Blasi Sturka 50 - DAWAN BÎLA AISKA

¹ Bara Jekob ai aisa wîna tara ba, kiaubi alki brih ini kiawalan.

² Baha ningkara, upla pruan wîna nani sîka dadaukra uplika nani ra witin win, ai aisika Israel wîna tara ba sîka daukaia. Bara Josep witin nani ra win ba baku daukan.

³ Yu 40 wîna tara ba sîka daukan, piua wihka briaia pitka. Bara Idsip uplika nani, Israel dukiara yu nani 70 sari kwala siksa diman,

⁴ sari bri inaia yua nani ba luan ba ra, Josep wan, king watla wihtka tara nani ba aikuki aisin, bara witin nani ra win: —Man nani bui yang ra yamni lukisma kaka, pliskam pali, yang mai wimna na king ra wih wis.

⁵ Aisiki pat pruaia lamara kan ba ra, witin bui yang ra ai win, witin ra swer taki aisamna, ani yua witin prubia ba ra, Kenan tasbaya ra witin mita ai raitika pat atki swin yaba, bahara bri si bikamna. Bamna nanara, yang bui man ra mamkabisni aik aisiki bri si bikaia wamna. Witin ba bikamna ba ningkara yang kli tawi balamna.

⁶ Bamna king fero pana naku witin ra win: —Aisikam bikaia was, witin dîa man ra makaban ba baku dauks.

⁷ Josep ai aisika bikaia wan, bara king fero watla ra, Idsip tawanka ra sin wihta nani kan ba sut witin aikuki aidrubi wan.

⁸ Jekob taika nani, Josep taika nani bara muihnika nani sin sut witin aikuki wan. Gosen tasbaya ra tuktan bara daiwan nani baman takaskan.

⁹ Upla wala nani sin, wagin bara aras nani ra uli, Josep nina blikan. Bamna upla daknika tara pali witin wal Kenan ra wan.

¹⁰ Witin nani Jordan awala lalma tani ra Goren-ha-atad kat wan bara bahara witin nani wik kum takaskan, pruan ba priaska tara kum dauki, ai aisa pruan ba sarka kasak inan.

¹¹ Kenan uplika nani baha tasbaya ra iwi kan ba, baha sari priaska dauki kan ba kaikan, bara witin nani naku win: “Idsip uplika nani upla kum pruan ba bikaia priaska sarikira pali daukisa.” Bamna baha tânka ra luki Jordan awala lalma tani tasbaya nina ba Abel-misraim mâkan.

¹² Jekob ai luhpia nani ra witin ai dukiara dîa daukaia win yaba kat, luhpia nani sin ai aisa dukiara daukan.

¹³ Bara witin nani bui witin ba Kenan ra brih wan, Macpelá tasbaya walpaya untika ra bikan. Baha tasbaya ba hitita Efrón ba witin tasbaya kan, Ebraham witin wina atki brin ai taya nani pruka bikaia tasbaya. Naha tasbaya bara walpaya untika ba sin, Mamré lalma tani ra bâra sa.

¹⁴ Josep ai aisika bikan ba ningkara, ai muihni nani upla wala nani ba sin sut witin wal kli Idsip ra tawi wan.

Josep kau pruras kan aisin ba

¹⁵ Jekob pruan bamna, Jekob muihnika nani lukan: “Ban kra nanara Josep witin nani ra misbara kaikbia, witin nani mita witin ra saura munan ba mana, pana witin nani ra kli saura munbia.”

¹⁶ Bara witin nani lika upla wal ai bîla Josep ra win: “Aisikam kau raya kan ba ra yang nani ra ai win.

¹⁷ Yang nani bui man ra mai wimna: ‘Yang mamkabisni, pliskam, man muihkam nani man ra saura pali mai munan saurka ba ban kulkpara, pâtka ban swih tiks’, kan yang nani na man aisikam Gâdka albika nani sna bamna.” Blikan uplika nani ba witin nani bîla ba kau aisi kan ba ra, Josep lika ini kan.

¹⁸ Bara muihnika nani ba sut witin ai mawanra dimi wan, bara ai mawan kat ai lula kriki ai lal tasba kat kangban, bara witin ra win: —Man albikam nani nâra mamwanra brisma.

¹⁹ Sakuna Josep pana witin nani ra win: —Si bripara. Yang lika Gâd watlika ra sip aimakamna apia.

²⁰ Man nani bui yang ra saura ai munaia luki daukram, sakuna Gâd lika man nani lukankam saura ba wina diara yamni ra lakan ba naiwa man nani kaikisma. Yang na upla ailal rayaka ba swaki sakaia ai mangkan.

²¹ Bamna nanara man nani si bripara, man nani sut, luhpiam nani sut sin ban plun maiki kamna. Baku Josep latwan lâka ni ai muihni nani maisa nihki kupia lilia daukan.

Josep pruanka ba

²² Josep bara ai aisika taika nani sut aikuki ban Idsip ra iwi kan, witin 110 mani alkan ba kat.

²³ Ai luhpia Efraín mulika luhpia nani sin kaikan. Manasés Josep luhpia ba, Maquir, Manasés luhpia almukka ba, baha luhpia mulika, taika nani sin kaikan. Ai taya nani tilara baha nani sin kulkan.

²⁴ Yu kumi Josep ai muihni nani ra win: “Yang pruaia piui pat baila sa, sakuna Dawan bal man nani ra tâm baikbia, naha kuntrika wina mai saki, Ebraham, Aisak, Jekob tasba yabaia win ba, baha tasbaya ra mai brih wabia.”

²⁵ Bara witin bui Israel luhpia nani ra win: “Man nani nanara yang ra swer taki aisas.” Bara witin nani ba witin ra swer taki aisin, bara witin bui witin nani ra win: “Kasak pali Gâd balbia, man nani ba sin saki mai brih wabia.”

²⁶ Bara baha kat Josep ai manka Idsip ra 110 mani alkan bara pruan. Bara witin nani ai wîna tara ba sîka dauki kapin kum ra mangki brin.