Aiseya 40 - DAWAN BÎLA AISKA

Dawan bui Jerusalem maisa nihkisa

¹ Man nani Gâdkam ba aisisa: “Upliki nani ba maisa nihks, man nani maisa nihks;

² man nani Jerusalem ra ba latwan kaiki aisas, witin ra wis alba kaia piua kan ba pat luan, ai saurka nani pâtka mana ba pat aibapan, ai saurka nani ba tâwan yang mihti wina klala pat aima wâl brin.”

³ Bîla baikra kum winisa: “Man nani bui Dawan yabalka ba ridi dauks upla iwras tasbaya ra, Gâd yabalka tara ba wapni dauks, wapanka kum wapni biarapara pliska kum ra.

⁴ Il bîla bani ba lalauban kabia, il nani, kiuhsi nani ba sin sut mâyara ikan kabia; bara warha ba wapni takbia, pruamni nani ba sin langni takbia.

⁵ Bara Dawan prana ba param takbia, bara baku upla bani asla aikuki witin ba kaikbia; Dawan witin mita baku takaia aisin ba.”

⁶ Bîla baikra kum aisisa: “Wins”, bara yang pana makabi walri: “¿Dîa dukiara yang bîli baikra tara winamna?” “Upla bani ba twi baku sa, ¡bara ai prana sut ba sin twi ra tangni prana ba baku sa!

⁷ Twi ba lâwisa, ai tangnika ba sin srawisa, Dawan wingka puhbra ba witin ai purak lui ba ra. Kasak pali upla ba twi baku sa.

⁸ Twi ba lâwisa, tangni ba srawisa, sakuna yawan wan Gâdka bîla ba ban bâra sa ban kaia ra.”

⁹ Saion wina maisa papakra, man il kum purara ba ra uls; bîlam baikra ba karna wins; karna wins, si bripara, Jerusalem, Juda tawanka tara nani ra wis: “¡Man nani Gâdkam ba kaiks nâra sa!”

¹⁰ Kaiks, Dawan ba ai karnika wal aula bara witin Dawan aimakbia. Ai uplika nani brih aula witin holi atki saki brin ba.

¹¹ Witin sepad baku ai daknika ba main kaiki aula; sîp lupia nani ba ai klahkla ra twilkisa, swap lupia nani ba, ai lama bîla kat main kaiki alkisa.

Israel Gâdka ba sip gâd wala wal prakras

¹² ¿Kabu tara ba ya pat ai mihta ra alki kulki kaikan, apia kaka ai mihta sirpika nani ba ni kasbrika pura bîla yahpika ba pat wiria kulki kaikan? ¿Ya pat tasba yuya nani ba sut kâp kumi ra auhban, apia kaka, kiuhsi nani il nani ba sut paun ra mangki kaikan?

¹³ ¿Ya mita Dawan mistikka ba kaiki win? Apia kaka, ¿ya witin ra kupia krauki smalkan?

¹⁴ ¿Ya mita witin ra marikan smalkanka bîla nani ba, bara baku sin witin diara tânka kakaira takaia ba sin? ¿Ya witin ra lâ wapni daukaia yabalka nani ba marikan? ¿Apia kaka sins lâka ba witin ra smalkan? ¿Apia kra tânka kakaira kaia yabalka ba marikan?

¹⁵ Witin ai mapara nisan nani ba lî mâ kum baku sa, tasba yuya lupia paun ra mangkan ba baku; kabu un ra iwi kuntrika nani mana ba auhya yuya kum baku kulkisa.

¹⁶ Líbano aiska ra pauta bara daiwan nani ba aitani ailal apia sa sakripais daukaia.

¹⁷ Nisan nani sut ba, witin ai mawanra diara apia baku sa; witin wal praki kaiki kulki kaiki ba ra, diara kum âpu ba baku sa.

¹⁸ ¿Bamna Gâd lilka ba, man nani bui ya lilka talia daukma? ¿Apia kaka, man nani dîa lilka witin ai talia ba lilka ba wal prakma?

¹⁹ Diara wina karbi lilka papaskra nani ba, diara lilka daukisa bras wina, bara gul ni lalaubisa, silbar ba slilki diara awa lipni nani ba paskisa.

²⁰ Upla umpira ba, dus yula piras ba pliki saki, baha ni karbi lilka daukisa; lilka papaskra sinskira kum plikisa, bara lilka kum karbi dauki witin ra yabia, baha aiawras ai pliska ra ban sa, kauhbia apia.

²¹ ¿Dîa man nani nu âpu katma ki? ¿Man nani sip walras katma ki? ¿Blasi pali wina man nani ra mai wiras kata ki? ¿Tasba paskan ba piua wina, man nani ra pat mai smalki mai wiras kata ki?

²² Witin tasba kutbanka na purara kasbrika baila wala ra iwisa, tasba ra nani ba tristrisia nani baku sa; witin kasbrika purara ba slingbi sakisa kwala kum baku, trapalin watla baku bahara palkisa.

²³ Karnakira nani ba witin mita diara âpu lakisa, tasba ra wihta aimaki nani ba diara bahki daukisa.

²⁴ Witin nani ba tasba ra mangkras kan baku kabia, witin nani sin mâ nani ba mangkras kan baku, ai plamaika ba sin ai wakia nani ba tasba ra briras kan baku; pâsa kum witin nanik aihni krawi luan bara pat lâwisa, bara prari bal brih auya dus wahia lâwan kum baku.

²⁵ Holikira Gâdka ba makabi walisa: “¿Man nani bui yang na dîa wal tailia ai daukaia plikisma? ¿Apia kaka, dîa wal baku ai praki ai kaikaisma ki?”

²⁶ Man nani namkra nani purara buki kaiks; bara kaiks ya naha diara nani na paskan ba. Baha nani sut ba witin kumi saki kulkisa; baha nani sut ba witin nina nani kat mâki winisa, sut ba bâra sa. Baku sika witin tara sa, ai karnika ba sin, ai kingka lâka karnika ba sin.

²⁷ Israel, Jekob tawanka, ¿dîa kan brukwisma? ¿Dîa kan aisisma: “Dawan ba yang ra diara taki ba tânka briras, Gâd lika yang dukira lukras”?

²⁸ ¿Man kaikras sma ki? ¿Man walras sma ki? Dawan sika Gâd ban kaia ba, tasba lui waia piua sin witin mita paskan ba. Witin dring swapras, swapan bara bahkia takras, witin diara tânka kaiki ba sut alkaia ba upla kumi sin âpu sa.

²⁹ Swapan bara witin mita karnika yabisa, karnika âpu pali takan ba ra sin witin mita kli karnika ailal yabisa.

³⁰ Wahma bara tiara nani ba swapisa bara bahkia sin takisa, kau karna nani ba sin swapni taki kauhisa,

³¹ sakuna Dawan bîla kaiki luki nani ba, witin nani karnika raya bribia, witin nani yakal tara nani baku ai tnawa nani buki pâlbia; sip kabia plapaia bara bahkia takbia apia, bara sin wapbia swapras kira.