Impakan Sturka 27 - DAWAN BÎLA AISKA

Altar bras ni daukan ba

¹ “Akasia dusa ni altar kumi paskma bara tnaya walhwal ba yahpika ba wal baku kabia, tnaya bani ba yarika 7 pît pura bakriki kabia, 4 pît pura bakriki purara.

² Bara altar tâ kumi bani ba ra aringka walhwal dauks, baha nani lika altar wal pîs kumi paski daukaia, bara altar ba bras ni lalaubi dauks.

³ Diara altar ra yus muni kaia dukia ba sut bras ni baman daukan kabia, yamhpus auhbaika ba, yamhpus sakaika ba, kapka tara nani ba, diara sabi alkaika alhnikira ba, masku nani auhbaika nani sut ba, bras ni paskan kabia.

⁴ Bras wayarka ni pitbi yamhpus yakawaika kum daukma, bara alki twilkaia untika walhwal daukma.

⁵ Bara altar ba mununhtara mangkma, bara baha wayarka pitbi daukan ba, altar munhtara lila kat alki kabia.

⁶ Bara altar ba twilkaika dusa nani walhwal daukma akasia dusa wina, bara baha dusa nani ba bras ni lalaubi prakma.

⁷ Bara baha dusa nani ba dus dingkaika untika ba ra dingkma, bara baha dusa nani ba altar tnaya ra kabia.

⁸ Altar ba tat ni paskma, unta sin lilara swima, dîa il ra mai marikan ba natka kat daukma.

Utla latka ra kutbanka

⁹ “Watla latka ba ra linin kwalka pitbi daukan ba ni kutbanka kum dauks, waupasa tnaya ra kwala ba 50 yar yarika bri kabia.

¹⁰ Bras ni playa 20 paskbia, bara kli playa tara wala 20 paskbia. Kwala pamaia bînka nani ba bara tâ dingkaia untika nani ba lika, silbar ni paskbia.

¹¹ Yahbra tani tnaya ba sin, waupasa tnaika ra daukram ba baku dauks.

¹² Muna tani kutbanka kwalka ba, yarika 25 yar bri kabia, playka nani sin matawalsip kabia, mununhta karnika playka sin matawalsip kabia.

¹³ Lalma tani wina dimaika ba tnaya bani ra, kwala bîla yahpika 25 yar bri kabia.

^14-15 Dimaika tnaya kumi bani ba ra, 7 yar pura bakriki kwala pamaia, playa nani ba sin yumhpa kabia, mununhta karnika playka ba sin yumhpa.

¹⁶ Utla kutbanka ra dimaia durka kwalka ba, yar matawalsip bri kabia, mapla ba blu, balianta, kwala pauni pali, linin ai mihta ni pitban. Playa ba walhwal kabia, mununhta karnika playka sin.

¹⁷ Utla latka kutbanka playa bani ba, silbar ni daukan kabia. Kwala pamaia pînka nani ba sin bara mununhta karnika playka ba sut lika bras ni daukan kabia.

¹⁸ Utla latka kutbanka yarika ba 50 yar bri kabia, bîla yahpika ba 25 yar, kutbanka pura ba yar wâl purara bakriki bri kabia. Kutbaia kwalka ba linin kwalka ni pitban kabia, mununhta playka karnika ba bras ni daukan kabia.

¹⁹ Utla ba bilara wark daukaia dukia nani sut ba lika bras ni daukan kabia, dus nani ba utla latka dusa tatwa daukan nani ba sin sut bras ni daukan kabia.

Lamp laya ba

²⁰ “Israel luhpia nani ra wis, wih oliv batanka pali laya ba bri sal maikbia, baha ni lamp ra laya laikaia, baku lamp ba angki ingni bri kaia dukiara.

²¹ Eran ai luhpia nani wal, lamp angkaia warkka ba bribia; baku mika Dawan wal aisaia tintka watla ba ingni ban kabia tihmia aiska, Lâ auhbaia watla kutban ra bara baku sin lata tani ra kabia. Naha na lâ kum Israel luhpia nani, kiamka sut lâka ban kaia ra kabia.