Impakan Sturka 17 - DAWAN BÎLA AISKA

Walpa wina lî sakan ba

¹ Israel luhpia nani ba sut, Sin upla iwras tasbaya ba wina taki, tawa impaki kan Dawan adarka witin nani ra daukaia win ba baku. Witin nani Refidim kat balan, bahara ai tintka watla bapan. Ban sakuna, bahara lî âpu kan upla nani diaia.

² Upla nani ba kli Moses ra ini aisin: —Yang nani lî diaia aik. Moses pana win: —¿Man nani dîa muni yang ra inisma? ¿Dîa muni Gâd traika kaikisma?

³ Ban sakuna, upla nani ba diran dauki kan bamna, Moses mapara karna aisin. Witin nani wi kata: —¿Dîa muni Idsip wina wan sakram? ¿Lî diran bla wan luhpia bara wan daiwra nani sut aikuki, wan ikaia daukram?

⁴ Bara Moses lika Dawan ra tawi inan, bara win: —¿Naha uplika nani na wal, yang dîa daukamna? Witin nani kau walpa ni ai sabi ai ikaia baman ai swin sa.

⁵ Bara Dawan bui Moses ra pana aisin: —Israel luhpia nani ba tila wina, almuk nani ba mâ wâl wini bris bara witin nani aikuki upla nani tâura waps. Awala laya ra prukatma dusa ba sin brih was.

⁶ Yang Horeb ilka ra bîlam kaiki kamna, walpa tara kum purara, man walpa ba ra prukma ba ra, lî baha wina bal takbia upla nani ba diaia. Bara Moses baku daukan upla almuk nani mawanra.

⁷ Bara witin baha pliska nina ba, Meribá mâkata, kan Israel luhpia nani rangbi aisin bamna, Masá mâkan, kan witin nani sin Gâd traika kaikan bamna; kan witin nani win: “¿Dawan ba yawan wal sa ki, apia kaka yawan wal apia sa ki?”

Amalec uplika nani mapara war aiklaban ba

⁸ Ningkara Amalec uplika nani balan Refidim kat Israel luhpia nani wal war aiklabaia.

⁹ Bara Moses bui Jasua ra win: —Waitna nani ba wahbi saki bris, bara taki was Amalec uplika nani mapara aiklabaia. Yauhka man wal yang il bahna ra kamna, bara Dawan dus maikan ba sin mihtam ra bri bas.

¹⁰ Moses bui Jasua ra win ba baku witin daukan, bara Amalec uplika nani wal aiklabaia taki wan. Baha piua ra Moses, Eran bara Hur sin, witin nani yumhpa lika pat il bahna ra uli wan.

¹¹ Moses ai klahkla ba buki bri kan ba ra, Israel luhpia nani mita Amalec uplika nani ra pura lui kan. Sakuna Moses ai klahkla ba mâyara ikan ba ra, Amalec uplika nani ba mita Israel luhpia nani ra pura lui kan.

¹² Ban sakuna, Moses klahkla ba swapi kan, bamna witin nani walpa kum brin bara witin baha purara yan iwan; bara Eran bui Moses klahkla kum alki bukan, Hur sin klahkla wala ba alki bukan. Bara baku witin nani wâl bui Moses klahkla nani ba alki buki bri kan. Baku Moses klahkla ba tâ baiki brin ban yu dimaia ra ba kat.

¹³ Bara Jasua bui Amalec uplika nani ba sord ni baman iki âpu daukan.

¹⁴ Bara Dawan bila Moses ra win: —Naha mai wisna na wauhkamtaya ra ulbi bris, kli kupia kraukaia ba dukiara; bara Jasua ra wis yang bui Amalec uplika nani ba sut pali tasba wina diki sakaisna.

¹⁵ Bara Moses altar kum paskan bara nina ba mâkan “Dawan ba yang plakinki”,

¹⁶ bara win: “¡Dawan plakinka ba ai mihta ra alki purara buki bri ba ra! ¡Dawan ba Amalec uplika nani wal war aiklabi ban kabia kiamka kum wina ban kiamka wala nani ra sut!”