Impakan Sturka 22 - DAWAN BÎLA AISKA

Sauhkan ba kli mana aibapaia lâka nani

¹ “Upla kum bîp wainhka kum, apia kaka sîp kum implikan kaka, bara ikan, apia kaka upla ra atkan wan kaka, witin baha bîp wainhka ba mana bîp wainhka wala nani matsip aibapan kaia sa, bara sîp ba mana, sîp walhwal aibapan kaia sa.

² “Âimplikra kum impliki kan pura baiki klakan, apia kaka ikan kaka, witin pruanka ba upla mita upla wala ra ikan saurka kulki ba baku kulkan kaia apia sa.

³ Ban sakuna, pat yu baiwan kan witin ra ikan kaka, baku lika witin pruanka ba upla mita ikan saurka baku kulkan kaia sa. “Witinka impliki ba witin ai mana dîa aibapaia sa, kan witin lalah âpu kaka, âimplikra ba atkaia sa, implikan ba mana aibapaia dukiara.

⁴ “Daiwan implikan ba kau ikras witin ai mihta ra brisa kaka, witin aima wâl prais aibapaia sa, bîp wainhka kan sapa, biriku sapa, sîp kan sapa.

⁵ “Upla kum ai daiwra ba lanhkisa kaka twi piaia waia, insla kum ra, apia kra wain nasla kum ra dimi plun piaia, bara daiwan nani ba upla wala nasla ra dimi pata mangkan nani ba pin kaka, witin baha mana aibapaia sa ai nasla ra wain pâwi ba wina, apia kra ai nasla ra plun mâ kau yamni nani pâwi ba ni.

⁶ “Upla kum ai nasla ra pauta mukan, bara pauta ba kiaya dusa nani tilak ami insla wala ra lui plawar mâ dakban nani ba angki tikan kaka, ban kra plawar mâ sut pihwan kan ba aman kaka, pauta mukan uplika mita baha plawar nani ami luan mana ba aibapaia sa.

⁷ “Upla kum ai uplika wala ra kasak kulki ba mita, ai lalahka, apia kra mana tara dukia yan alki bri kaia, bara witin watla wina dukia ba, lalahka ba implikan kaka, âimplikra ba mita aima wâl prais aibapaia sa, witin ba sakuya kaka.

⁸ Kuna âimplikra ba sakras sa kaka, watla dawanka ba Dawan mawanra brih waia sa, ai uplika dukia ba, apia kra lalahka ba, witin ai mihta alkras kan sapa kaikaia.

⁹ “Diara tiwan dukia kaka, upla kum baha ai dukia wisi brisa kaka, bîp wainhka sapa, biriku, sîp, kwala sapa, apia dîa dukia wala kra kabia bara upla wala bal baha witin ai dukia wisa kaka, naha uplika wâl na Dawan mawanra brih waia sa. Bara ani ba pâtkira takuya kaka, witin mita ai walka ra aima wâl prais dukia tiwan kan ba mana aibapaia sa.

¹⁰ “Upla kum ai uplika ra yamni kulki ba mita, ai bîpka wainhka kum sapa, ai birikuka sapa, ai sîpka, apia kaka ani daiwra sâtka kum sapa mihta ra mangkan sa kaka, bara baha daiwra ba pruan, latwan brin, apia kaka implikan, bara upla kum sin kaikras kan kaka,

¹¹ baha uplika mita Dawan nina mâki wiaia sa naha daiwan dawanka ra, witin mita daiwan na ikras, apia kaka implikras, latwan sin yaras; baku daiwan dawanka ba, witin ai bîla ra kasak kulkbia, bara witin daiwan dawanka ra diara aibapbia apia.

¹² Ban sakuna, witin kaiki pali kan daiwan ba implikan kaka, witin mita dawanka ra aibapaia kabia.

¹³ Daiwan ba, daiwan wail wala mita wîna ba kalki pîs ra daukan kaka, witin dawanka ra aibapaia apia dukiara, daiwan wina pîska nani ba bri sal marikaia sa.

¹⁴ “Upla kum daiwan kum piu wiria dukiara makaban kaka, bara daiwan ba pruan, apia kaka latwan brin kaka, dawanka ba kaikras kira, baha uplika daiwan ba piu wiria dukiara makabata ba mita daiwan dawanka ra aibapaia sa.

¹⁵ Kuna dawanka ba kaiki kan daiwan ba pruan, apia kaka latwan brin kaka, witin daiwan ba mana aibapaia apia sa. Daiwan wark takan mana aibapaia win kan kaka, baha baman lika aibapaia sa.

Wan tânka yamni bara Dawan lâka ra iwanka ba

¹⁶ “Waitna kum mita tiara aihwa kum kau pramis âpu ba ra, yabaki kupia alki yapbia kaka, witin baku munan ba mana aibapaia sa bara ai maya briaia sa.

¹⁷ Kuna tuktan mairin aisika mita witin ra ai luhpia mairin ba yaia apia wisa kaka sin, witin tuktan mairin waitna tânka kaikras kan munan ba praiska kulki ba lika aibapaia sa.

¹⁸ “Sukia sâtka kumi sin swirka raya kabiara.

¹⁹ “Yamna daiwan kum wal yapbia kaka, witin ba lâka aisi dauki ikan kaia sa.

²⁰ “Dawan ra baman sakripais dauki yaia kata ba watlika ra, upla kum mita gâd wala nani ra sakripais dauki yabia kaka, witin ba lâka dauki ikan kaia sa.

²¹ “Upla tringsar nani ra saura munpara bara rau sauhkpara, kan man nani sin tringsar kapram Idsip tasbaya ra.

²² “Piarka nani ra saura munpara, bara tuktan rau nani ra sin,

²³ kan man nani bui witin nani ra saura munma kaka, bara witin nani bui yang ra ini hilp makabia kaka, yang lika witin nani tâwan aimakamna,

²⁴ bara kupi baiwanka wal, war aiklabaia sord ni mai prukamni bara mai ikamni. Ningkara man nani mayam nani, bara luhpiam nani sika piarka bara rau nani sin takan kabia.

²⁵ “Upla umpira kum ra lalah lin munma kaka, yang upliki nani man nani aikuki nâra na tila wina, witin mapara munpara lalahkam purara kau praki witin wina briaia, lalah lin mamunra nani dauki ba baku.

²⁶ Lalahkam mana alki kama wisi uplika ba ai kwalka maikbia kaka, kau yu dimras ba ra kli kwalka ba yas,

²⁷ kan baha kwalka ba baman witin unhsakka brisa, kauhla prâka. Yaras kama kaka, ¿dîa wal ai pura praki yapbia? Bamna witin bui yang ra makabia kaka, yang lika witin tâwan aimakamni, kan yang umpira kaikan lâka brisna bamna.

²⁸ “Gâd mapara aisi kupia baiwaia lâka ra tuskpara, bara tasbayam ra pura wihta aimaki ba mapara sin lahtubi saura wipara.

²⁹ “Wain mâ nani, insla pata nani sut sakisma ba wina, yang ra prisantka sal aikaia ba wina, tumi takaski kapara. “Luhpiam waitna tawahkia ba sin,

³⁰ bîpkam nani, sîpkam nani luhpia tawahkia ba sin yang ra aikaia sma. Witin nani sip sa ai yaptika wal kaia wik kum, kuna lapta 8 alki yua ba yang ra sal aikaia sma.

³¹ “Man nani ba, yang dukira baman bâk mai saki briri uplika nani sma. “Daiwan wail mita daiwan kum wîna ba kalki pîs ra daukan kaka, wînka ba pipara; yul nani ra dakaks.