Aiseya 24 - DAWAN BÎLA AISKA

Dawan tasba aiska purara lâ daukan kabia ba

¹ Man nani kaikma, Dawan mita tasba bilara diara âpu swibia, diara nani ba sauhkbia, lulki bataki swibia, upla nani ba sut plapaia.

² Bara baku takbia upla sut ra, prîs ra taki ba baku, tawan uplika ra sin, alba nani ra, dawanka ra sin, alba mairin ra, ai dawanka mairin ra sin, diara lin muni ba, diara lin taki bri ba ra sin, diara atki brih bara kli bri si atki ba ra sin, tras dimi ba ra, tras yabi ba ra sin.

³ Tasba aiska pali ba bîla man swibia, dukia sut pali mihta dakban kabia. Kan naha bîla na Dawan aisin ba mita.

⁴ Tasba ba lâwi bara srawbia, tasba aihka ba lâwbia bara sut srawbia, kasbrika purara bara tasba ra sin, sari lâka baman kabia.

⁵ Tasba ba upla nani ba mita sauhkan sa, kan witin nani, lâ purak luan bamna, wapni lâka ba wali daukras lâ ban kaia ba krikan.

⁶ Baha tâka sika, lahtubanka kum mita tasba na âpu daukan, iwanka watla nani ba sut bîla man swin, baha tâka mita, upla nani bahara iwi kan ba sin sut âpu daukan. Upla nani ba maura man swin.

⁷ Wain ba tiwan, wain dusa ba sin siknis alkan, kupia lilia nani kan ba sut ai mamna lulkan.

⁸ Kungbi pruki lilia dauki kan liliaka ba takaskan, lilia tara binka dauki kan ba sin takaskan, arp binka liliaka ba sin takaskan.

⁹ Witin nani aiwani wain dibia apia, wain piawi kisni takan ba, witin nani dibia bara tahpla kabia.

¹⁰ Bahki lâka ba mita tawan ba krikan sa, utla nani sut ba witin nani mita prakan, upla kum sin dimaia apia dukiara.

¹¹ Wain âpu ba dukiara, yabal tara nani ra upla ba inisa; liliaka nani sut ba sari takan, tasba liliaka ba sut tiwan.

¹² Tawan tara ba bîla man swin, sauhki tikanka ba wal getka ba batakan.

¹³ Baha baku kabia tasba bani ra upla nani tilara, oliv dusa yahban baku, apia kaka mâ dakban ba ningkara kau kum nakra luan ba sin kli pliki ba baku.

¹⁴ Baha nani pruras swak takan kabia ba lilia aibanhwan mita wini banhbia, muna wina sin witin ai bîla baikra blîkbia Dawan king tara ba kaikbia ba ra.

¹⁵ Baku sin lalma tani ra bara kabu un ra iwi kuntrika Dawan ra mayunra pranakira yabia, Israel Gâdka ra.

¹⁶ Tasba tâ wala wina aiwananka nani yawan walan: “¡Kasakkira ba mayunra kabia!” Bara yang wîri: ¡Ay, dîa kan uba umpira uba umpira sa! Upla kuninkira nani ba kunin lâka ra ai uplika ra atkisa.

¹⁷ Tasba ra upla nani ba daiwan baku kabia, âikra nani ba mita nina bliki kabia, unta kum bilara kauhbia, apia kaka mina alkaika ra alkbia.

¹⁸ Upla âikra wina swak takbia ba unta kum ra kauhbia, unta wina bal takbia ba mina alkaika ba ra alki priskan kabia. Pura wina windar nani ba kwâkan kabia, lisamra tara bal tasba ba nikban kabia.

¹⁹ Tasba aiska ba nikban kabia, tasba aiska ba baikanka sirpi ra daukan kabia.

²⁰ Tasba ba upla bla kum parwi baku nikban kabia, mani watla lupia baku yahbi kabia. Saurka wirhika mita kau wirha taibi kabia bara kauhbia, baha kli sip bubia apia.

²¹ Baha yua ra ban takbia, aiklaklabra daknika kasbrika purara bâra ba, tasba kingka nani tasba ba sut Dawan mita klala yabia.

²² Witin nani ba tasba mununhta sialaka watla ra silak ra mangkan kabia, silak ra mangki nani ba durka praki swin kabia, bara yu ailal lubia ba ningkara klala yan kabia.

²³ Karnika sut bri Dawanka ba, witin king baku ai warkka daukbia ba ra Saion ilka ba ra, Jerusalem ra. Kati, lapta tihmia takbia bara wihta nani ba Dawan prana ba kaikbia.