Impakan Sturka 16 - DAWAN BÎLA AISKA

Manâ ba yan piaia

¹ Israel luhpia nani sut ba Elim wina takan bara Sin upla iwras tasbaya ra wan. Baha tawanka ba Elim wihki Sainai wal lilkapas ra sa. Witin nani Idsip wina takan ba ra, Zif katka lapta 15 yua aimakan ba kat, witin nani bahara balan.

² Baha upla iwras tasbaya ra, witin nani bui Moses bara Eran wal mapara rangbi aisin.

³ Upla nani ba witin nani ra win: —¡Dawan ba Idsip tasbaya ra iki wan tikan kata kanra yamni kan! Bahara yang nani wîna piakan dakawa lamara iwi pi kapri, wan biara banhki takan ba kat. Sakuna man nani naha upla iwras tasbaya kat, sanglang ni wan iki âpu wan daukaia wan bri balram.

⁴ Bara Dawan bui Moses ra win: —Yang pura wina lî auhi baku plun yakabaisna. Upla nani ba yu bani plun wahbaia taki wabia, yu aiska pata briaia praiska ba kat. Yang kaikan ai daukisa ya yang lâika bîla nani smalkanka ba kat daukbia ba, bara ya sin baku daukras kabia ba.

⁵ Yua 6 ba witin nani taki ai pata wahbi bri kabia, bara baha yua ba yauhka dukiara sin luki wahbi bribia, yu wâl pata.

⁶ Bamna Moses bara Eran wal mita Israel luhpia nani ra win: —Tutni piua ra, man nani sut kaikma Dawan mita Idsip tasbaya wina mai bri balan ba,

⁷ bara titan ingbia ra Dawan prana ba man nani kaikma, Dawan mapara man nani rangbi aisaram ba witin walan bamna. ¿Yang nani na ya, bara man nani bui yang nani maipara rangbi aisaia?

⁸ Moses sin ban kau pura praki aisin: —Tutni ra Dawan bui man nani ra wîna piaia maikbia, bara titan ra sin plun wala ailal piaia maikbia, man nani bui witin ai mapara rangbi aisaram ba witin walan bamna. ¿Man nani aisaram dîa muni yang nani na ya? Man nani lika yang nani maipara rangbi aisaras kapram, sakuna Dawan mapara aisaram.

⁹ Bara Moses bui Eran ra win: —Israel luhpia nani ra wis, witin nani sut Dawan mawanra balbia, witin nani rangbi aisin ba Dawan walan bamna.

¹⁰ Eran kau Israel luhpia nani wal aisi kan ba ra, upla iwras tasbaya ba langnika ra kasbrika kum ra, Dawan prana ba param takan upla nani sut ba kaikan.

¹¹ Bara Dawan ba Moses ra aisi, naku win:

¹² —Israel luhpia nani rangbi aisi kan ba yang walri. Bamna man bui witin nani ra aisi wis: ‘Tutni mani ra witin nani upan piaia bribia. Baku man nani kaikma, yang sika Dawan Gâdkam sna ba.’

¹³ Baha yua tutni ra, tnawira nani pusal sâtka nani ailal bal, ai latka nani ba prak prawan. Bara titan mani ra, diwas laya mukuska witin nani ai kaina kîr bri kan.

¹⁴ Bara mukus ba lap tiwi diwas laya ba lâwan ningkara, tasba ra kaikan diara pihni tanhta nani ailal kan lî klaswan baku.

¹⁵ Israel luhpia nani ba baha dîa dukia sapa tânka briras kan, bamna kaikan ba ra kumi bani ai walka ra aisi makabi wali kan: “¿Bara naha na dîa dukia?” Moses bui witin nani ra win: —Naha sika plun, Dawan bui man nani ra piaia maiki ba.

¹⁶ Bara Dawan adarka ba naku daukaia win: Man nani kumi bani, nahki plun piaia sip sma ba praiska ba kat wahbi bris, wamtla bilara upla an ailal ba piaia ba praiska kat. Upla kumi bani pata ba batil kum, apia kaka batil wâl wahbi bris.

¹⁷ Bara dîa daukaia win ba baku Israel luhpia nani ba daukan. Tila upla nani ba, plun kau ailal wahban, wala nani ba kau wiria wahban,

¹⁸ sakuna litro ra mangki kulki kaikaia yaban, baku dauki kulkan, ailal wahbi brin uplika nani kau pura lui briras kan, wiria baman wahbi brin uplika nani ba sin apras kan. Upla kumi bani witin nahki piaia sip kan ba praiska kat wahbi brin kan.

¹⁹ Moses kli witin nani ra win: —Upla kumi bani plun ba sut piaia sa, yauhka dukiara lika suni swiaia apia sa.

²⁰ Ban sakuna, upla nani tila ailal kan Moses aisin ba, witin nani bîla walras kan. Bara ai pata ba yauhka piaia dukia wiria suni swin, kuna pata suni swin ba sut liwa baman alkan bara bisbaya sin takan. Bamna Moses lika witin nani wal ai kupia baikan.

²¹ Bara titan bani upla kumi bani dîa piaia kan ba praiska ba kat baman wahbi brin, bara kau dîa tasba ra swin kan ba, yu laptika mita slilki tiki kan.

²² Ban sakuna, matlalkahbi yua ba lika, aima wâl prais kau ailal wahbi brin, upla bani dukiara litro walhwal; bara pura kakaira nani ba bal Moses ra maisa pakan.

²³ Moses pana witin nani ra win: —Baha sika Dawan mita win baku daukaia. Yauhka ba sabat, Dawan ra luki ris briaia yua, bamna piakaia, dukaia, angkaia, pata nani ba sut naiwa piaki, angki, duki briaia sma. Bara baha wina yauhka piaia pata ba suni swis.

²⁴ Bara witin nani lika Moses dîa win ba baku daukan, yauhka piaia pata ba sut suni swin, bara bisbaya takras liwa sin alkras kan.

²⁵ Bara Moses bila witin nani ra win: —Man nani patam suni swiram ba naiwa pis, kan naiwa sika sabat, Dawan ra luki ris briaia yua, naiwa man nani twi ra wama diara sâkma apia.

²⁶ Yua nani matlalkahbi yua ba lika, patam nani wahbi briaia sip sma, sakuna yu matlalkahbi pura kumi ba, baha lika sabat ba, baha yua ra lika diara âpu kabia.

²⁷ Tila upla nani ba, yu matlalkahbi pura kumi yua ba, ban ai pata wahbaia taki wan, sakuna diara sakras kan.

²⁸ Bara Dawan bila Moses ra win: —¿Ahkia kat man nani bui yang lâika bîla nani ba bara smalkanka nani ba sin, bîli wali daukras ban kama?

²⁹ Naha luki kaiks yang Dawan, man nani ra ris yua kum maikri; baha mita yu matlalkahbi yua ra, yu wâl piaia pata ba maikisna. Baha mita yu matlalkahbi pura kumi yua ba man nani kumi bani wamtla ra kaia, wamtla wina takaia apia.

³⁰ Bara upla nani ba yu 7 alkan ba ra wark takras takaskan.

³¹ Bara Israel luhpia nani, plun wahbi kan ba pata nina ba manâ mâkan. Manâ ba pihni kan, wibia kaka starapil mâ baku kan, bara damni sim brit nasma ra buskan baku.

³² Bamna Moses win: —Naha sika Dawan adarka witin win man nani naku daukma: ‘Man nani manâ ba batil wâl banhki dauks, bara baha suni swis masrakam nani ra marikaia dukiara. Witin nani kaikbia, Idsip wina mai saki mai bri balri ba ra, twi ra plun mai dakaki kapri ba.’

³³ Bara Moses bui Eran ra win: —Baul kum bris, bara baha bilara manâ batil wâl auhbi, bara baha Dawan mawanra kahbi swis. Bara man nani kiamkam nani ra marikaia dukiara suni swin kabia.

³⁴ Dawan bui Moses ra daukaia win yaba adarka kat, Eran manâ baulka ba brin ba ra, Dawan lâka auhbaika watla lama ba kat swin, bâra main kaiki kaia dukiara.

³⁵ Israel luhpia nani ba upla iwras ba tasbaya ra 40 mani manâ baman pi kan, Kenan tasbaya piarkika upla iwi kan ba tasbaya lamara balan ba kat.

³⁶ (Gomer 10 bara efa kum kulki kan.)