Impakan Sturka 30 - DAWAN BÎLA AISKA

Kîa yamni angkaia altarka ba

¹ “Akasia dusa ni altar kum paskma, bahara dus mâka kîa yamni angkaia.

² Tâ walhwal ba yarika kum bri kabia, yarika ba 18 ins kabia, bîla yahpika ba 18 ins, purara 36 ins kabia, aringka nani ba lika wal praki paskan kabia.

³ Gul ni pura lalaubi prakan kabia, pura prakaika ba, tnaya kir walhwal bara aringka nani ba sin. Bara tnaya kir un nani ba gul ni ribanka mangkan kabia.

⁴ Gul ni, dus dingkaika untika wal paski, ribanka ba mununhtara mangks tnaya sait wâlsut ra, untika bâk twilkaika dusa nani ba dingkan kabia.

⁵ Baha dusa nani ba akasia dusa ni daukan kabia, bara gul ni lalaubi prakma.

⁶ Bara altarka ba bri si, lâ nani auhbaika watla ba mawanra kwala paman ba kat bri si swibia, man nani yawan wal prawaia pliska ba kat.

⁷ Titan bani, Eran lamp nani ba klin dauki ba ra, witin dus mâka kîa yamni ba bahara angki kabia, baha diara angkaia watla ba purara.

⁸ Tutni ra sin kîa yamni angki kabia lamp angkaia aula ba ra. Piu sut ban baku dauki kabia Dawan mawanra, takaskras kira.

⁹ Baha altarka ba purara diara wala angkbia apia, wîna aiska angkaia dukia kabia kra. Prisantka wala nani kabia kra, baha purara wain sin laikan kabia apia.

¹⁰ Altarka na Dawan baman altarka kaia, aihka sakan kabia. Mani kumi bilka ra aima kumi, Eran mita baha aringka nani ra, sakripais daukan tâlia ba laiki, pura sunra bri balbia, saura daukan nani ba ban swih tikaia, bara saurka swin tikan lâka ba alkaia.”

Wan rayaka mana aibapan ba

¹¹ Dawan ba Moses ra aisi, naku win:

¹² “Man bui Israel luhpia nani sut ba kulki kaikma ningkara, witin nani kumi bani Dawan ra ai rayaka pri sakan ba mana diara yabaia sa. Baha mita kulki kaikan bamna, pruaia sikniska witin nani kumi ra sin alkan kabia apia.

¹³ Baha nani ai nina ulbi bani, silbar silin kum Dawan ra yan kaia sa, tempel lalahka kulkanka praiska kulki ba wina bakriki prais.

¹⁴ Ai nina ulban uplika nani sut, 20 mani wina ai purara ba, Dawan lalahka aibapbia.

¹⁵ Bara baha uplika kumi bani rayaka, Dawan mita swaki sakan mana yabia ba, yuyakira kabia, upla umpira kabia sin, sut silbar silin kumi baman yabaia sa.

¹⁶ Baku bamna silbar nani ba man brima, Israel luhpia wina yabi ba rayaka swaki sakan mana, baha bri si Dawan wal prawaia watla ra yama, wark nani dauki ba ra yus munaia. Baha ba Dawan mawanra kabia, witin bui Israel luhpia nani ra ai kupia krauki kaia.”

Bras ni daukan bisinka

¹⁷ Dawan ba Moses ra aisi, naku win:

¹⁸ “Bras ni bisin kumi paskma, bara sunaika sin bras ni paskma, bahara diara sikbaia dukiara; Dawan wal prawaia watla altarka ba wal lilapas ra bri si, lî laiki banhki swis.

¹⁹ Bara baha laya wina, Eran luhpia nani lî saki ai mihta bara ai mina nani ba sikbi kabia.

²⁰ Ai mihta bara ai mina nani pas sikbia, tint watla ra dimaia auya ba ra. Altar ba lamara wabia, diara angki Dawan ra yabaia. Baku lika witin nani prubia apia.

²¹ Bahamna ai mihta bara ai mina nani sin sikban kabia, baku lika prubia apia. Naha na lâ kumi daukan sa, baku dauki ban kaia, Eran luhpia nani bara ai kiamka nani sut dauki kaia sa.”

Aihka sakaia laiki batanka ba

²² Dawan ba Moses ra aisi, naku win:

²³ “Man mita wahbi saki bris dus wahia nani kau kîa pain ba: sîka mâka kîa kau painkira ba 12 paun, sinimint kîa kau pain ba 6 paun, dus taya kîa kau pain nani ba 6 paun,

²⁴ kasia laya tint watla ra yus muni ba 12 paun bara oliv batana gialan kum.

²⁵ Bara baha nani sut ba ni, batana kîa painkira nani dadaukra dauki ba baku daukma, lal ra laikaia batanka daukma. Naha batanka na lika Dawan bamna dukia aihka saki ba purara laikaia baman batanka.

²⁶ Baha batanka ba ni holi pliska bara lâ nani auhbaika watla ba purara laikbia,

²⁷ tibil bara wark daukaia dukia nani ba sin, lamp watla nani bahara wark daukaia dukia nani ba bara kîa yamni angkaia pliska ba sin;

²⁸ altar daiwan aiska angkaia pliska ba, bara bahara wark daukaia dukia nani ba, lî bisin ba bara mina playka ba sin.

²⁹ Baku diara sut ba sunu sâkma, bara baku lika, diara sut, baha dukia nani ra kangbi, upla sin kangbia ba sunu daukan kabia.

³⁰ “Eran bara luhpia nani ba sin, baha batanka ba ni laikma, bara sunu taki banhbia, bara yang prîski nani kabia,

³¹ bara Israel luhpia nani ra naha aisi wima: ‘Naha batanka na sika sunu sakaia dukiara, natka baku dauki ban kabia.

³² Upla wala nani purara naha laikpara, bara naha batana miks munram na, baku batana wala nani ba miks munpara. Naha batana na sunu sa, bara aihka sunu saki kulki kama.

³³ Ani uplika kum naha batanka miks munan na baku batana wala daukbia kaka, apia kaka upla wala kum purara laikbia kaka, witin lika man nani tilam wina sakan kabia.’ ”

Awas dusa sâtka mâka kîa yamni ba

³⁴ Bara Dawan mita Moses ra win: “Naha dukia nani wina kum ba, dîa praiska alkuma sa kaka, sut ba baha praiska alks: dus mâka, dus taya kîa damni ba, dus nani mâka kîa damni ba,

³⁵ bara baha nani ba bri pain miks muni isint papaskra kum, ai isintka nani pain paski ba baku kîa damni holi dauks.

³⁶ Baha wina wirâ bris, bara akbi sitni pali daukma, ningkara lâ nani auhbaika watla ba tani ra swima. Tint watla ra, yang maiwanra, upla nani yang prawaia ulaika lamara, naha kîa pain angkaia dukia na kanra sunu kulkan kabia.

³⁷ Bara man dukiam briaia wisi, kîa pain angkaia naha miks muni daukram na, baku daukpara. Naha na Dawan dukia kulkan sa, man mita sin sunu kulkaia sma.

³⁸ Ani uplika witin ai dukia kîa pain angkaia wisi naku daukbia kaka, witin ba ai uplika nani tila wina diki sakan kabia.”