usbaika nani kat kulkan sa.

⁸ Moses baha wali, ai mawan ba tasba kat bri si prakan, bara Dawan ra ai pura suni mayunan:

⁹ —¡Dawan! ¡Dawan! Rait pali man bui yang ra yamni ai kaikisma kaka, yang nani wal was. Kasak pali naha uplika nani na kiamapara sa, sakuna yang nani saurki watawiki lâka nani ba ban swih tiks, bara uplikam nani pali baku ban wan bris.

Lâ ba kli raya daukan

¹⁰ Dawan bui witin nani ra win: “Man nani aman wals: yang lâ kum nanara daukri upla sut mawanra. Wark aihka kum daukaisna, naha sât warkka aihka na naha tasba ra nisan wala nani tilara kau daukras sna; man nani tilamra upla nani ailal ba kaikbia, Dawan dîa daukbia ba. Bamna yang daukaisna ba, wark aihka diara tara kabia.

¹¹ “Naiwa lâ nani mai wimna ba alki bris, bara yang lika man nani mamwan wina amorreo nani, Kenan uplika nani, hitita nani, ferezeo nani, heveo nani bara Jebús uplika nani sin sut sakamna.

¹² “Baha tasbaya ra dimma ba ra, uplika nani ba wal lâ kumi sin daukpara pali, baha mita minam alkaika ra kauhma apia.

¹³ Man nani was bara altar diara angkaia watla bri ba bataks; lilka bahki nani bri ba kriki tiks, walpa ni lilka daukan nani ba sut âpu dauks.

¹⁴ “Lilka bahki daukan kumi ra sin man nani puram suni mayunpara. Dawan ba ai nina tâwan lalawra pali sa, Gâd ai nina tâwan lalawra sa.

¹⁵ “Baha tasbaya ra iwi uplika nani wal lâ kumi sin daukpara. ban kra witin nani gâd bahki nani bri ba ra ai pura sunbia lika, baha gâdka bahki nani ra sin diara angki yabia ba ra, man nani ra sin mai paiwbia baha gâdka ra angki yan ba wina piaia,

¹⁶ apia kaka luhpiam mairin nani bara luhpiam waitna nani ba sin bribia, witin nani ai luhpia waitna ai luhpia mairin nani ba wal maya baikaia, bara gâd bahki nani nina bliki watawi daukbia.

¹⁷ “Piu kumi sin man nani mihtam ni gâd bahki slilki paski dauki bripara pali.

Mani bani lilia daukaia yua tara ba

¹⁸ “Brit îs mangkras dauki yua liliaka ba dauki bas, dîa daukaia mai wîri ba kat, wik kum brit îs âpu dauki pi bas. Abib katka yua mangki maikri ba kat, man nani Abib katka ra sika Idsip wina taki balram ba.

¹⁹ “Luhpiam tawahkia bani aisubi taki ba, yang ra aikaia sma. Baku sin bîpkam nani tawahkia ba, sîpkam tawahkia ba wainhka bani ba sut yang ra aikaia sma.

²⁰ Bara biriku nani luhpia baikbia taim, biriku tawahkia bani ba mana sîp wainhka lupia kum aikbia, apia kaka guts wainhka lupia kum aikbia; aikras kabia kaka, nana dusa ba krikbia. Luhpia waitna tawahkia kumi bani ba mana, prisantka sakripais kum daukaia sa. Upla kum diara aikras kaka, maiwanra balbiara.

²¹ “Yu matlalkahbi warkkam takma, sakuna yu 7 ra lika wark takma apia, ris brima, insla mangkaia apia, baku sin insla dâkaia piua kabia sin, diara daukpara.

²² “Wik nani liliaka ba dauki banhs, plawar mâ tawahkia nani dâkaia ba, mani tnata ra insla dâkan yua ba sin.

²³ “Mani bani waitna nani sut lika, aima yumhpa Dawan, Israel Gâdka mawanra wih buan kaia sa.

²⁴ Nisan wala nani ba, man nani mamwan wina kangbi sakamna. Bara man nani tasbayam lainka ba kau kitbamna, baku mika upla kumi sin tasbayam ba ai dukia wisi bribia apia. Man nani mani bani aima yumhpa, Dawan Gâdkam mawanra wih buaia sma bamna.

²⁵ “Daiwan angki alkisma tâlia ba, bara brit îs mangki angkan ba wal aikpara. Insal luan Liliaka daukaia ra, daiwan ikan wîna kau tawan ba, yauhka dukiara swipara.

²⁶ “Man nani plun mangkram ba wina tawahkia mâ kau pain ba, Dawan Gâdkam watla ra brih waia sma. “Guts lupia nani ba, yaptika tialka laya ra piaki banhpara.”

Moses lâ ba ulban

²⁷ Bara Dawan bui Moses ra win: “Man naha bîla nani na uls, kan naha bîla nani ba kat yang bui man wal bara Israel uplika wal sin lâ daukisna.”

²⁸ Bara Moses lika Dawan wal bahara yu yawanaiska wâl bara tihmia yawanaiska wâl takaskan, witin plun piras lî sin diras kan. Bahara lâ daukan bîla nani ba walpa tanhta nani ra ulbi kan, lâ nani matawalsip ba.

²⁹ Baha ningkara Moses Sainai ilka wina iwi aula kan, lâ daukan ulban walpaya tanhta wâl ba ai mihta ra brih. Sakuna witin ai dahra walras kan, Dawan wal aisi kan ba ra ai mawan ingni takan kan ba, bara witin baku iwi aula kan.

³⁰ Bamna Eran bara Israel luhpia nani sin Moses ra kaikan ba ra, mawan ba ingni pali kan, bara upla nani sut sibrin daukan witin ai lamara waia.

³¹ Sakuna Moses bui witin nani ra winan, bamna Eran bara upla nani sut kli tawi Moses ra balan, bara Moses baha nani ra aisin.

³² Baha ningkara, Israel luhpia nani sut sin Moses lamara aidrubi wan, bara Dawan dîa witin ra win ba, baha lâka sut witin bui upla nani ra win.

³³ Moses upla nani ba wal aisi danh takan ba ra, kwala ni ai mawan ba prakan.

³⁴ Moses lika Dawan wal aisaia auya ba ra, baha kwalka ba ai mawan wina saki kan, witin kli taki auya ba kat. Bara ningkara dîa lâ nani Dawan mita win ba laki, Israel luhpia nani ra maisa paki kan.

³⁵ Israel luhpia nani kaikan Moses mawan ingni taki ba. Witin ai mawan ba kli kwala ni praki kan ba, bara ai mawan pura bikan ba baku ban kan ba, witin kli Dawan wal aisaia auya ba kat saki kan.