Esdras 5 - DAWAN BÎLA AISKA

Tempel ba kli mâkisa

¹ Prapit nani wâl bâra kan, Hageo bara Sakaraya, Idó luhpia ba, witin nani Dawan Israel Gâdka mita aisin dahra ba Ju nani Juda bara Jerusalem ra iwi nani ra win.

² Bara Zorobabel, Salatiel luhpia ba, bara Jasua, Josadac luhpia ba sin asla taki, bûi banhwan bara Gâd tempelka Jerusalem ra ba kli mâki banhwata. Bara witin nani aikuki kan Gâd prapitka nani, bara warkka taki hilp muni kan.

^3-4 Baha piua ra, wihta tara Tatenai, Éufrates awala muna tani tasbaya ra wihta tara kan ba, bara Setar-boznai sin ai pânika nani aikuki, witin nani ra wih naku win: “¿Ya adar maikan man nani naha tempelka na kli paskaia, bara tat nani wal kaina kutbi prakisma? ¿Naha watla kli mâki uplika nani ba ya, bara ai nina nani ba dîa?”

⁵ Ban sakuna, Ju tâ uplika nani ba Gâd mita kaina kahbi kan bamna, witin nani mita baha warkka nani ba sip takaskras kan, bara baha dukiara king Darío ra ulbi maisa pakan warkka dauki ba, witin dîa wibia ba walaia.

⁶ Naha sika wauhkataya ulbanka Tatenai, Éufrates awala muna tani tasbaya ra wihta tara ba, bara Setar-boznai ai pânika nani aikuki ulbi blikan ba king Darío ra,

^7-8 bara wauhkataya ra naku ulban kan: “Brinki sa, king tara, man siknis âpu yamni kama. Yang nani bui man ra maisam pakisna, Juda tasbaya aiska ra impaki tauki banhri, bara Gâd tara karnakira watla mâki banhwi kan kaikri, baha ba walpa tara nani ni watla ba mâkisa, bara tnaya sin pat tat wal saban sa, warkka ba uba istikira pali daukisa, baha mita pat aitani ai tâura brih impakan sa.

⁹ Bara yang nani bui warkka ba tâ bri banhwi nani ra makabi walri, ¿ya wina adar maikan man nani naha tempelka na kli mâkaia, bara sin kutbaia tat nani kira?

¹⁰ Bara tâ bri uplika nani nina makabi wali banhri, nina nani ba ulbi king tara ra wiaia dukiara.

¹¹ Bara witin nani pana yang nani ra ai win: ‘Yang nani sika Gâd kum laih purara bara tasba ra sin bâra ba Gâdka ra mayunisna; yang nani naha tempelka na kli mâkisna, pat mani nani luan ra Israel kingka kum karnika tara bri kan ba mita naha ba pat aiska mâkan kan bamna.

¹² Sakuna baha ningkara, yang nani damiki nani Gâdka laih purara iwi ba mapara saura dauki banhri tâwan, Nabucodonosor, witin Caldea uplika Babilon kingka kan ba mihta ra wan mangkan, naha tempelka sin sut sauhki tikan, bara upla nani kan ba alki Babilon ra bri si taiban lâka ra bri kan.

¹³ Baha ningkara Ciro Babilon kingka aimakan yua ra, witin mita adar wankan Gâd tempelka na kli mâkaia.

¹⁴ ‘Baku sin gul bara silbar ni paskan dukia nani Ciro mita Jerusalem, Gâd watla wina saki brih wan kan ba, baha nani sin king Ciro mita Babilon gâdka tempelka ba wina sut pali saki Sesbasar wihta tara mihta ra mangkan bara kli bri balan.

¹⁵ Bara Ciro bui Sesbasar ra adar yaban naha diara watla nani na bribia bara Jerusalem tempelka ra brih wabia, bara Gâd tempelka ba sin ai pliska kat kli mâkbia.

¹⁶ Bara baku Sesbasar wan, bara Gâd tempelka playka nani ba kli bapan Jerusalem ra, bara baha yua wina kli nanara kat mâkisa, sakuna kau danh apia sa.

¹⁷ “Bamna nanara, king tara, man aitani kulkma kaka, Babilon ra wauhtaya ulban nani auhbaika ra pliki kaiks, bara naha adarka king Ciro mita Gâd tempelka mâkaia win ba kasak sa kaka, wauhtaya kum ulbi ai wis, dîa pali man lukisma ba naha dukiara.”