Blasi Sturka 45 - DAWAN BÎLA AISKA

Josep ai muihni nani ra param takisa

¹ Josep ai muihni nani mawan ra kaiki kan ba ra, witin sip kau ai kupia alki takaski briras kan. Bara witin ai bîla baikra wini aisin ai albika nani ra: “¡Man nani sut latara taks!” Bara Josep ai muihni nani ra param takan bara ai albika nani kumi sin bâra âpu kan.

² Bara witin ai bîla tara karna inan. Latara Idsip uplika nani sut bâra kan ba walan witin inan ba. Bara baha sturka, king fero watla bîla kat sin walan.

³ Josep ai muihni nani ra win: —Yang sika Josep. ¿Yang aisiki ba kau raya sa ki? Witin nani sirang tara pali iwan ba mita pana sip diara aisaras kan.

⁴ Sakuna Josep witin nani ra win: —Man nani, pliskam pali, laimara bal. Ai muihni nani ba ai lamara balan, bara witin nani ra win: —Yang sika Josep man nani muihkam, man nani mita Idsip uplika nani ra ai atkram ba.

⁵ Sakun, pliskam pali, man nani sari takpara, kupiam sin baikpara, man nani mita ai atkram ba ra wisi. Gâd mita sika baku dauki, man nani kainamra ai blikan nâra balri, upla rayaka nani ailal ba swaki sakaia dukiara.

⁶ Pat mani wâl plun tiwan piua ba baha kuntrika ra alkan sa. Sakuna kau mani matsip sa, baha piua nani ra plun mâ krikaia âpu kabia. Ban kra saumuk ba mangkbia sin, diara takbia apia.

⁷ Gâd mita man nani kainamra nâra ai blikan balri, man nani kiamkam ba tasba ra ban bâra kaia dukiara. Dawan wark aihkakira nani daukisa, man nani rayakam ba swaki sakaia mata.

⁸ Bamna Gâd mita sika naha tasbaya ra ai blikan, man nani lika diara daukras. Witin mita sika king fero watla ra ai bri balan, witin ra lâ smalkaia, watla dawanka sin aimakaia, bara Idsip tasbaya aiska wihtka sin ai mangkan.

⁹ Bamna man nani nâra kau takaskpara, aihni pali mahka aisiki ra was, bara witin ra wis: ‘Man luhpiam Josep bila naku wisa: Gâd mita Idsip tasbaya aiska pura wihtka ai mangkan. Bamna man takaskpara, mahka pali bal ai kaiks.

¹⁰ Gosen tasbaya ra, luhpiam, mulam daiwram nani, bara dukiam nani brisma ba sut aikuki yang laimara iwma. Bara baku man lika yang laimara kama.

¹¹ Bara bahara yang bui man tamya nani sut ra plun yabamna. Upla wala nani man wal takaski nani ba ra sin yabamna. Bara man nani sut diara bri kama, kau mani matsip ban plun tiwi kaia sa bamna.’

¹² Muihki Benjamín bara man nani sin nâra witnis sma, yang Josep man nani ra aisisna ba.

¹³ Idsip ra yang karnika tara brisna ba tânka sut papiki ra wis, man nani diara sut kaikram ba tânka ba sin. Man nani aihni was, bara aisiki ba pat pali bri bal.

¹⁴ Bara Josep Benjamín ra kiaubi alki mahka inan. Bara Benjamín sin Josep ra alki inan.

¹⁵ Bara ai muihni wala nani ba sut, kiaubi alki kiawali inan. Baha ningkara, ai muihni nani sut witin ra sturi aisaia buan.

¹⁶ Josep muihnika nani balan ba, witin ai muihni nani ra param takan sturka ba sut, king watla kat upla sut walan. Bara king fero sin lilia pali takan, wihta tara wala nani ba sin sut.

¹⁷ Bara king fero Josep ra win: —Muihkam nani ra wis ai daiwra nani ba prahki bri mahka kli Kenan ra wabia.

¹⁸ Bara ai aisika ai taya nani ba yang ra bri balbia. Idsip tasbaya wina diara kanra yamni ba yang bui witin nani ra yabamna; plun kau auhni naha tasbaya ra mangki saki ba wina, witin nani ai pata pibia.

¹⁹ Bara muihkam nani ra sin wis, Idsip wina wagin nani blikaisna, mairin nani ba tuktan nani bara man nani aisikam ba sin suni bri balaia dukiara. Bamna wis witin nani balbia.

²⁰ Nanara witin nani ai dukia nani bri ba, swiaia dukiara sari bribia apia wis; kan Idsip tasbaya ra diara kanra yamni nani bâra ba witin nani ai dukia kabia bamna.

²¹ Bara king fero dîa aisin ba baku Israel luhpia nani ba daukan. Bara Josep sin king fero aisin ba baku, witin nani ra wagin nani yaban, yabal ra piaia pata sin plun yaban;

²² bara kwala raya sipan nani sin dimaia yaban. Benjamín ra lika silbar mâ 300 bara kwala sin matsip yaban.

²³ Ai aisika dukia sin blikan, biriku matawalsip ra prahkan, Idsip ra diara kanra yamni nani bâra bri kan ba dukia nani wal. Bara kli biriku matawalsip ba plun plawar prahkan, brit bara diara wala mahka piaia pata nani ba sin yaban, ai aisika yabal ra pi impakaia pata.

²⁴ Witin nani mahka impakan, bara Josep witin nani ra lakula dauki, win: —Man nani yabal ra unsabi lika wapara. Bara witin nani impakan.

²⁵ Witin nani Idsip wina taki Kenan ra wan, ai aisika Jekob sika Kenan ra iwi kan.

²⁶ Bara witin nani Josep kau raya ba sturka, bara Josep sin Idsip tasbaya aiska purara wihta tara mangkan ba sturka sut ba ai aisika Jekob ra win. Bara aisika ba dîa daukaia nahki aisaia sapa sip ai dara walras kan. Baha nani aisin ba, witin sip kasak lukras kan.

²⁷ Sakuna witin nani kli witin ra win, Josep ai bîla blikan ba. Bara wagin nani blikan ba sin marikan, bara witin kaikan Josep witin ai mata wagin nani blikan ba; baha kat ai kupia aimakan.

²⁸ Bara witin naku aisin: “¡Baha wal nanara yang aitani lukisna, nanara daira waluna luhpi Josep kau raya sa! Kau raya sna na ra witin kaikaia mahka wamna.”