Aiseya 10 - DAWAN BÎLA AISKA

¹ ¡Saura pali kabia man nani lâ kasak apia nani marikisma ba; bara upla raitka yabras, lâka nani ni ulbi sakisma ba,

² umpira nani lâka ba wapni kat daukras, upliki nani kupia kriwan, sari nani ba raitka yabras, piarka nani ra taiban lâka ra brisma, rau nani dukia sin mihta dakbi implikisma ba!

³ ¿Dîa daukma man nani baha yua ra, diara daukram nani ba sut makabi walbia kaka, bara kaikma klala ba laih wina aula ba ra? ¿Yaura wama hilp makabaia? ¿Anira dukiam kukan ba swima ki?

⁴ Witin nani bahki mai kulkbia bara silak ra mai mangkaia mai brih wabia, pruan ba nani tilara ikan kabia. Baha sut daukan kabia, ban sakuna, Dawan ai kupia baiwanka ba takaskbia apia; ai mihta bukan ba ban sa.

Asiria nani ba wal klala yabisa

⁵ “¡Asiria kingka ba! Witin ba sika, yang dus kum baku yus munisna kupi baiwi piua ra, witin ni klala yabisna, lawisna ba ra.

⁶ Tawan kum Dawan ra lukras ba mapara aiklabaia witin ba blikisna, nisan kum ra kupi baiki ba, dukia nani ba impliki sut mihta dakbaia dukiara, witin nani ba alki taibaia slaubla yabal ra wan mina ra taibi ba baku.

⁷ Sakuna Asiria kingka ai lukanka ra baku lukras kabia kra, baku daukaia ai kupia ra luki paskras kabia sin, sakuna ai lukanka ra dimbia, nisan nani manis ba klaki âpu daukaia.

⁸ Aisisa: ‘King nani sut ba, yang adarki ra wihta aimakisa.

⁹ Yang maipara wal kumi sa, Calné tawanka ba wihki Carquemis, Hamat ba Arpad wal baku sa, ba wal bara Sameria ba sin Damaskus wal baku sa.

¹⁰ Yang kuntri nani wal prawri, gâd bahki nani ailal bri ba, aidul kau ailal brisa Jerusalem bara Sameria tawanka nani ba wal.

¹¹ Yang Sameria bara ai aidulka nani sut ra dîa daukri ba baku, ¿sip sna apia ki, yang bui Jerusalem ai aidulka sut kira baku daukaia?’ ”

¹² Sakuna Dawan ba, dîa witin Saion ilka bara Jerusalem wal ra daukaia ba daukbia ningkara, Asiria kingka ra klala yabia, naha warkka saura dauki ba tâka, witin ai kupia prautka lâka, ai nakra prautka lâka ni ai walka nani ra kaiki ai prana bri ba.

¹³ Asiria kingka ba aisin: “Yang karniki ni baha sut daukri; yang sinskira sna, baha nani daukaia ba yang luki kaikri. Nisan nani tasbaya piarkika ba yang mita wala daukri, ai dukia kukanka nani ba sin dakbi briri, âu, yang waitna kum kupi karna, king nani bâra iwi kan ba bataki slingbi tikri.

¹⁴ Yang mihti ra upla nani dukia kukanka ba alkri, tasba aiska ba karniki ra, alki briri piawira ai watla ra ai mahbra nani lulki swin upla kum bal alki bri ba baku, bara upla kumi sin âpu kan ai tnawa ilingkaia, piawira kumi sin âpu kan wasbaia.”

¹⁵ ¿Sakuna, sip sa ki asa ba lukaia witin ba kau tara sa baha uplika witin ra alki bri klaki ba wal? ¿Sâ ba witin kau tara sa ai dara walaia sip sa ki upla witin ra nikbi ba wal? ¡Kîn ba, dus kum sa, bara witin mita sip sa ki upla buki brih waia!

¹⁶ Baha baku, Dawan karnika sut bri ba mita wîna karnakira nani ba karnika âpu dauki swibia, rihka ba pauta klauhi baha wîna ba ami kaia.

¹⁷ Gâd Holikira, Israel ingnika ba, pauta klauhan takbia, bara yu kumi bilara kuntrika ra rahra nani ba sut angki âpu daukbia.

¹⁸ Unta tara nani prana ba tasba disang nani ba sin sut angki âpu pali daukbia, witin nani ba pauta klauhan lulki swin ba baku swibia ai karnika âpu kabia.

¹⁹ Dus nani ba unta tara ra maura baman swin kabia, tuktan kum sin baha kulki sakaia sip kabia.

²⁰ Baha yua ra nani ra Israel ra upla wiria man takaskan kabia nani ba, Jekob watla uplika nani kau raya kabia ba, witin nani ra rausauhkan nani bara kli aikuki ai tâ baikbia apia, sakuna kasak pali sika, Dawan Israel Gâdka Holikira ra ai tâ baikbia.

²¹ Upla tila nani baman Jekob tawanka wina, karnika wala mita sip pura luras ba Gâdka ra, tawi balbia.

²² Uplikam nani Israel ba, kabu auhika baku ailal kabia kra, sakuna dîa kau swin ba baman lika, kli tawi balbia. Sauhki tikaia lâka ba pat daukan sa bara kasakka lâka ba mita pura lui kabia.

²³ Kan karnika sut bri Dawanka ba sauhki tikaia lâka ba, witin luki kaiki daukan sa bamna tasba aiska ra baku daukbia.

²⁴ Karnika sut bri Dawanka ba witin naku wisa: “Yang upliki nani, Saion ra iwisma ba, Asiria uplika nani ba si bripara, ai kingka dusa ni mai prukbia kabia sin, mampara ai kînka dusa nani ba bukbia kra, Idsip uplika nani mai daukan ba baku.

²⁵ Sakuna naha wina pat pali kau piua wihka waras ba ra, klala nani ba brih balan kabia, kupi baiwanka bara lawanki ba mita, witin nani ba sauhki tikan kabia.

²⁶ Dawan, karnika sut ba mita witin nani ra klala yabia Oreb ra walpa tara bara Madián uplika nani ra bataki pura luan ba baku, Asiria mapara ai karnika ba marikbia. Idsip ra ai karnika marikan ba baku.

²⁷ Baha piua ra ban takbia wirhikam nani pamhpaya ra sunan ba, sakan kabia; namna dusa ra raskaika dusa wilkan ba sin.”

Asiria nani ani kat dimi balan ba

²⁸ Witin Rimón bâk aula, ban Ai kat auya, ban Migrón bâk lui; ai dukia nani Micmás kat swin.

²⁹ Tingni luaika bâk luan Gueba ra tihmia takaskan; Ramá tatatwan; Guibeá Saúl tawanka uplika nani ba plapan.

³⁰ ¡Bat-galim luhpia mairin nani, bîlam baikra tara wins! ¡Lais uplika nani, witin nani wini ba wals! ¡Anatot uplika nani, witin nani ra pana aisas!

³¹ Madmená uplika nani ba plapi banhwan, Guebim ra iwi nani ba sut yukuwi banhwan.

³² Wan waihla nani naiwa bal Nob ra takaskbia; Saion ilka ba mapara aiklabaia sainka, yabisa Jerusalem ilka bîla ba.

³³ Kaiks karnika sut bri Dawanka ba ai karnika ni, dus nani ba batakbia; dus tara purara pâwan nani ba klakbia, tnawa purara pali nani ba mâyara ikan kabia.

³⁴ Unta tara twakni pali pâwan ba asa kum ni klakbia, Líbano pranakira ba sin bin tara wal kauhbia.