Impakan Sturka 29 - DAWAN BÎLA AISKA

Prîs nani wark ra mangkaia ba

¹ “Yang prîski nani mangkaia lâka ba, naku daukaia sma, naha adarka nani na witin nani wal daukaia sma: bîp wainhka sirpi kum bara sîp wainhka wâl brima, baha lika sunu nani ba.

² Plawar kau pain ba brima, oliv batana laiki brit daukma. Tila brit nani ba, îs mangkras, wala nani ba sin. Turtiya nani sin daukma îs âpu, bara damni taya purara laikma.

³ Baha ba baskit kum ra mangks Dawan watla ra brih waia, bîp wainhka bara sip wainhka nani ba sin.

⁴ Ningkara Eran ra brih was bara luhpia nani ra sin tint watla dimaika ra, bara yas aihtabi klin takbia.

⁵ Baha ningkara prîs prâka nani ba bris, Eran ra yas dimbia prâka sut ba. Lama prakaika aiska ba, baha purara prakaika ba, lama prakaika mununhtara dimaia pîska ba, bara maisa wila wilkaika ba ni maisa wilkma.

⁶ Lal ra wilkaika ba lal ra wilkma, bara gul pali pruki tanta dauki bahara ulban ba pîska ba sin, lal ra wilkma, baha mita prîs sunu saki ba.

⁷ Bara sunu sakaia batanka ba bris, bara baha Dawan prîska Eran lal ra laiki sunu dauks.

⁸ Eran luhpia nani ba sin bri bal yas ai prâka nani ba dimbia.

⁹ Eran ra bara luhpia nani ra sin maisa wila ba wilkma, bara lal ra wilkaika ba sin wilkma. Bara baku natka ra karnika aiska yama, upla sut kaiki kaka, bara witin ai prîska lâka daukan ba baku ban kabia.

¹⁰ “Baha ningkara bîpka wainhka lupia ba tint watla kat brih wama, bahara Eran ai luhpia nani aikuki ai mihta lal ra kahbia,

¹¹ bara baha Dawan mawanra buaia watla dimaika ba kat bîp lupia ba ikan kabia.

¹² Bara bîpka tâlia ba ai mihta tâura buski, altar aringka nani ba yûkbia, baha ningkara lama kir tala ba laikbia.

¹³ Biara sirpika ra, âuya ra, kiskamka ra, batanka nani ba sut saki altar purara angkma.

¹⁴ Sakuna bîpka wîna ba, taya bara kânka ba sut kira, latara saki angkan kabia, baha ba saurka mana, sakripaiska daukan bamna.

¹⁵ “Bara sîp wainhka wâl ba wina kumi bris, Eran ai luhpia nani aikuki sîp lupia ba lal ra ai mihta nani kahbia.

¹⁶ Bara sîp wainhka ba iks, bara tâlia ba diara angkaia pliska tnaya kir ra laiks.

¹⁷ Baha ningkara pîs sirpi nani ra klaks, biara sirpika, mina nani ba sikbaia sma, kuhma nani ba sin. Wîna pîs sirpi nani ba lal ba wal asla daukbia.

¹⁸ Bara daiwan aiska ba altar ra suni angkbia, baha kîa yamni ba Dawan ra yamni kulki prisantka yabia.

¹⁹ “Bara sîp wainhka lupia wala ba, Eran ai luhpia nani aikuki ai mihta nani lal ra kahban kabia.

²⁰ Sîpka ba ikbia bara tâlia ba wirâ brin, Eran bara luhpia nani kiama aihkika untika ra yûkma, mihta aihkika kulkaika tâura, bara mina aihkika wihtka ba ra sin yûkma. Ningkara tâlia kau ba altar purara bara tnaya kir laikma.

²¹ Bara altar purara tala swin ba bara srikbi sunu daukaia batanka laya swin ba sin wiria bris, bara Eran purara, bara prâka ba purara sin srikban kabia, baha purkara, Eran luhpia nani purara, prâka purara sin. Bamna Eran bara luhpia nani ba sut prâka nani ba sunu daukan kabia.

²² “Bara sîp wâika ra batanka nani ba, biara sirpika batanka ba, âuya ra batanka, kiskamka wâl ba sin, batanka nani sut bris, kuhma aihkika ba, kan baha sîpka ba prîs nani ba sunu daukaia sîpka bamna.

²³ Baku sin brit îs âpu daukan baskit ra bâra ba Dawan mawanra, baha wina krukma ba kumi brima. Bara brit oliv batana wal akbi angkan wina sin brima, brit damni ba sin brima.

²⁴ Baha nani sut ba, Eran bara luhpia nani mihta ra mangks, bara witin nani mita Dawan ra prisantka yabia.

²⁵ Baha ningkara dukia nani ba, witin nani mihta wina saki altar ra suns, daiwan aiska angkaia wîna pliska ra swis, kîa yamni Dawan ra yabaia. Baha lika prisant kum Dawan ra yamni kulki yaban sa.

²⁶ “Baha sîpka angkan ba lama dusa ba bris, bara baha sin Dawan ra prisantka yama, Eran ba baku sunu daukaia dukiara. Bara wîna ba lika man brima.

²⁷ Lama dusa wînka Dawan ra prisantka yaia brih balan ba tnaya ra lakma, kuhma wîna prisantka yabaia bri balan ba sin. Baha sîpka wainhka wîna ba sika Eran ai luhpia nani wal dukia kabia.

²⁸ Bamna baha ba Eran ai luhpia nani wal dukia kabia. Baha ba lâ kumi ban kabia Israel luhpia nani tilara. Baha ba Israel luhpia nani sut mita, Dawan prisantka yabia baha ba kupia kumi lâka daukaia dukiara, Dawan ra dauki yabisa, Israel luhpia nani mita.

²⁹ “Eran prubia ba ra, prîs prâka, witin ai prâka nani sunu kulkan ba sut ai kiamka nani ra yabia. Baha prâka ba witin nani dimbia bara prîs warkka ba daukaia karnika yabia upla sut mawanra.

³⁰ Eran kiamka prîs takbia ba, witin holi pliska ra wark daukaia dimi auya bani baha prâka diman kaia sa 7 yua ba kat.

³¹ “Baha sîpka iki prîs warkka ra mangkan daiwra wîna ba brih, piakbia holi pliska ra.

³² Bara Eran ai luhpia nani aikuki wîna bara baskit bilara brit bâra ba sin pibia, tint watla ra asla prawaia dimaika ba kat.

³³ Witin nani baman baha pibia, kan witin nani ai saurka tikaia mana baha ikan. Witin nani ba sunu sakaia prîs warkka ra dimaia, karnika aiska ba briaia, ban sakuna naha diara nani ba tilara, upla wala nani yarka pibiara, kan baha ba sunu sa bamna.

³⁴ Bara ban kra yu wala kat, brit bara wîna ba sin kau swibia kaka, baha sut ba lika angkan kabia, baha wina pin kabia apia, sunu sa bamna.

³⁵ “Baku daukma Eran bara luhpia nani ba, prîs warkka ra mangkaia dukiara. Dîa yang mai wîri ba kat daukma, 7 yua ba kat sunu sâkma,

³⁶ saurka ban swih tikaia dukiara yu bani bîp wainhka kumi iki sakripais dauki kama, altar ba sunu sakaia dukiara. Baha purara kîa yamni angki saurka dukiara, baha purara batana laikma, bara sunu daukan kabia.

³⁷ Kîa yamni angkaia pliska ba sunu sakaia dukiara yu 7 yamni ba angki kama, bara baku lika kîa yamni angkaia pliska ba sunu daukan kabia. Bara Gâd ra diara yabaia, altarka ba holikira pali daukan kabia: diara sut bahara kangbi ba, sunu sakan kabia.

Yu bani Dawan ra diara yaia lâka ba

³⁸ “Yu bani altar ra sîp wâl angki kaia sma, mani kumi alkan sîpka ba.

³⁹ Sîpka kumi ba titan ra angkma, sîpka wala ba lika tutni ra angkma.

⁴⁰ Baha titan angkaia sîpka ba dukiara, plawar kau pain ba wina paun wâl brima, oliv batanka sin kâp wâl brima plawar ba alkaia, bara baha purara wain kâp kum laikma prisantka kum dauki ba baku.

⁴¹ Bara tutni ra angkaia sîpka ba sin baku daukma, dîa titan ra daukram ba baku daukma, baha sika Dawan ra kîa yamni angki yabaia prisantka nani ba.

⁴² Yang ra pain ai kulkaia naha prisantka nani angki na, piu bani aisika nani bara luhpia nani ba ban dauki kabia yang maiwanra, tint watla dimaika ra yang wal prawaia aula ba ra, bahara man wal prawi yang aisi kamna.

⁴³ Bahara Israel luhpia nani aikuki asla takamna, bara yang bâra kamna ba mita, pliska ba sunu sakan kabia.

⁴⁴ Tint watla ba aihka saki sunu daukamna, altar nani ba sin, Eran bara luhpia nani ba sin aihka saki sunu daukamna. Baku yang prîski nani baku kabia.

⁴⁵ Bara yang lika Israel luhpia nani tilara iwamna, bara yang lika witin ai Gâdka kamna.

⁴⁶ Bara baku witin nani tânka bribia yang sika witin nani Dawan Gâdka sna ba, Idsip wina bri sal sakri witin ai tilara iwaia. Yang sika witin nani Dawan Gâdka sna.