Esdras 4 - DAWAN BÎLA AISKA

Mapara babura nani bal wark ba alki takaskisa

¹ Juda bara Benjamín uplika wailhka nani ba walan, upla nani alki brih wan kan wina kli tawi balan nani ba, Dawan Israel Gâdka tempelka ba kli paski kan.

² Bara uplika nani ba balan, bara Zorobabel, Jasua bara kiamka bani wihtka nani ra wan kaikaia, bara naku win: —Aik yang nani sin man nani ra tempel mâki tâm baiki banhwamna, kan yang nani sin man nani baku Gâdkam ba briri, bara witin ra yang nani sin daiwan iki angki yabisna, Asiria kingka Esarhadón yua ba wina, witin mita sika nâra wan bri balan ba.

³ Bara Zorobabel, Jasua bara Israel aisika nani bui pana naku win: —Aitani apia kabia yang nani na man nani wal Gâdki watla ba mâkaia, kan Persia kingka Ciro bui ai blikan, yang nani yakan naha na mâkaia, Israel Gâdka watla ba.

⁴ Bara baku baha tasbaya uplika nani ba Juda uplika nani spiritka turbi kan, sibrin sin dingkan utla ba mâki kabia apia wisi.

⁵ Bara baha waihla nani ba mita tila Persia tasbaya wihtka nani ra aibapan, bara baha wihtka nani ba mita tempel mâki nani ba mapara kan, Ciro, Persia kingka aimakan piua sut ra, Darío, Persia kingka aimakan yua ba kat.

⁶ Bara Asuero king aimakan yua ba wina, waihla nani ba Jerusalem bara Juda uplika nani mapara dahra kwahki kan.

⁷ Bara Artajerjes, Persia kingka aimaki kan yua nani ra, dahra kwakwahkra ba ra win mapara babura nani Bislam, Mitrídates, Tabeel bara ai pânika wala nani kira, Artajerjes ra wauhkataya kum ulban. Wauhkataya ba Aram uplika bîla ra ulban kan, bara Persia bîla ra sin lakan kan.

⁸ Kamandanti Rehúm bara Simsai, wauhtaya âiulbra ba wal, Jerusalem uplika nani mapara dahra kwahki ulban king Artajerjes ra.

^9-11 Wauhkataya ba ulban sa, kamandanti Rehúm, âiulbra Simsai bara ai pânika nani, wihta nani, war wihtka tara nani, upla kulkanka bri nani bâra ba Persia, Érec, Babilon bara Susa tawanka nani ra, baku sin Asnapar waitna karnakira kata ba mita upla nani ba tawanka wina saki Sameria bara Éufrates awala muna tani ra swin iwi nani kan ba mita sin ulbi dahra kwahkan, bara naku wisa “King Artajerjes ra, yang nani Éufrates awala muna tani tasbaya wina lamkula dauki banhwisna:

¹² “Naha na, king tara, man ra param saki banhwisna, Ju nani man wina yang nani ra blikram Jerusalem ra balan nani ba, wan mapara babura saurakira nani ba, kli ai tawanka ba paskisa. Walpa kutban playka slingwan ba sin kli paskisa.

¹³ Nanara naha na, king tara, param sa uplika nani na naha tawanka tara na swika kli paskbia kaka, baku sin walpa kutbanka nani bukbia kaka, naha uplika nani na diara nani lal mana kulki ba aibapbia apia; bara baha tâka mita, king lalahka ba sin mâya pali kat iwbia, lalah briaia ba praiska kat sip bribia apia.

¹⁴ Yang nani lika man warkkam tatakra baku, wan brinka apia sa baha lâka ba aitani kulkaia, man kingkam lâka ba mâyara kulkaia, swiram paski baku praiska. Baha mita naha ulbi banhwisna dîa taki ba maisam pakaia,

¹⁵ baha mita, king tara, aisikam nani ulbanka wauhkataya nani ra naha tânka pliki kaikma kaka tânka brima. Blasi ulbanka nani ba ra ulban sa, naha uplika nani ba wan mapara babura nani atia sa, bara king nani ra, tawan wala nani ra sin saura munisa. Patitara witin nani asla takan kata, mapara bûi war daukaia, baha tâwan witin nani tawanka tara ba sauhki tikan kan.

¹⁶ Bahamna, nanara, king tara, yang nani bui man ra param mai wisna, naha tawanka tara na kli paskbia kaka, bara walpa kutbanka nani ba sin kli bukbia kaka, kingki tara, Éufrates awala muna tani tasbaya ra uplika nani purara sip lâ daukma apia.”

¹⁷ Bara Artajerjes pana naha bîla na witin nani ra blikan: “Kamandanti Rehúm ra, Simsai wauhtaya âiulbra ra, bara Sameria uplika nani sut Éufrates awala muna tani ra iwi nani sma ba: laikula mai blikisna. “Wauhkataya yang ra bliki banhram ba bîla laki ulbanka ba,

¹⁸ yang maiwan kat aisi kaikan ba ra, yang wali kapri param pali aisi aikan,

¹⁹ bara yang wîri ulban ba kat dîa tânka bâra ba pliki kaiki banhbia. Bara kasak sa naha uplika nani ba king mapara babura nani atia sa, wihta nani mapara babura sin, kaina piua ra pat baku dauki banhwan.

²⁰ Baku sin wisa, Jerusalem ra king karnakira nani bâra kan, bara Éufrates awala muna tani tasbaya nani ba ra sin baha nani ra taibi bri kan, bara witin nani ra diara nani sut ba lal mana kulkan aibapi kan.

²¹ Bamna nanara, baha waitnika nani ra wis, warkka ba alki takaski banhbia, baha tawanka kli paskbiara, ani yua yang mita adar wala yabamna ba kat.

²² Aman kaiks, mai wisna na daukras swipara, king tasbaya ra baha lukanka saura nani ba, king tasbaya ra kau pâwi kaia apia sa.”

²³ Bara baha wauhkataya king Artajerjes ulbanka ba Rehúm, Simsai ai pânika nani sin sut mawan ra aisi kaikan ba ningkara, witin nani isti pali Jerusalem ra wan, bara Ju nani ra win bîla karna nani wal warkka ba takaskbia.

²⁴ Bara baku, Jerusalem ra Gâd tempelka mâki kan ba takaskan. Bara bîla kaikan Darío Persia kingka mani wâl aimakan ba kat.