Impakan Sturka 32 - DAWAN BÎLA AISKA

¹ Bamna Israel luhpia nani kaikan, Moses il ra wan ba balras ban lap tiwan, bara witin nani Eran ra bal asla taki, naku win: —Man mahka bûi gâd nani paski aik, bara witin nani mita wan tâ brih impakbia; kan Moses, witin Idsip tasbaya wina wan sakan waitnika ba, dîa takan sapa yang nani nu âpu.

² Bara Eran pana witin nani ra win: —Man nani mayam, luhpiam mairin bara luhpiam waitna nani wina sin gul kiama lula nani ba nâra bri bal.

³ Bara upla nani sut ai kiama ra gul kiama lula nani bri kan ba, bri sal Eran ra yan,

⁴ bamna witin gul nani ba brin, bara slilki muni baha ni bîp wainhka lupia lilka kum paskan, bara sut mita aisi, win: —¡Israel, naha sika man nani dawankam, Idsip tasbaya wina mai sakan ba!

⁵ Eran baha kaiki, bîp lupia lilka ba mawan kat altar kum paskan bara karna aisi, naku win: —Yauhka yawan bui Dawan ra pain kulki lilia tara daukbia.

⁶ Yu wala titan witin nani bûi banhwan ba ra, daiwan aiska angki sakripais daukan, bara kli wal ai uplika takaia lâka sakripaiska ba sin daukan. Bara upla nani ba iwi plun pin, diara sin di banhwan. Baha ningkara bûi banhwan, puli lilia briaia.

⁷ Bara Dawan bui Moses ra win: —Man mahka mâyara was, man uplikam nani Idsip tasbaya wina sakram ba, witin nani saura daukisa.

⁸ Witin nani lika yang yabalki marikri ba wina tnaya ra tawan sa. Witin nani bîp lilka kum paski, bahara mayunisa, sakripais sin angki daukan, bara witin nani sin aisisa: ‘¡Israel, naha sika dawankam ba, Idsip tasbaya wina mai sakan ba!’

⁹ Baha purkara, Dawan bui Moses ra win: —Baha purkara, yang mita kaikisna naha uplika nani na kiama karna nani sa.

¹⁰ ¡Bara nanara ai takaskpara, aikrika kupi baiwanka witin nani purara bri balamna, bara âpu daukamna! Sakuna man kiamkam ba lika nisan tara daukamna.

¹¹ Ban sakuna, Moses naha bîla nani aisi Dawan kupia baiwanka ba daskaia trai munan: —Ay, Dawan, ¿dîa muni kupiam baiwanka ba uplikam nani purara bri balma, man mihtam karnika wal witin nani ba Idsip tasbaya wina sakram apia?

¹² ¿Nahki ban swirka Idsip uplika nani ba aisi wibia: ‘Lukan saura wal Dawan baha uplika nani ba sakan, baha nani ba sut il ra bri si iki tikaia, naha tasba mawan wina diki âpu daukaia?’ Bara kupiam baiwanka ba swis, uplikam nani ra saura munaisma ba takasks.

¹³ Albikam nani, Ebraham, Aisak bara Israel luhpia nani ba kupiam krauks, man mita swer taki witin nani ra aisi wisatma ba: ‘Yang bui man nani kiamkam ba, slilma ailalka kasbrika purara ba baku ailal daukamna; bara naha tasbaya aiska man nani ra maikaia mai wisna na, witin nani ai tasbaya yabamna ban kaia ra.’

¹⁴ Bara Dawan bui ai uplika nani ra saura munaia lukan ba, ai kupia wina sakan.

¹⁵ Bara Moses il wina bal iwan, witin ai mihta ra walpa tanhta wâl ba bri kan, baha nani tnaya wâl ra lâ ulban kan.

¹⁶ Walpa tanhta ba Dawan mita daukan kata, bara ulbanka ba sin Dawan mita ulban kata.

¹⁷ Upla nani yahwi kan ba Jasua walan ba ra, Moses ra win: —Aiklabanka winanka nani kiamp ra ba walisa.

¹⁸ Sakuna Moses pana witin ra win: —Apia, baha binka ba aiklabi pura luan binka apia sa, witin nani ra waihla mita pura luan sarka bri binka sin apia sa, sakuna lawana binka sâtka wala yang walisna.

¹⁹ Moses kiamp ba lamara wan ba ra, kaikan bîp lilka daukan kan ba, bara dans puli banhwi kan ba sin. Bamna Moses kupia baiwan bara il playa kat ai mihta ra lâ nani ulban walpaya tanhta wâl bri kan ba lulki saban bara baiwi pîs pîs takan;

²⁰ bara bîp lilka daukan kan ba alki pauta ra lulkan, bara saki mil ra mangki wauhan, yamhpus takan ba kat. Bara yamhpuska ba lî purara yakaban, bara Israel luhpia nani ra munan laya ba upla sut di banhwan.

²¹ Baha ningkara Eran ra win: —¿Upla nani na mita dîa mai munan kan, naku yaram witin nani saura tara kum dauki banhwan na?

²² Eran pana witin ra win: —Dawanki, yang ra kupiam sauhkpara. Man upla nani na tânka kasak kakaira sma, witin nani saura daukaia nahki lihki ba.

²³ Yang ra ai wi banhwan: ‘Yang nani ra gâd kum dauki aik, witin mita wan tâ brih wabia, kan naha Moses Idsip tasbaya wina wan sakan ba, yang nani tânka briras witin ra dîa takan sapa.’

²⁴ Yang bui witin nani ra wîri: ‘Ya gul bri ba sut tnaya ra lakbia.’ Witin nani sut baku dauki mihti ra mangkan, bara yang baha nani sut ba pauta ra mangkri bara naha bîp lupia lilka na bal takan.

²⁵ Moses kaikan upla nani ba sip ai dahra walras pali, ban yaka ai waihla nani mita ai lawaska kikaia daukan, baha purkara Eran mita sin tâ baikan baku daukaia,

²⁶ bara Moses kiamp durka kat buan bara win: —Ya nani Dawan wal sma kaka, yang laimara balma. Bara Libait nani sut lika Moses lamara wih bûi banhwan.

²⁷ Bara Moses bui witin nani ra naku win: —Dawan, Israel Gâdka ba, naku aisisa: ‘Man nani kumi ba sord ba alkma, bara kumi kiamp ra kli tawi wama. Man nani muihkam ba ikma, lamara iwi nani ba, uplikam nani ba sin sut ikma.’

²⁸ Libait nani sut ba Moses dîa win kat bîla wali daukan, bara baha yua baman 3,000 upla ikan.

²⁹ Bara Moses Libait nani ra win: —Naiwa man nani bui Dawan mawanra karnika aiska laki briram, man nani tila luhpiam mapara buram, tila muihkam mapara buram. Baku bamna, naiwa Dawan ai yamnika maikbia.

³⁰ Baha yua wala ra, Moses upla nani ra win: —Man nani saurka tara pali kum dauki banhram sa. Yang nanara kli uli wamna Dawan ra, man nani saura daukram ba ban swih tikaia daukamna sapa.

³¹ Bamna Moses kli Dawan ra wan, bara naku win: —Rait pali naha uplika nani na saurka tara kum daukan sa, kan witin nani gul ni gâd kum paskan ba mita.

³² Yang bui man ra puri sunisni, witin nani saura daukan ba ban swih tikma, sakuna witin nani pâtka ba ban swih tikras sma kaka, yang nini ulbram ba wauhkamtaya wina diki sâks.

³³ Sakuna Dawan bui Moses ra pana win: —Ya yang maipara saura daukan ba nina baman dikamna wauhkataya wina.

³⁴ Bamna nanara, man mahka was, uplika nani ba baha pliska brih waia mai wisatna ba ra brih was. Yang insalki tâm bri wabia. Klala yabaia yua ba balbia ba ra, witin nani saura daukan ba mana yang klala yabamna.

³⁵ Bara Dawan mita witin nani purara klala kum blikan, Eran gul ni bîp lupia paskan ba ra mayunan ba tâwan.